ଭବିଷ୍ୟତ ମିଶନ ଉପରେ ଧ୍ୟାନ ଦେବାକୁ ବୈଜ୍ଞାନିକଙ୍କୁ ଶିବନଙ୍କ ପରାମର୍ଶ

ବେଙ୍ଗାଲୁରୁ: ଚନ୍ଦ୍ରଯାନ-୨ର ଲ୍ୟାଣ୍ଡର ‘ବିକ୍ରମ’ର ଧୀର ଅବତରଣର ବିଫଳତା ଉପରେ ତର୍ଜମା ଚାଲିଛି। ଇସ୍ରୋର ଆଭ୍ୟନ୍ତରୀଣ କମିଟି ଏହାର ତଦନ୍ତ ଚଳାଇଛି। ତେବେ ଅଭିଯାନର ଏହି ବିଫଳତାରେ ହତୋତ୍ସାହିତ ନ ହୋଇ ଭବିଷ୍ୟତର ମିଶନଗୁଡିକ ଉପରେ ଧ୍ୟାନ ଦେବାକୁ ଇସ୍ରୋ ଅଧ୍ୟକ୍ଷ କେ ଶିବନ ବୈଜ୍ଞାନିକମାନଙ୍କୁ କହିଛନ୍ତି। ସୋମବାର ଇସ୍ରୋର ବୈଜ୍ଞାନିକ ଓ ଯନ୍ତ୍ରୀମାନଙ୍କୁ ସମ୍ବୋଧନ କରି ଏପରି ବାର୍ତ୍ତା ଦେଇଥିବା ରିପୋର୍ଟରୁ ଜଣାଯାଇଛି। ଚନ୍ଦ୍ରଯାନ-୨ ଅର୍ବିଟର ବିଜ୍ଞାନ କ୍ଷେତ୍ରରେ ଶତପ୍ରତିଶତ ସଫଳତା ହାସଲ କରିଥିବାବେଳେ ଅବତରଣ (ଲ୍ୟାଣ୍ଡିଂ) ଟେକ୍ନୋଲୋଜି କ୍ଷେତ୍ରରେ ୯୫% ସଫଳତା ହାସଲ କରିଥିବା ଶିବନ କହିଛନ୍ତି। ତେଣୁ ଏଥିପାଇଁ ବିଚଳିତ ହେବାର ଆବଶ୍ୟକ ନାହିଁ; ବରଂ ଆଗାମୀ ଅଭିଯାନଗୁଡିକରେ ଧ୍ୟାନ ଦେବାର ଆବଶ୍ୟକତା ରହିଛି ବୋଲି ସେ କହିଛନ୍ତି। କ୍ରାସ ଲ୍ୟାଣ୍ଡିଂ ପରେ ବିକ୍ରମର ଅବସ୍ଥିତିକୁ ଅର୍ବିଟର ଦ୍ବାରା ଠାବ କରାଯାଇଛି। ଏହା ସହିତ ଯୋଗାଯୋଗ ପାଇଁ ଉଦ୍ୟମ ଚାଲିଥିବା ଇସ୍ରୋ କହିଛି।