ତାମିଲନାଡୁ ମନ୍ତ୍ରୀଙ୍କ ଘରେ ଆୟକର ଚଢ଼ାଉ; ସାମିଲ ହୋଇଛନ୍ତି ୩୫୦ ଅଧିକାରୀ
ତାମିଲନାଡୁ: ତାମିଲନାଡୁର ମନ୍ତ୍ରୀ କେ. ସି. ବୀରାମଣି ଏବଂ ତାଙ୍କ ସମ୍ପର୍କୀୟଙ୍କ ଘରେ ଆୟକର(ଆଇଟି) ବିଭାଗ ପକ୍ଷରୁ ଚଢ଼ାଉ କରାଯାଇଛି। ଟିକସ ଫାଙ୍କିବା ଏବଂ ଆର୍ଥିକ ଅନିୟମିତତା ଅଭିଯୋଗରେ ଶୁକ୍ରବାର ସକାଳ ସାଢ଼େ ୬ଟାରୁ ଏହି ଚଢ଼ାଉ ଜାରି ରହିଥିବା ସୂଚନା ମିଳିଛି। ଏଥିରେ ଆୟକର ବିଭାଗର ପାଖାପାଖି ୩୫୦ ଆୟକର ଅଧିକାରୀ ସାମିଲ ହୋଇଥିବା ଜଣାପଡ଼ିଛି।
ଆୟକର ବିଭାଗର ଜଣେ ଅଧିକାରୀଙ୍କ ସୂଚନା ମୁତାବକ, ମନ୍ତ୍ରୀ ଏବଂ ତାଙ୍କ ସମ୍ପର୍କୀୟଙ୍କ ସମେତ ଚେନ୍ନାଇରେ ଥିବା ଏକ ଘରୋଇ ଦୁଗ୍ଧ କମ୍ପାନୀରେ ଏହି ଚଢ଼ାଉ ହୋଇଛି। ସନ୍ଧ୍ୟା ପର୍ଯ୍ୟନ୍ତ ଚଢ଼ାଉ ଚାଲିବ। ମନ୍ତ୍ରୀ ଏବଂ ତାଙ୍କ ସମ୍ପର୍କୀୟମାନଙ୍କ ଦ୍ବାରା ଅଧିକୃତ ରିୟଲ ଇଷ୍ଟେଟ ସଂସ୍ଥା ଟିକସ ଫାଙ୍କିଥିବା ଅଭିଯୋଗ ଆସିଥିଲା। ଭେଲୋର ସେଣ୍ଟର ଅଫ ଦ ରିୟଲ ଇଷ୍ଟେଟ ଆସୋସିଏଶନ ଅଫ ଇଣ୍ଡିଆର ଅଧ୍ୟ୪ ତଥା ରିୟଲ ଇଷ୍ଟେଟ ବ୍ୟବସାୟୀ ରାମମୂର୍ତ୍ତି ରେଡ୍ଡୀ, କେ. ଜୟପ୍ରକାଶ, ରାମ ଅଞ୍ଚାନେୟାଲୁ ଏବଂ ଏସ. ବ୍ରହ୍ମାନନ୍ଦମଙ୍କ କାର୍ଯ୍ୟାଳୟରେ ଏହି ଚଢ଼ାଉ କରାଯାଇଛି।