ନୂଆଦିଲ୍ଲୀ : ଯୁଦ୍ଧ ପ୍ରଭାବିତ ପାଲେଷ୍ଟାଇନକୁ ଭାରତ ସରକାର ୩୦ଟନ ଡାକ୍ତରୀ ସାମଗ୍ରୀ ପଠାଇଛନ୍ତି। ପଠାଯାଇଥିବା ଡାକ୍ତରୀ ସାମଗ୍ରୀ ମଧ୍ୟରେ ଅପରେସନ ପାଇଁ ଆବଶ୍ୟକ ଜିନିଷପତ୍ର, ଦାନ୍ତ ଚିକିତ୍ସା, କ୍ୟାନସର ଓ ଜୀବନ ରକ୍ଷାକାରୀ ଔଷଧ ରହିଛି। ଏହା ସହିତ ଉଚ୍ଚ ପୁଷ୍ଟିଯୁକ୍ତ ବିସ୍କୁଟ ପଠାଯାଇଛି। ଏହି ଅବସରରେ ବୈଦେଶିକ ମନ୍ତ୍ରଣାଳୟ ମୁଖପାତ୍ର ରଣଧୀର ଜୟସ୍ବାଲ କହିଛନ୍ତି ଯେ ପାଲେଷ୍ଟାଇନ ନାଗରିକଙ୍କ ପ୍ରତି ଭାରତର ସହାୟତା ଜାରି ରହିବ। ପାଲେଷ୍ଟାଇନ ନାଗରିକଙ୍କ ପାଇଁ ଜାତିସଂଘ ରିଲିଫ୍ ଆଣ୍ଡ ୱାର୍କସ ଏଜେନ୍ସି (ୟୁଏନଆରଡବ୍ଲ୍ୟୁଏ) ମାଧ୍ୟମରେ ଭାରତ ଏହି ସହାୟତା ପଠାଇଛି। ଗତ ଜୁଲାଇରେ ମଧ୍ୟ ଭାରତ ସରକାର ୟୁଏନଆରଡବ୍ଲ୍ୟୁଏ ମାଧ୍ୟମରେ ପାଲେଷ୍ଟାଇନକୁ ୨୫ଲକ୍ଷ ଡଲାର ସହାୟତା ପ୍ରଦାନ କରିଥିଲେ। ପାଲେଷ୍ଟାଇନର ଗାଜା ଉପରେ ଇସ୍ରାଏଲ ଚଳାଇଥିବା ଯୁଦ୍ଧର ଶାନ୍ତିପୂର୍ଣ୍ଣ ସମାଧାନ ଲାଗି ଭାରତ ନିବେଦନ କରିଆସୁଛି। ଇସ୍ରାଏଲର ଆକ୍ରମଣ ଯୋଗୁଁ ଗାଜାରେ ଯେଉଁ ପରିସ୍ଥିତି ସୃଷ୍ଟି ହୋଇଛି ସେଥିଲାଗି ଭାରତ ଉଦ୍ବେଗ ପ୍ରକାଶ କରିଛି। ସେହିପରି ଗତବର୍ଷ ଅକ୍ଟୋବର ୭ରେ ହମାସ ଆତଙ୍କବାଦୀମାନେ ଇସ୍ରାଏଲ ଉପରେ ଯେଉଁ ଆକ୍ରମଣ କରିଥିଲା ତାକୁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଥମେ ନିନ୍ଦା କରିଥିଲେ।
Comments are closed.