ଭୁବନେଶ୍ଵର: ରାଜ୍ୟରେ ଗ୍ରାହକମାନଙ୍କୁ ସୁନା ଦୋକାନୀ ଠକୁଛନ୍ତି। ଗୋଟିଏ ପଟେ ସୁନା ମୂଲ୍ୟ ବୃଦ୍ଧି ଲୋକଙ୍କୁ ଚିନ୍ତାରେ ପକାଇଥିବାବେଳେ ଅନ୍ୟପଟେ ଦୋକାନୀମାନେ ଗ୍ରାହକଙ୍କୁ ମାପ ଓଜନରେ ଠକି ଲୁଟିବାରେ ଲାଗିଛନ୍ତି। ଖୋଦ ରାଜ୍ୟ ସରକାର ଏଭଳି ତଥ୍ୟ ପ୍ରଦାନ କରିଛନ୍ତି। ବୁଧବାର ବିଧାନସଭାରେ ଖାଉଟି କଲ୍ୟାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସିଂହ ଏହି ସୂଚନା ଦେବା ସହିତ ସୁନା ଦୋକାନଗୁଡ଼ିକ ବିରୋଧରେ କାର୍ଯ୍ୟାନୁଷ୍ଠାନ ଲାଗି ଚଢ଼ାଉ କରାଯାଉଥିବା କହିଛନ୍ତି।
ମନ୍ତ୍ରୀ କହିଛନ୍ତି, ସୁନା ଦୋକାନଗୁଡ଼ିକରେ ମାପ ଓଜନ ବିଭାଗ ପକ୍ଷରୁ ଚଢ଼ାଉ କରାଯାଉଛି। ୨୦୧୮-୧୯ରେ ରାଜ୍ୟରେ ୩୧ଟି ଦୋକାନରେ ଚଢ଼ାଉ କରାଯାଇଥିବାବେଳେ ଚଳିତବର୍ଷ ବର୍ତ୍ତମାନ ପର୍ଯ୍ୟନ୍ତ ୧୧ ଦୋକାନରେ ଚଢ଼ାଉ ହୋଇଛି। ଦୋକାନୀ ସାରୁ ଭିତରେ ମାରୁ ଥିଲେ ନିଶ୍ଚିତ ଧରିବୁ ବୋଲି ମନ୍ତ୍ରୀ କହିଛନ୍ତି। କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ଏକ ପ୍ରଶ୍ନର ଉତ୍ତରରେ ମନ୍ତ୍ରୀ ଏହି ସୂଚନା ଦେଇଛନ୍ତି। ତେବେ ମନ୍ତ୍ରୀଙ୍କ ସୂଚନା ପରେ ବାଚସ୍ପତି ତାଙ୍କୁ ଭୁବନେଶ୍ଵର ଏବଂ ବ୍ରହ୍ମପୁରରେ ଚଢ଼ାଉ କରିବାକୁ କହିଛନ୍ତି।
କଂଗ୍ରେସ ବିଧାୟକ ଦଳ ନେତା ନରସିଂହ କହିଛନ୍ତି ଯେ, କେଉଁ କେଉଁ ସୁନା ଦୋକାନୀ କେତେ ଟଙ୍କା ଠକିଛନ୍ତି ଏବଂ ସେମାନଙ୍କଠାରୁ କେତେଟଙ୍କା ଜରିମାନା ଆଦାୟ ହୋଇଛି ତାହାର ତଥ୍ୟ ଦିଆଯାଉ। ଦୋକାନଗୁଡ଼ିକ ସମ୍ପର୍କରେ ତଥ୍ୟ ଦିଆଗଲେ ଗ୍ରାହକମାନେ ସଚେତନ ହୋଇ ସେଠାରୁ ସୁନା କିଣିବାକୁ ଇଚ୍ଛା ପ୍ରକାଶ କରିବେ ନାହିଁ ବୋଲି ନରସିଂହ କହିଥିଲେ। ସେହିପରି ବଡ଼ ଦୋକାନଗୁଡ଼ିକରେ ଚଢ଼ାଉ ହୋଇଛି ନା କେବଳ ଛୋଟ ମାଛକୁ ଧରିବାକୁ ଉଦ୍ୟମ ହେଉଛି ବୋଲି ସେ ପ୍ରଶ୍ନ କରିଥିଲେ।
