ରାମନାଗୁଡା: ରାୟଗଡ଼ା ଜିଲ୍ଲା ରାମନାଗୁଡା ବ୍ଲକ ସମ୍ମୀଳନୀ କକ୍ଷଠାରେ ମହାତ୍ମା ଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନା ଓ ଜାତୀୟ ଖାଦ୍ୟ ସୁରକ୍ଷା ଆଇନ-୨୦୧୩ ବ୍ଲକସ୍ତରୀୟ ଜନଶୁଣାଣୀ ଶିବିର ଅନୁଷ୍ଠିତ ହୋଇଯାଇଛି। ଏହି ଶିବିରରେ ଏପିଡି ଭୀମସେନ ଶବର, ନବ ନିର୍ବାଚିତ ପଞ୍ଚାୟତ ସମିତି ଅଧ୍ୟକ୍ଷ, ଉପାଧ୍ୟକ୍ଷ, ବିଡ଼ିଓ ବେଣୁଧର ଶବର, କଜୋନ ଜିଲ୍ଲା ପରିଷଦ ସଭ୍ୟ ତାଙ୍ଗୁଡୁ ଶ୍ରୀଧର, ଖଜୋନ ଜିଲ୍ଲା ପରିଷଦ ସଭ୍ୟ ସୁରେଶ ଗମାଙ୍ଗଙ୍କ ସମେତ ସମସ୍ତ ପଞ୍ଚାୟତ ନବ ନିର୍ବାଚିତ ସରପଞ୍ଚ ଓ ସମିତିସଭ୍ୟ ପ୍ରମୁଖ ଉପସ୍ଥିତ ଥିଲେ। ଏଥିରେ ୨୦୨୦-୨୧ଆର୍ଥିକ ବର୍ଷରେ ସର୍ବମୋଟ ୪ଲକ୍ଷ ୫ହଜାର ୬ଶହ ୪୩ ଶ୍ରମ ଦିବସ ସୃଷ୍ଟି ହୋଇଥିବା ବେଳେ ୬୦୬ଟି ପ୍ରକଳ୍ପ କାର୍ଯ୍ୟ ସମ୍ପୂର୍ଣ୍ଣ ହୋଇଛି। ୨୩୭ଟି ପ୍ରକଳ୍ପ କାର୍ଯ୍ୟ ଚାଲୁ ରହିଥିବା ସୂଚନା ମିଳିଛି। ତେବେ ୧୨ଗୋଟି ପଞ୍ଚାୟତରେ ସର୍ବମୋଟ ୯କୋଟି ୩୩ଲକ୍ଷ ୩୦ହଜାର ୪୮୦ଟଙ୍କା ପ୍ରକଳ୍ପ କାର୍ଯ୍ୟ ଚାଲୁ ରହିଥିବା ବେଳେ ପ୍ରାରଶ୍ରମିକ ବାବଦକୁ ୭କୋଟି ୬୪ଲକ୍ଷ ୮୧ହଜାର ୭୪ଟଙ୍କା ପ୍ରଦାନ କରାଯାଇଥିବା ଶିବିରରେ ସୂଚନା ଦିଆଯାଇଥିଲା। ସେହିପରି ଜାତୀୟ ଖାଦ୍ୟ ସୁରକ୍ଷା ଆଇନ ଅଧିନରେ ୨୦୨୦-୨୧ ଆର୍ଥିକ ବର୍ଷରେ ପ୍ରାଥମିକ ଅଗ୍ରାଧିକାର ପରିବାର ଅଧିନରେ ୧୧ହଜାର ୬୮୨ଜଣ ହିତାଧିକାରୀଙ୍କୁ ସାମିଲ କରାଯାଇଥିବା ବେଳେ ଅନ୍ତୋଦୟ ଅନ୍ନ ଯୋଜନା ଅଧିନରେ ୨ହଜାର ୨ଶହ ୧୧ଜଣ ହିତାଧିକାରୀଙ୍କୁ ସାମିଲ କରାଯାଇ ଯୋଗାଣ ନିରୀକ୍ଷକ ସିପ୍ରା ସାମଲ ସୂଚନା ଦେଇଛନ୍ତି। ତେବେ ଏଥିରେ ବ୍ଲକ ଲାଇନ ବିଭାଗୀୟ ଅଧିକାରୀଙ୍କ ସମେତ ସ୍ଥାନୀୟ ଜନସାଧାରଣ ଉପସ୍ଥିତ ଥିଲେ। ଏହି କାର୍ଯ୍ୟକ୍ରମକୁ ଏପିଓ ସୁମିତ୍ରା ପାଣ୍ରୀଗ୍ରାହୀ ଓ ଯୋଗାଣ ନିରୀକ୍ଷକ ସିପ୍ରା ସାମଲ ପରିଚାଳନା କରିଥିଲେ।
Popular Categories
Previous article
Next article