ନୂଆଦିଲ୍ଲୀ: ଦେଶର ପ୍ରତିଷ୍ଠିତ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ(ଜେଏନୟୁ)ରେ ପୁଣି ଥରେ ବାମନ୍ଥୀ ଦଳ ନିର୍ବାଚନରେ ବିଜୟୀ ହୋଇଛି। ରବିବାର ବିଶ୍ୱବିଦ୍ୟାଳୟରେ ଛାତ୍ର ସଂସଦର ନିର୍ବାଚନ ଫଳାଫଳ ଘୋଷଣା କରାଯାଇ ଥିଲା। ଏଥିରେ ଅଧ୍ୟକ୍ଷ, ଉପାଧ୍ୟକ୍ଷ, ମହାସଚିବ ଓ ଯୁଗ୍ମ ସଚିବ ପଦରେ ବାମପନ୍ଥୀ ପ୍ରାର୍ଥୀ ବିଜୟୀ ହୋଇଛି। ନିର୍ବାଚନର ପ୍ରମୁଖ ପଦ ଗୁଡ଼ିକରେ ଏବିଭିପି ଦ୍ୱିତୀୟ ସ୍ଥାନରେ ରହିଛି।
ଶୁକ୍ରବାର ବିଶ୍ୱବିଦ୍ୟାଳୟରେ ନିର୍ବାଚନ ଅନୁଷ୍ଠିତ ହୋଇଥିଲେ ମଧ୍ୟ ଭୋଟ ଗଣତିକୁ ନେଇ ବିଳମ୍ବ ହୋଇଥିଲା। ଛାତ୍ର ସଂଗଠନ ମଧ୍ୟରେ ବିବାଦକୁ ଦୃଷ୍ଟିରେ ରଖି ଏକାଧିକ ପଦର ଭୋଟ ଗଣତିକୁ ଅସ୍ଥାୟୀଭାବେ ବାତିଲ କରି ଦିଆଯାଇ ଥିଲା। ରବିବାର ଉପରୋକ୍ତ ପଦଗୁଡ଼ିକର ଗଣତି ହେବା ସହ ପରିଣାମ ଘୋଷଣା କରାଯାଇଛି। ଚଳିତ ବର୍ଷ ୭୦ପ୍ରତିଶତ ମତଦାନ ହୋଇଥିଲା। ବିଗତ ୬ବର୍ଷ ମଧ୍ୟରେ ଏତେ ଅଧିକ ମାତ୍ରାରେ ଭୋଟ ହୋଇ ନଥିଲା।
