ସାମସଙ୍ଗ, ଆପଲ୍, ଡ଼ିକ୍ସନ, ଲାଭା ଆଦି କମ୍ପାନୀ ନିମନ୍ତେ ଠିକାରେ କାମ କରୁଥିବା କିଛି ଭାରତୀୟ କମ୍ପାନୀ ସହ ବିଦେଶର ୨୨ କମ୍ପାନୀ ଭାରତରେ ମୋବାଇଲ କାରଖାନା ବସାଇବାକୁ ଆଗ୍ରହ ପ୍ରକାଶ କରିଛନ୍ତି । ଏଥିଲାଗି ସେମାନେ କେନ୍ଦ୍ର ସରକାରଙ୍କ ନିକଟରେ ଆବେଦନ କରିଛନ୍ତି ଓ ଏହି କମ୍ପାନୀଗୁଡ଼ିକ ଆଗାମୀ ୫ ବର୍ଷରେ ୧୧ ଲକ୍ଷ କୋଟି ଟଙ୍କା ନିବେଶ କରିବେ ।
କେନ୍ଦ୍ର ଦୂରସଞ୍ଚାର ମନ୍ତ୍ରୀ ରବିଶଙ୍କର ପ୍ରସାଦଙ୍କ ସୂଚନା ଅନୁସାରେ କେନ୍ଦ୍ର ସରକାର ଉତ୍ପାଦନ ସମ୍ବନ୍ଧୀୟ ପ୍ରୋତ୍ସାହନ ଯୋଜନା ନିମନ୍ତେ ୪୧୦୦୦ କୋଟି ଟଙ୍କା ପ୍ରଦାନ କରିବାକୁ ଯୋଜନା କରିଛନ୍ତି । ଏହାଦ୍ବାରା ଦେଶରେ ୧୨ ଲକ୍ଷ ଲୋକ ଲାଭାନ୍ବିତ ହେବେ । ବିଭିନ୍ନ କମ୍ପାନୀଗୁଡ଼ିକରେ ପ୍ରାୟ ୩ ଲକ୍ଷ ପ୍ରତ୍ୟକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ । ତାଇୱାନ, ଦକ୍ଷିଣ କୋରିଆ, ଜର୍ମାନୀ, ଅଷ୍ଟ୍ରିଆ ପରି ଦେଶର କମ୍ପାନୀଗୁଡ଼ିକ ଏଥିପାଇଁ ଆଗ୍ରହ ପ୍ରକାଶ କରିଛନ୍ତି ଓ ଏହା ସରକାରଙ୍କ ବିଚାରାଧୀନ ରହିଛି ବୋଲି ଶ୍ରୀ ପ୍ରସାଦ କହିଛନ୍ତି ।
Under the Production-Linked Incentive Scheme, around 22 companies have applied. These companies will produce mobile phone & components in India worth Rs 11.5 lakh crores in the coming 5 yrs out of which products worth Rs 7 lakh crores will be exported: Union Minister RS Prasad pic.twitter.com/YXoi7lzXOC
— ANI (@ANI) August 1, 2020
ଶ୍ରୀ ପ୍ରସାଦ କହିଛନ୍ତି ଯେ ଏହି ଯୋଜନାରେ ସାମସଙ୍ଗ, ଫକ୍ସଫୋନ, ହୋନହୈଇ, ରାଇଜିଂ ଷ୍ଟାର, ବିଷ୍ଟ୍ରନ, ପେଗାଟ୍ରନ୍ ସାମିଲ ଅଛନ୍ତି । ଫକ୍ସଫୋନ, ହୋନହୈଇ, ବିଷ୍ଟ୍ରନ ଓ ପେଗାଟ୍ରନ୍ କମ୍ପାନୀଗୁଡ଼ିକ ଆପଲ୍ ନିମନ୍ତେ ମୋବାଇଲ ନିର୍ମାଣ କରିଥାଆନ୍ତି । ଏଥିନିମନ୍ତେ ବିଦେଶୀ କମ୍ପାନୀଗୁଡ଼ିକୁ ୧୫୦୦୦ କିମ୍ବା ତାହାଠୁ ଅଧିକ ମୂଲ୍ୟର ମୋବାଇଲ ନିର୍ମାଣ ସର୍ତ ରହିଛି । ଭାରତୀୟ ମୋବାଇଲ କମ୍ପାନୀଗୁଡ଼ିକ ନିମନ୍ତେ କୌଣସି ସର୍ତ ନାହିଁ । ଏହାଫଳରେ ଭାରତୀୟ ମୋବାଇଲ କମ୍ପାନୀ କମ୍ ମୂଲ୍ୟର ମୋବାଇଲ ଉତ୍ପାଦନ କରି ବଜାର ଦଖଲ କରିପାରିବେ । ସମ୍ପ୍ରତି ସାରା ବିଶ୍ଵର ମୋବାଇଲ ବଜାର ଆପଲ ୩୭% ଅଧିକାର କରିଥିବାବେଳେ ସାମସଙ୍ଗ ପ୍ରାୟ ୨୨% ଦଖଲ କରିଛି ।
ଶ୍ରୀ ପ୍ରସାଦ ପୁଣି କହିଛନ୍ତି ଯେ ଲାଭା, ଡ଼ିକ୍ସନ, ଟେକନୋଜିସ, ମାଇକ୍ରୋମ୍ୟାକ୍ସ, ପେଜେଟ ଇଲେକ୍ଟେ୍ରାନିକ୍ସ, ସୋଜୋ , ଅପ୍ଟିମସ ଆଦି ଭାରତୀୟ କମ୍ପାନୀ ମଧ୍ୟ ପିଏଲ୍ଆଇ ନିମନ୍ତେ ଆବେଦନ କରିଛନ୍ତି । ଏଥିପାଇଁ ପ୍ରାୟ ୪୫୦୦୦ କୋଟି ଟଙ୍କାର ପ୍ରସ୍ତାବ ରହିଛି । ଆବେଦନ କରିଥିବା ପ୍ରମୁଖ କମ୍ପାନୀ ମଧ୍ୟରେ କୌଣସି ଚୀନ କମ୍ପାନୀ ନାହାନ୍ତି । ଭାରତ କୌଣସି ବିଦେଶୀ କମ୍ପାନୀର ନିବେଶକୁ ବିରୋଧ କରୁନାହିଁ, କିନ୍ତୁ ଏହି କମ୍ପାନୀଗୁଡ଼ିକୁ ଭାରତ ସରକାରଙ୍କ ସୁରକ୍ଷା ନିୟମର ଅନୁପାଳନ କରିବାକୁ ହେବ ବୋଲି ସେ ସ୍ପଷ୍ଟ କରିଛନ୍ତି ।
