ନ୍ୟୁୟର୍କ: ଭାରତ ବୁଧବାର ୮ମ ଥର ଲାଗି ଜାତିସଂଘ ସୁରକ୍ଷା ପରିଷଦ(ୟୁଏନଏସସି)ର ଅସ୍ଥାୟୀ ସଦସ୍ୟ ହେବାକୁ ଯାଉଛି। ଅସ୍ଥାୟୀ ସଦସ୍ୟ ଭାବେ ଭାରତର କାର୍ଯ୍ୟକାଳ ୨୦୨୧-୨୨ ପର୍ଯ୍ୟନ୍ତ ରହିବ। ୧୯୩ ସଦସ୍ୟ ବିଶିଷ୍ଟ ଜାତିସଂଘ ସାଧାରଣ ସଭା ଏହାର ୭୫ତମ ଅଧିବେଶନ ପାଇଁ ଅଧ୍ୟକ୍ଷ, ସୁରକ୍ଷା ପରିଷଦର ଅସ୍ଥାୟୀ ସଦସ୍ୟ ଏବଂ ଆର୍ଥିକ ଓ ସାମାଜିକ ପରିଷଦ ସଦସ୍ୟମାନଙ୍କ ଲାଗି ନିର୍ବାଚନ କରିବ।
ଅନ୍ୟପଟେ ପାକିସ୍ତାନ ଏହାକୁ ନେଇ ଗଭୀର ଚିନ୍ତାବ୍ୟକ୍ତ କରିଛି। ପାକିସ୍ତାନ କହିଛି ଯେ, ଏହା ଆମ ପାଇଁ ଖୁସି ନୁହେଁ, ବରଂ ଚିନ୍ତାର ବିଷୟ। ପାକିସ୍ତାନ ବିଦେଶ ମନ୍ତ୍ରୀ ଶାହ ମହମ୍ମଦ କୁରେଶୀ କହିଛନ୍ତି ଯେ, ଭାରତ ୟୁଏନଏସସିର ଅସ୍ଥାୟୀ ସଦସ୍ୟ ହେଲେ ଏହା ପାକିସ୍ତାନ ପାଇଁ ଚିନ୍ତାର ବିଷୟ ହେବ। ଭାରତ ସର୍ବଦା ଏଠାରେ ଉଠାଯାଉଥିବା ପ୍ରସଙ୍ଗଗୁଡ଼ିକୁ ଖାରଜ କରିଦେଉଛି, ବିଶେଷ କରି କାଶ୍ମୀର ପ୍ରସଙ୍ଗକୁ ଭାରତ ଖାରଜ କରିଆସୁଛି। ସୂଚନା ଅନୁସାରେ, କରୋନା ଭୂତାଣୁ ଯୋଗୁ ଲାଗୁ ହୋଇଥିବା କିଛି କଟକଣା ଯୋଗୁ ଜାତିସଂଘ ମୁଖ୍ୟାଳୟରେ ମତଦାନ ଲାଗି ସ୍ବତନ୍ତ୍ର ବ୍ୟବସ୍ଥା କରାଯାଇଛି।
