ନୂଆଦିଲ୍ଲୀ: ବଲିଉଡ ଅଭିନେତ୍ରୀ ତଥା ପୂର୍ବତନ ସାଂସଦ ଜୟାପ୍ରଦାଙ୍କୁ ସ୍ବତନ୍ତ୍ର ଅଦାଲତ ପଳାତକ ଘୋଷଣା କରିଛନ୍ତି। ଜୟାପ୍ରଦାଙ୍କ ବିରୋଧରେ ଥିବା ଦୁଇଟି ମାମଲାର ଶୁଣାଣି ସମୟରେ ସେ ଅଦାଲତରେ ହାଜର ହୋଇ ନଥିବାରୁ ତାଙ୍କୁ ପଳାତକ ଘୋଷଣା କରାଯାଇଛି। ୨୦୧୯ ଲୋକସଭା ନିର୍ବାଚନରେ ଜୟାପ୍ରଦା ବିଜେପି ଟିକଟରେ ନିର୍ବାଚନ ଲଢି ପରାସ୍ତ ହୋଇଥିଲେ। ୨୦୧୯ରେ ନିର୍ବାଚନ ସମୟରେ ଆଚରଣବିଧି ଉଲ୍ଲଙ୍ଘନ କରିବା ନେଇ ତାଙ୍କ ବିରୋଧରେ ମାମଲା ରୁଜୁ ହୋଇଥିଲା। ଏହି ମାମଲା ଆଧାରରେ ତାଙ୍କ ବିରୋଧରେ ଅଦାଲତ ୭ଥର ଜାମିନ ବିହୀନ ଗିରଫ ପରୱାନା ଜାରି କରିଥିଲେ। ମାତ୍ର ସେ ଅଦାଲତରେ ହାଜର ହୋଇ ନଥିଲେ। ଏହାକୁ ନେଇ ସ୍ବତନ୍ତ୍ର ଏମପି/ଏମଏଲଏ ଅଦାଲତର ବିଚାରପତି ସୋଭିତ ବଂଶଲ ଜୟାପ୍ରଦାଙ୍କୁ ପଳାତକ ଘୋଷଣା କରିବା ସହିତ ତାଙ୍କୁ ଆସନ୍ତା ମାର୍ଚ୍ଚ ୬ରେ ହାଜର କରାଇବାକୁ ନିର୍ଦେଶ ଦେଇଛନ୍ତି। ଏଥିପାଇଁ ଡେପୁଟି ଏସ୍ପିଙ୍କ ନେତୃତ୍ବରେ ସ୍ବତନ୍ତ୍ର ପୁଲିସ ଟିମ୍ ଗଠନ କରାଯାଇଛି। ଜୟାପ୍ରଦା ହିନ୍ଦୀ ଓ ତେଲୁଗୁ ଚଳଚ୍ଚିତ୍ର ଜଗତର ଜଣେ ପ୍ରତିଷ୍ଠିତ ଅଭିନେତ୍ରୀ। ୧୯୯୪ରେ ସେ ତେଲୁଗୁ ଦେଶମ ପାର୍ଟି (ଟିଡିପି)ରେ ଯୋଗ ଦେଇଥିଲେ। ୨୦୦୪ରେ ସେ ସମାଜବାଦୀ ପାର୍ଟିରେ, ୨୦୧୪ରେ ରାଷ୍ଟ୍ରୀୟ ଲୋକ ଦଳ ଓ ୨୦୧୯ରେ ବିଜେପିରେ ଯୋଗ ଦେଇଥିଲେ। ୨୦୦୪ରୁ ୨୦୧୪ ପର୍ଯ୍ୟନ୍ତ ସେ ଉତ୍ତରପ୍ରଦେଶ ରାମପୁର ଆସନରୁ ଲୋକସଭାକୁ ନିର୍ବାଚିତ ହୋଇଥିଲେ। ୧୯୯୬ରୁ ୨୦୦୨ ପର୍ଯ୍ୟନ୍ତ ସେ ରାଜ୍ୟସଭା ସାଂସଦ ଥିଲେ।
Popular Categories
Previous article
Next article