ଇନ୍ଦୋର : ଦୀପାବଳିରେ ଇନ୍ଦୋରର ଏକ ସୁନା ଦୋକାନକୁ ଗହଣା କିଣିବାକୁ ଯାଇଥିବା ଗ୍ରାହକମାନେ ଏବେ ଚିନ୍ତାରେ । ଗୋଟିଏ ସୁନା ଦୋକାନର ୩୧ ଜଣ କର୍ମଚାରୀ କରୋନା ପଜିଟିଭ୍ ଜଣା ପଡ଼ିବା ପରେ ଇନ୍ଦୋରରେ ଆଲୋଡ଼ନ ସୃଷ୍ଟି ହୋଇଛି । ଯେଉଁମାନେ ଦୀପାବଳି ଓ ଧନତେରସରେ ଏହି ଦୋକାନକୁ ଗହଣା କିଣିବାକୁ ଯାଇଥିଲେ ସେମାନଙ୍କ ନାଁ ଠିକଣା ଏବେ ଖୋଜା ଚାଲିଛି । ସେମାନଙ୍କର କରୋନା ଯାଞ୍ଚ ହେବ ବୋଲି ପ୍ରଶାସନ କହିଛି ଏବଂ ଯେଉଁମାନେ ଦୋକାନକୁ ଯାଇଥିଲେ ସେମାନେ ଅନ୍ୟମାନଙ୍କ ସହ ମିଳାମିଶା ନ କରି ସ୍ବତଃପ୍ରବୃତ୍ତ ଭାବରେ କ୍ବାରେଣ୍ଟାଇନରେ ରହିବାକୁ ପ୍ରଶାସନ ପରାମର୍ଶ ଦେଇଛି । ରାଜ୍ୟ ସ୍ବାସ୍ଥ୍ୟ ବିଭାଗର ଜଣେ ଅଧିକାରୀ ଏ ସମ୍ପର୍କରେ ସୂଚନା ଦେଇଛନ୍ତି ।
ବୁଧବାର ସ୍ବାସ୍ଥ୍ୟ ବିଭାଗର ଜଣେ ଅଧିକାରୀ ଅନୀଲ ଡ଼ୋଗ୍ରେ ଦେଇଥିବା ସୂଚନା ଅନୁସାରେ ମଙ୍ଗଳବାର ଦିନ ସହରର ଏମଜି ରୋଡରେ ଥିବା ଏକ ଅଳଙ୍କାର ଦୋକାନର ମୋଟ୭୨ କର୍ମଚାରୀଙ୍କ ନମୁନା ସଂଗ୍ରହ କରାଯାଇଛି। ଏଥିମଧ୍ୟରୁ ୩୧ଜଣ କରୋନା ଜୀବାଣୁ ହୋଇଥିବା ଜଣାପଡିଛି। ମୁଖ୍ୟ ଚିକିତ୍ସା ଏବଂ ସ୍ୱାସ୍ଥ୍ୟ ଅଧିକାରୀ (ସିଏମଏଚଓ) ପ୍ରବୀଣ ଜାଦିଆ କହିଛନ୍ତି ଯେ ଅଳଙ୍କାର ଦୋକାନକୁ ସଂକ୍ରମଣମୁକ୍ତ କରାଯାଉଛି। ଆହୁରି ମଧ୍ୟ ଏଠାରେ ଦୀପାବଳି ଓ ଧନତେରସରେ କିଣାବିକା କରିଥିବା ଗ୍ରାହକମାନଙ୍କୁ ଖୋଜାଯାଉଛି | ସେ କହିଛନ୍ତି ଯେ ଯଦି ଏହି ଗ୍ରାହକମାନଙ୍କରେ କୋଭିଡ -19 ର ଲକ୍ଷଣ ଦେଖାଯାଏ, ତେବେ ଆମେ ସେମାନଙ୍କୁ ଯାଞ୍ଚ କରିବୁ। ଏଠାରେ ଉଲ୍ଲେଖଯୋଗ୍ୟ ଯେ ମଧ୍ୟପ୍ରଦେଶରେ ଇନ୍ଦୋର ସବୁଠାରୁ ଅଧିକ କରୋନା ପ୍ରଭାବିତ ଜିଲ୍ଲା | ସରକାରୀ ସୂଚନା ଅନୁଯାୟୀ ଏହି ଜିଲାରେ ୩୬ ହଜାର ସଂକ୍ରମିତ ଚିହ୍ନଟ ହୋଇଛନ୍ତି ଓ ୭୧୯ ଜଣ ମୃତ୍ୟୁବରଣ କରିଛନ୍ତି ।
Comments are closed.