ନୂଆଦିଲ୍ଲୀ: ନିକଟରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ଆମେରିକା ଗସ୍ତ କରିଥିଲେ। ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହିତ ଆଲୋଚନା କରିବା ଅବସରରେ ଟ୍ରମ୍ପ ପାକିସ୍ତାନକୁ ସାମରିକ ସହାୟତା ଯୋଗାଇଦେବାକୁ ନିଷ୍ପତ୍ତି ନେଇଥିଲେ। ପାକିସ୍ତାନର ଏଫ-୧୬ ଯୁଦ୍ଧ ବିମାନ ପାଇଁ ବୈଷୟିକ ସହାୟତା ଲାଗି ୬୭୦ କୋଟି ଟଙ୍କା ମଞ୍ଜୁର କରିଥିଲା। ତେବେ ଏହାକୁ ଭାରତ ପକ୍ଷରୁ ବିରୋଧ କରାଯାଇଛି। ଭାରତ ଆମେରିକାର ଏହି ନିଷ୍ପତ୍ତିକୁ ନେଇ ଗମ୍ଭୀର ଚିନ୍ତା ବ୍ୟକ୍ତ କରିବା ସହିତ ଏ ନେଇ ଆମେରିକାକୁ ଅବଗତ କରାଇଛି। ବିଦେଶ ମନ୍ତ୍ରଣାଳୟର ଅଧିକାରୀଙ୍କ ସୂଚନା ଅନୁସାରେ ଭାରତ ନୂଆଦିଲ୍ଲୀରେ ଅବସ୍ଥାପିତ ଆମେରିକା ରାଷ୍ଟ୍ରଦୂତଙ୍କ ନିକଟରେ ଏହି ପ୍ରସଙ୍ଗ ଉଠାଇଛି।
ଗୁରୁବାର ବିଦେଶ ମନ୍ତ୍ରଣାଳୟ ମୁଖପାତ୍ର ରବୀଶ କୁମାର କହିଛନ୍ତି, ଦିଲ୍ଲୀରେ ଏହି ମାମଲାକୁ ଆମେରିକା ରାଷ୍ଟ୍ରଦୂତଙ୍କ ସାମନାରେ ଉପସ୍ଥାପନ କରାଯାଇଛି। ଏହାସହିତ ଭାରତୀୟ ରାଷ୍ଟ୍ରଦୂତ ହର୍ଷବର୍ଦ୍ଧନ ଶ୍ରୀଙ୍ଗଲା ୱାଶିଂଟନରେ ବି ଏହି ପ୍ରସଙ୍ଗ ଉଠାଇଛନ୍ତି। ଆମେରିକା ପାକିସ୍ତାନକୁ ଏପରି ସାମରିକ ସହାୟତା ଦେବାର ନିଷ୍ପତ୍ତି ଉପରେ ପୁନର୍ବିଚାର କରିବା ଉଚିତ। ଭାରତ ଏଥିପାଇଁ ସମସ୍ତ ପ୍ରକାର ଚାପ ପକାଇବାକୁ ଉଦ୍ୟମ ଚଳାଇଛି। ସେହିପରି ଭାରତର ବିଦେଶ ମନ୍ତ୍ରୀ ଏସ. ଜୟଶଙ୍କର ଆମେରିକାର ନିଜ ପ୍ରତିପକ୍ଷଙ୍କ ନିକଟରେ ମଧ୍ୟ ଏହି ପ୍ରସଙ୍ଗ ଉଠାଇବାର ସମ୍ଭାବନା ରହିଛି।
