କାରାଗାରରେ ‘ଜୟ ଶ୍ରୀ ରାମ’ ଉଚ୍ଚାରଣ ପାଇଁ ବାଧ୍ୟ କରାଯାଉଛି

ନୂଆଦିଲ୍ଲୀ: ତିହାର ଜେଲରେ ବନ୍ଦୀ ଥିବା ସମୟରେ ତାଙ୍କୁ ‘ଜୟ ଶ୍ରୀ ରାମ’ ଉଚ୍ଚାରଣ କରିବାକୁ ବାଧ୍ୟ କରାଯାଉଛି। ଏଭଳି ଏକ ଅଭିଯୋଗ ଆଣିଛନ୍ତି ତିହାରରେ ବନ୍ଦୀ ଥିବା ଜଣେ ଆଇଏସଆଇଏସ୍‍ ସଦସ୍ୟ। ସୂଚନାଯୋଗ୍ୟ ଯେ ଦେଶର ବିଭିନ୍ନ ସ୍ଥାନରେ ବୋମା ବିସ୍ଫୋରଣ ସହିତ ଆତ୍ମଘାତୀ ଆକ୍ରମଣ ଯୋଜନା କରୁଥିବା ଅଭିଯୋଗରେ ରଶିତ ଜାଫର ନାମକ ଏହି ବ୍ୟକ୍ତିଜଣକ ୨୦୧୮ରେ ଗିରଫ ହୋଇଥିଲେ। ଆଇଏସଆଇଏସ୍‍ ଆତଙ୍କବାଦୀ ଗୋଷ୍ଠୀ ସହିତ ତାଙ୍କର ସମ୍ପର୍କ ଥିବା ଏବଂ ସେ ରାଜନୈତିକ ବ୍ୟକ୍ତିବିଶେଷ ଏବଂ ସରକାରୀ ସ୍ଥଳ ଆଦିକୁ ନିଜର ଲକ୍ଷ୍ୟ ବନାଇବା ଅଭିଯୋଗରେ ଏନଆଇଏ ତାଙ୍କୁ ଏବଂ ଅନ୍ୟ ୯ ଜଣଙ୍କୁ ଗିରଫ କରିଥିଲା। ତାଙ୍କଠାରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ମଧ୍ୟ ଜବତ ହୋଇଥିଲା। ସେବେଠାରୁ ସେ ତିହାରରେ ରହିଛନ୍ତି। ତାଙ୍କ ଓକିଲ ଏମ ଏସ ଖାଁ ଅଦାଲତରେ କହିଥିଲେ ଯେ ତାଙ୍କ ମହକିଲଙ୍କୁ କାରାଗାର ମଧ୍ୟରେର ‘ଜୟ ଶ୍ରୀ ରାମ’ ଉଚ୍ଚାରଣ କରିବାକୁ ତାଙ୍କ ସହିତ ଥିବା ଅନ୍ୟ ଅନ୍ତେବାସୀ ବାଧ୍ୟ କରୁଛନ୍ତି। ତାହା ନକଲେ ସେମାନେ ତାଙ୍କୁ ମାଡ ମାରୁଛନ୍ତି।