ଯାଜପୁରରୁ ଧରା ହେଲା କାଶ୍ମୀର ଆତଙ୍କୀ ; ନିଜକୁ କହୁଥିଲା ପିଏମଓ ଅଧିକାରୀ, ଡାକ୍ତର

ଭୁବନେଶ୍ୱର : ଯାଜପୁରରୁ ଧରା ହେଲା କାଶ୍ମୀର ଆତଙ୍କୀ। କ୍ରାଇମବ୍ରାଞ୍ଚ ଏସଟିଏଫ କବ୍‌‌ଜାରେ ଶନିବାର ଧରା ପଡିଛି କାଶ୍ମୀରର ସନ୍ଦିଗ୍ଧ ଆତଙ୍କୀ। ଯାଜପୁର ଧର୍ମଶାଳାରୁ ସୟଦ ଇଶାନ ବୁଖାରୀକୁ ଏସଟିଏଫ ଗିରଫ କରିଛି। ଠକେଇ ଓ ଦେଶ ବିରୋଧୀ ତତ୍ତ୍ୱ ସହ ଲିଙ୍କ୍‌‌ ଅଭିଯୋଗରେ ଗିରଫ କରାଯାଇଛି। ଅଭିଯୁକ୍ତ ଠାରୁ ଶହେରୁ ଅଧିକ ଡକ୍ୟୁମେଣ୍ଟ ଜବତ କରାଯାଇଛି। ନିଜକୁ ପିଏମଓ ଅଧିକାରୀ ଓ ଏନଆଇଏ ଅଧିକାରୀଙ୍କ ନିକଟତମ, ଡ଼ାକ୍ତର ବୋଲି କହିଥିଲା ଅଭିଯୁକ୍ତ। ଏହାସହ ୬ ରୁ ୭ ଯୁବତୀଙ୍କୁ ବିବାହ କରିଥିବା ନେଇ ମଧ୍ୟ ସୂଚନା ମିଳିଛି। କାଶ୍ମୀର,ୟୁପି, ମହାରାଷ୍ଟ୍ର ଓ ଓଡିଶାର ଯୁବତୀଙ୍କୁ ବିବାହ କରିଥିଲା। ବିଭିନ୍ନ ୱେବସାଇଟ୍‌‌ ଓ ଆପ୍‌‌ରେ ମଧ୍ୟ ଯୁବତୀଙ୍କ ସହ ସମ୍ପର୍କ ରଖିଥିଲା। କେରଳର କିଛି ସନ୍ଦୀଗ୍ଧ ଓ ପାକିସ୍ତାନୀଙ୍କ ସହ ମଧ୍ୟ ଯୋଗାଯୋଗରେ ଥିଲା। ଏହାସହ ଠକେଇ ମାମଲାରେ କାଶ୍ମୀର ପୁଲିସର ୱାଣ୍ଟେଡ୍‌‌ ତାଲିକାରେ ଥିଲା। ସନ୍ଦିଗ୍ଧ ଯୁବକ ନିକଟରୁ ବହୁ ପରିମାଣର ଜାଲ୍‌‌ ଡକ୍ୟୁମେଣ୍ଟ ଜବତ କରାଯାଇଛି। ଏହାସହ ବିଦେଶୀ ମେଡିକାଲ ଡିଗ୍ରୀ ସାର୍ଟିଫିକେଟ୍‌‌, ଆଫିଡେଭିଟ୍‌‌ ଓ ପରିଚୟ ପତ୍ର ମଧ୍ୟ ଜବତ ହୋଇଛି।
ଏସଟିଏଫ ଦ୍ୱାରା ଗିରଫ ଯୁବକଙ୍କୁ ନେଇ କ୍ରାଇମବ୍ରାଞ୍ଚ ଆଇଜି ଶନିବାର ସାମ୍ବାଦିକ ସମ୍ମିଳନୀ କରିଛନ୍ତି। ଗିରଫ ବୁଖାରୀର ଆତଙ୍କୀ ଲିଙ୍କ୍‌‌ ନେଇ ଯାଞ୍ଚ ଚାଲିଛି ବୋଲି ଆଇଜି କହିଛନ୍ତି। ୭ ଦିନ ପାଇଁ ରିମାଣ୍ଡରେ ନେଇ ପଚରାଉଚରା କରାଯିବ ବୋଲି ସୂଚନା ମିଳିଛି।