ନୂଆଦିଲ୍ଲୀ : ଭାରତ ଓ ଚୀନ୍ ମଧ୍ୟରେ ବିମାନ ସେବା ଆରମ୍ଭ କରାଯିବା ଓ ପ୍ରଥମ ବ୍ୟାଚ୍ର ଭାରତୀୟ ଛାତ୍ରଛାତ୍ରୀମାନଙ୍କୁ ଶୀଘ୍ର ଚୀନ୍ ଅଣାଯିବା ପାଇଁ ଉଭୟ ଦେଶର ଉଚ୍ଚ କର୍ତ୍ତୃପକ୍ଷଙ୍କ ମଧ୍ୟରେ ବାର୍ତ୍ତାଳାପ ଜାରି ରହିଛି । ପ୍ରାୟ ୨୦ ହଜାର ଭାରତୀୟ ଛାତ୍ରଛାତ୍ରୀ ଅଧ୍ୟୟନ କରୁଥିବା ଚୀନ୍ ବିଶ୍ୱବିଦ୍ୟାଳୟ ଗୁଡ଼ିକୁ ଫେରିବାକୁ ଅପେକ୍ଷା କରି ରହିଛନ୍ତି ବୋଲି ଚୀନ୍ କହିଛି । ଦୁଇ ବର୍ଷ ପୂର୍ବେ ୟୁହାନ୍ରେ ୨୦୨୦ ମସିହାରେ କୋଭିଡ୍ ସଂକ୍ରମଣ ବୃଦ୍ଧି ପାଇବାରୁ ସେମାନେ ଭାରତ ଚାଲିଆସିଥିଲେ । ଚୀନ୍ ପକ୍ଷରୁ ଆନ୍ତର୍ଜାତିକ ଗସ୍ତ ଉପରେ କଡ଼ା କଟକଣା ଲାଗୁ କରାଯିବାରୁ ସେମାନେ ଚୀନ୍କୁ ଯାଇପାରି ନାହାନ୍ତି ।
ଚୀନ୍ ବୈଦେଶିକ ମନ୍ତ୍ରଣାଳୟ ମୁଖପାତ୍ର ୱାଙ୍ଗ୍ ୱେନ୍ବିନ୍ କହିଛନ୍ତି, ଚୀନ୍କୁ ଭାରତୀୟ ଛାତ୍ରଛାତ୍ରୀମାନଙ୍କ ଫେରିବା ବିଷୟରେ ସକାରାତ୍ମକ ଅଗ୍ରଗତି ଘଟିଛି । ଭାରତ ଓ ଚୀନ୍ ମଧ୍ୟରେ ସିଧାସଳଖ ବିମାନ ଚଳାଚଳ ପୁନର୍ବାର ଆରମ୍ଭ ହେଲେ ଯୋଗାଯୋଗ ବୃଦ୍ଧି ଓ ଉଭୟ ପକ୍ଷ ମଧ୍ୟରେ ସହଯୋଗ ପାଇଁ ଅନୁକୂଳ
ବାତାବରଣ ସୃଷ୍ଟି ହେବ । ଶୀଘ୍ର ବିମାନ ଚଳାଚଳ ଆରମ୍ଭ କରିବା ଓ ଦ୍ୱିପାକ୍ଷିୟ ଗମନାଗମନ ସୂଚାରୁରୂପେ ସମ୍ପନ୍ନ ହେବାରେ ଭାରତ ଚୀନ୍ ସହ ମିଶି କାର୍ଯ୍ୟ କରିବ ବୋଲି ସେ ଆଶା ପ୍ରକଟ କରିଛନ୍ତି ।
ସୂଚନାଯୋଗ୍ୟ, ଚୀନ୍ ରେ ଏବେ ମଧ୍ୟ ଆନ୍ତର୍ଜାତିକ ଗସ୍ତ ଉପରେ ଅନେକ କଟକଣା ବଳବତ୍ତର ରହିଛି । ବିଶେଷ କରି ଭାରତ ଓ ଚୀନ୍ ମଧ୍ୟରେ ପ୍ରତ୍ୟକ୍ଷ ବିମାନ ଚଳାଚଳ ଆରମ୍ଭ ହୋଇନାହିଁ । ୨୦ ହଜାର ଭାରତୀୟ ଛାତ୍ରଛାତ୍ରୀଙ୍କୁ ଛାତ୍ର ଭିସା ପ୍ରଦାନ ବିଷୟରେ ଚୀନ୍ ମଧ୍ୟ ଏ ପର୍ଯ୍ୟନ୍ତ କୌଣସି ଘୋଷଣା କରିନାହିଁ । ଚୀନ୍ର ବିଶ୍ୱବିଦ୍ୟାଳୟ ଗୁଡ଼ିକୁ ଫେରିବାକୁ ଚାହୁଁଥିବା ଭାରତୀୟ ଛାତ୍ରଛାତ୍ରୀମାନଙ୍କର ଏକ ତାଲିକା ଭାରତ ପକ୍ଷରୁ କିଛି ମାସ ତଳେ ଚୀନ୍କୁ ଦିଆଯାଇଥିଲା । କିନ୍ତୁ ଚୀନ୍ ପକ୍ଷରୁ ଏହା ଉପରେ କୌଣସି ଉତ୍ତର ଦିଆଯାଇ ନାହିଁ । ଇତିମଧ୍ୟରେ ଚୀନ୍ ପାକିସ୍ତାନ ଓ ଶ୍ରୀଲଙ୍କାରୁ ଅଳ୍ପ କିଛି ବ୍ୟାଚ୍ର ଛାତ୍ରଛାତ୍ରୀଙ୍କୁ ଚୀନ୍କୁ ଯିବା ପାଇଁ
ଅନୁମତି ପ୍ରଦାନ କରିଛି ।
Comments are closed.