ନୂଆଦିଲ୍ଲୀ: ପୂର୍ବ ଲାଦାଖର ଗଲୱାନ ଘାଟିରେ ଜୁନ୍ ୧୫ ତାରିଖରେ ଚୀନ ସହ ହିଂସ୍ର ଲଢ଼େଇ ପରେ ଭାରତ ଅତ୍ୟନ୍ତ ଗୋପନରେ ଆରମ୍ଭ କରିଛି ନିଜ ଅଭିଯାନ । ଚୀନ ଦାବି କରୁଥିବା ଦକ୍ଷିଣ ଚୀନ ସାଗରରେ ଭାରତୀୟ ନୌସେନାର ଅଗ୍ରଣୀ ଯୁଦ୍ଧପୋତ ପହଞ୍ଚି ସାରିଛି । ଭାରତୀୟ ନୌସେନା ଏପରି ସତର୍କତାର ସହ ଏପରି ପଦକ୍ଷେପ ନେଇଛି ଯେ ଅନ୍ୟ ଦେଶ ତ ଅଲଗା କଥା, ଚୀନ ମଧ୍ୟ ଏହାର ସୁରାଗ ପାଇନାହିଁ । ଯେତେବେଳେ ଚୀନ ଏହି ସୂଚନା ପାଇଲା ସେତେବେଳେ ଏହାକୁ ନେି ଆପତ୍ତି ଉଠାଇଛି । ଦକ୍ଷିଣ ଚୀନ ସାଗର ଉପରେ ଚୀନ ସର୍ବଦା ନିଜର ଆଧିପତ୍ୟ ଜାହିର କରୁଥିଲେ ହେଁ ବିଶ୍ବ ସମୁଦାୟ ଏହାକୁ ମାନିବାକୁ ପ୍ରସ୍ତୁତ ନୁହେଁ ।
୨୦୦୯ ମସିହାରୁ ଦକ୍ଷିଣ ଚୀନ ସାଗରରେ ଚୀନ କୃତ୍ରିମ ଦ୍ବୀପ ନିର୍ମାଣ କରି ସେଠାରେ ନିଜର ସେନା ମୁତୟନ କରିଛି । ଏଏନଆଇ ସୂତ୍ରରୁ ମିଳିଥିବା ସୂଚନା ଅନୁସାରେ ଗଲୱାନ ସଂଘର୍ଷରେ ଭାରତର ୨୦ ସେନା ମୃତ୍ୟୁ ପରେ ଭାରତୀୟ ନୌସେନା ତୁରନ୍ତ ନିଜର ଏକ ଯୁଦ୍ଧପୋତ ଦକ୍ଷିଣ ଚୀନ ସାଗରରେ ମୁତୟନ କରିଛି । ଯେଉଁଠି ଚୀନର ପିପୁଲ୍ସ ଲିବରେସନ ଆର୍ମୀର ନୌସେନା ନିଜର ଅଧିକାର ସାବ୍ୟସ୍ତ କରି ଆସୁଥିଲେ ଓ ଅନ୍ୟ କୌଣସି ଦେଶର ନୌସେନା ବା ଯୁଦ୍ଧଜାହାଜର ଉପସ୍ଥିତିକୁ ଗ୍ରହଣ କରିବାକୁ ପ୍ରସ୍ତୁତ ନ ଥିଲେ ସେଠାରେ ଚୀନର ଏକ ଅଗ୍ରଣୀ ଓ ଅତ୍ୟାଧୁନିକ ଯୁଦ୍ଧପୋତ ଡ଼େରାପକାଇଛି । ଏବେ ଚୀନ ଏହାକୁ ନେଇ ଆପତ୍ତି ଉଠାଇଛି ।
ଏହି ସୂତ୍ରରୁ ମିଳିଥିବା ସୂଚନା ଅନୁସାରେ ଭାରତୀୟ ନୌସେନାର ଯୁଦ୍ଧପୋତ ମୁତୟନ ଚୀନକୁ ବିଚଳିତ କରିଛି ଏବଂ ଏହାପରେ ଚୀନ କଥାବାର୍ତା ପାଇଁ ଆଗ୍ରହ ପ୍ରକାଶ କରିଛି । ରାଜନୈତିକସ୍ତରରେ ଭାରତ ସହ ଆଲୋଚନା କାଳରେ ଚୀନ ଏହି ପ୍ରସଙ୍ଗ ଉଠାଇ ଦକ୍ଷିଣ ଚୀନ ସାଗରରେ ଭାରତୀୟ ଯୁଦ୍ଧପୋତର ଉପସ୍ଥିତିକୁ ନେଇ ଆପତ୍ତି ଉଠାଇଛି । ଇତିମଧ୍ୟରେ ଦକ୍ଷିଣ ଚୀନ ସାଗରରେ ଆମେରିକା ନୌସେନା ମଧ୍ୟ ନିଜର ଡ଼େରା ଜମାଇଛି । ଆମେରିକା ନୌସେନାର ବିଧ୍ବଂସକ ଫ୍ରିଜେଟ୍ ଯୁଦ୍ଧ ଜାହାଜ ମୁତୟନ ସହ ଭାରତୀୟ ଯୁଦ୍ଧପୋତ ସହ ନିୟମିତ ବାର୍ତା ବିନିମୟ କରୁଛି । ଭାରତୀୟ ଯୁଦ୍ଧପୋତ ନିମନ୍ତେ କୌଣସି ବିପଦ ଆସିଲେ ଆମେରିକା ଯୁଦ୍ଧପୋତ ତୁରନ୍ତ ସହାୟତା ଦେବା ନିମନ୍ତେ ମଧ୍ୟ ପ୍ରତିଶ୍ରୁତି ଦେଇଛି ।
