ସମାଜ ଡିଜିଟାଲ ଡେସ୍କ: ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧରେ ପ୍ରାୟ ୩୬,୦୦୦ ଭାରତୀୟ ଫସି ରହିଛନ୍ତି । ସେମାନଙ୍କ ମଧ୍ୟରୁ ପ୍ରାୟ ୧୫୦୦ ଛାତ୍ର ଅଛନ୍ତି । ଇରାନରେ ଇସ୍ରାଏଲୀ ଆକ୍ରମଣରୁ ନିଜକୁ ରକ୍ଷା କରିବା ପାଇଁ ଅନେକ ଛାତ୍ର ବେସମେଣ୍ଟରେ ରହୁଛନ୍ତି । ଇରାନରେ ଏବେ ଶହ ଶହ ଭାରତୀୟ ଡାକ୍ତରୀ ଛାତ୍ର ଅଛନ୍ତି, ଯେଉଁମାନେ ବହୁତ ବିଳମ୍ବ ହେବା ପୂର୍ବରୁ ସେମାନଙ୍କୁ ସେଠାରୁ ସ୍ଥାନାନ୍ତର କରିବାକୁ ଭାରତ ସରକାରଙ୍କୁ ନିବେଦନ କରିଛନ୍ତି । ତେହେରାନର ସହିଦ ବେହେସ୍ତି ବିଶ୍ୱବିଦ୍ୟାଳୟରେ ପଢୁଥିବା ଜଣେ ଛାତ୍ର ଜାତୀୟ ଗଣମାଧ୍ୟମକୁ କହିଛନ୍ତି ଯେ ‘ଆମେ ଶୁକ୍ରବାର ରାତି ୨ଟା ୩୦ମିନିଟରେ ଜୋରରେ ବିସ୍ଫୋରଣର ଶଦ୍ଦ ଶୁଣି ଡରିଗଲୁ । ସେବେଠାରୁ ଆମେ ଏପର୍ଯ୍ୟନ୍ତ ଶୋଇନାହୁଁ ।
ଯୁଦ୍ଧରେ ଫସି ରହିଥିବା ଭାରତୀୟ ଛାତ୍ରମାନଙ୍କ ସୁରକ୍ଷା ପାଇଁ ସେମାନଙ୍କ ସହିତ ଯୋଗାଯୋଗ କରାଯାଉଛି । ଏହି ସମୟରେ ତେହେରାନର ଜଣେ ଛାତ୍ର ତାଙ୍କ ସହିତ ଫସି ରହିଥିବା ଅନେକଙ୍କ ସମ୍ପର୍କରେ ଏଭଳି ସୂଚନା ଦେଇଛନ୍ତି । ଇରାନରେ ଇସ୍ରାଏଲ ଆକ୍ରମଣକୁ ତୀବ୍ର କରିବାରେ ଲାଗିଛି । ଛାତ୍ର ମାନେ ରହୁଥିବା ହଷ୍ଟେଲ ଓ ଆପାର୍ଟମେଣ୍ଟରୁ ମାତ୍ର କିଛି କିଲୋମିଟର ଦୂରରେ ବିସ୍ଫୋରଣ ହେବା ଫଳରେ ପ୍ରଚଣ୍ଡ ଶଦ୍ଦ ଯୋଗୁଁ ଭୟର ବାତାବରଣ ଲାଗି ରହିଛି ।
ଇିଶ୍ୱବିଦ୍ୟାଳୟର ଛାତ୍ର ଜଣଙ୍କ କହିଛନ୍ତି ଯେ ଏହି ବିଶ୍ୱବିଦ୍ୟାଳୟରେ ୩୫୦ରୁ ଅଧିକ ଭାରତୀୟ ଛାତ୍ର ନାମ ଲେଖାଇଛନ୍ତି । ଆମେ ରହୁଥିବା ଆପର୍ଟମେଣ୍ଟର ବେସମେଣ୍ଟରେ ଫସି ରହିଛୁ । ପ୍ରତିଦିନ ରାତିରେ ଆମେ ବିସ୍ଫୋରଣର ଶଦ୍ଦ ଶୁଣୁଛୁ । ଆମେ ତିନି ଦିନ ଧରି ଶୋଇ ନାହୁଁ । ବୋମା ବିସ୍ଫୋରଣ ଯୋଗୁ କ୍ଲାସ ମଧ୍ୟ ବନ୍ଦ ରହିଛି । କିଛି ବଡ ଅଘଟଣା ଘଟିବା ପୂର୍ବରୁ ଆମକୁ ଏଠାରୁ ସ୍ଥାନାନ୍ତର କରିବାକୁ ଭାରତ ସରକାରଙ୍କୁ ନିବେଦନ କରୁଛୁ ।
