ନୂଆଦିଲ୍ଲୀ: ସମଗ୍ର ବିଶ୍ୱରେ ବର୍ତ୍ତମାନ କୋରୋନା ସଂକଟ ଉଗ୍ରରୂପ ନେଇ ସାରିଛି। ମହାମାରୀର ରୂପ ନେଇ ସାରିଛି କୋରୋନା। ତେବେ ବର୍ତ୍ତମାନ ସୁଦ୍ଧା କୌଣସି ରାଷ୍ଟ୍ର ଏହାର ପ୍ରତିଷେଧକ ବାହାର କରିପାରିନାହାନ୍ତି, ଯଦିଓ ଆମେରିକା ଓ ଚୀନ ଏହା ଉପରେ ଗବେଷଣା ବର୍ତ୍ତମାନ ସୁଦ୍ଧା ଜାରି ରଖିଛନ୍ତି। ବିଶ୍ୱର ୨୦୦ରୁ ଊର୍ଦ୍ଧ୍ୱ କମ୍ପାନୀ ଏହି ଭ୍ୟାକ୍ସିନ ବାହାର କରିବା ପାଇଁ ପ୍ରୟାସ ଚଳାଇଛନ୍ତି। ଏପରିକି ବିଶ୍ୱର କିଛି କମ୍ପାନୀ ପଶୁପକ୍ଷୀଙ୍କ ଉପରେ ମଧ୍ୟ ପରୀକ୍ଷା କରିବା ଆରମ୍ଭ କରିସାରିଲେଣି। କିନ୍ତୁ ଏଯାଏ କୌଣସି କମ୍ପାନୀ ଏ ନେଇ ନିଶ୍ଚିତ କରିନାହାନ୍ତି।
ତେବେ କୋରୋନା ଭ୍ୟାକ୍ସିନ ବାହାର କରିବାରେ ଭାରତ ସମଗ୍ର ବିଶ୍ୱା ପ୍ରଥମ ଦେଶଭାବେ ଉଭା ହେବାକୁ ଯାଉଛି। ଦେଶର ୬ଟି ପ୍ରମୁଖ କମ୍ପାନୀ ଏହି କ୍ଷେତ୍ରରେ ଗୁରୁତ୍ଵପୂର୍ଣ୍ଣ ସ୍ତରରେ ରହିଛନ୍ତି। ଏହି ୬ କମ୍ପାନୀ ମଧ୍ୟରେ କ୍ୟାଡ଼ିଲା, ସୀରମ ଇନଷ୍ଟିଚ୍ୟୁଟ, ବାୟୋଲୋଜିକାଲ ଇ ଭାରତ ବାୟୋଟେକ, ଇଣ୍ଡିଆନ ଇମ୍ୟୁନୋଲୋଜିକାଲ୍ସ ଓ ମାନ୍ୟାଭାକ୍ସ ଭଳି ବଡ଼ ବଡ଼ ଔଷଧ ପ୍ରସ୍ତୁତ କାରୀ କମ୍ପାନୀ ଭ୍ୟାକ୍ସିନ ବାହାର କରିବା ଦିଗରେ କାର୍ଯ୍ୟ କରୁଛନ୍ତି। ଏହି କମ୍ପାନୀ ଗୁଡ଼ିକ ବର୍ତ୍ତମାନ ପର୍ଯ୍ୟନ୍ତ ୭୦ ପ୍ରକାର ଗୁରୁତ୍ୱପୂର୍ଣ୍ଣ ଭ୍ୟାକ୍ସିନ ବାହାର କରିସାରିଛନ୍ତି। ଏହି ଭ୍ୟାକ୍ସିନ ମଧ୍ୟରୁ ୩ଟି ମଣିଷଙ୍କ ଉପରେ ମଧ୍ୟ ପରୀକ୍ଷାନିରୀକ୍ଷା କରାଯାଇଛି।
ମିଳିଥିବା ସୂଚନା ମୁତାବକ, କୋରୋନାର ଭ୍ୟାକ୍ସିନ ୨୦୨୧ ସୁଦ୍ଧା ବଜାରରେ ଉପଲବ୍ଧ ହେବ। ଏଥିପାଇଁ ଭାରତୀୟ କମ୍ପାନୀଗୁଡ଼ିକ ବେଶ ଦ୍ରୁତ ବେଗରେ କାର୍ଯ୍ୟ ଜାରି ରଖିଛନ୍ତି। ତେବେ ତାଙ୍କ କାର୍ଯ୍ୟର ପ୍ରଗତିକୁ ଦେଖିଲେ ଚଳିତ ବର୍ଷ ସେପ୍ଟେମ୍ବର ମାସ ଶେଷ ସୁଦ୍ଧା ବଜାରରେ ଉପଲବ୍ଧ ହେବାର ଆଶା ଉଜ୍ଜୀବିତ କରିଛି। ତେବେ ଭାରତ ବ୍ୟତୀତ ଇଜ୍ରାଏଲ, ଜାପାନ, ଆମେରିକା ଭଳି ଦେଶ ମଧ୍ୟ ମଣିଷ ଉପରେ କୋରୋନା ଟେଷ୍ଟ କରିବା ପାଇଁ ପ୍ରସ୍ତୁତ ହୋଇ ସାରିଲେଣି।
ସୌଜନ୍ୟ: ଜି ନ୍ୟୁଜ
