ନୂଆଦିଲ୍ଲୀ: ଜାତିସଂଘ କଟକଣା କମିଟି ଅନୁସାରେ ମାସୁଦ ଅଜହରକୁ ଆର୍ନ୍ତଜାତିକ ଆତଙ୍କବାଦୀ ଘୋଷଣା କରିବା ପାଇଁ ଭାରତକୁ ଅନେକ ଦେଶରୁ ଅଭୂତପୂର୍ବ ସମର୍ଥନ ମିଳୁଛି। ବୈଦେଶିକ ମନ୍ତ୍ରୀ ସୁଷମା ସ୍ୱରାଜ ଟୁଇଟ୍ କରି କହିଛନ୍ତି, ଚଳିତବର୍ଷ ଆମେରିକା, ଫ୍ରାନ୍ସ ଓ ବ୍ରିଟେନ୍ ଏଥିପାଇଁ ପ୍ରସ୍ତାବ ଆଗତ କରିଥିଲେ ଓ ଜାତିସଂଘ ନିରାପତ୍ତା ପରିଷଦର ୧୫ଟି ସଦସ୍ୟ ରାଷ୍ଟ୍ରମଧ୍ୟରୁ ୧୪ଟି ରାଷ୍ଟ୍ର ଏହାକୁ ସମର୍ଥନ କରିଥିଲେ। ତା’ଛଡା ଅଷ୍ଟ୍ରେଲିଆ, ବାଂଗଲାଦେଶ, ଇଟାଲୀ ଓ ଜାପାନ ଭଳି ନିରାପତ୍ତା ପରିଷଦର ସଦସ୍ୟ ନ ଥିବା ରାଷ୍ଟ୍ରମାନେ ମଧ୍ୟ ପ୍ରସ୍ତାବକୁ ସମର୍ଥନ କରିଥିଲେ।
ଫ୍ରାନ୍ସ ପକ୍ଷରୁ ମାସୁଦର ସମ୍ପତ୍ତି ବାଜ୍ୟାପ୍ତି ଖବର ଆସିବା ପରେ ସେ କହିଛନ୍ତି, ମାସୁଦଙ୍କୁ ଆର୍ନ୍ତଜାତିକ ଆତଙ୍କବାଦୀ ଘୋଷଣା କରିବା ପାଇଁ ଜାତିସଂଘରେ ୪ଥର ପ୍ରସ୍ତାବ ଆଗତ ହୋଇଛି। ୨୦୦୯ ମସିହାରେ ୟୁପିଏ ସରକାରଙ୍କ ଶାସନ କାଳରେ କେବଳ ଭାରତ ପ୍ରସ୍ତାବ ଆଗତ କରିଥିଲା। କିନ୍ତୁ ୨୦୧୬ରେ ଭାରତର ପ୍ରସ୍ତାବକୁ ଆମେରିକା, ଫ୍ରାନ୍ସ ଓ ବ୍ରିଟେନ ସମର୍ଥନ କରିଥିଲେ। ଶ୍ରୀମତୀ ସ୍ୱରାଜ କହିଛନ୍ତି ୨୦୧୭ରେ ଆମେରିକା, ବ୍ରିଟେନ ଓ ଫ୍ରାନ୍ସ ସ୍ୱୟଂ ପ୍ରସ୍ତାବ ଆଗତ କରିଛନ୍ତି।