ଗୁଆହାଟୀ : ଆନ୍ତର୍ଜାତିକ ସୀମା ଅତିକ୍ରମ କରି ଗୋଟିଏ ହାତୀ ଭାରତ ଚାଲିଆସିଥିବାବେଳେ ଏହାର ମାଲିକାନାକୁ ନେଇ ଭାରତ ଓ ବାଂଲାଦେଶ ମଧ୍ୟରେ ବିବାଦର ସୂତ୍ରପାତ ହୋଇଛି। ମାମଲା ବର୍ତ୍ତମାନ ଗୁଆହାଟୀ ଅଦାଲତରେ ବିଚାରାଧୀନ ଥିବାବେଳେ ଆସନ୍ତାକାଲି ଅର୍ଥାତ୍ ୨୧ରେ ଶୁଣାଣି କରାଯିବ।
ସୂଚନା ମୁତାବକ ଚନ୍ଦ୍ରତାରା ନାମକ ଏହି ହାତୀଟି ଗତବର୍ଷ ସେପ୍ଟେମ୍ବରରେ ସୀମା ଅତିକ୍ରମ କରି ତ୍ରିପୁରାର ଉନାକୋଟି ଜିଲାକୁ ପ୍ରବେଶ କରିଥିଲା। ଇତିମଧ୍ୟରେ ଆତିକୁର ରେହମାନ ନାମକ ଜଣେ ବାଂଲାଦେଶ ନାଗରିକ ହାତୀର ମାଲିକ ବୋଲି ଦାବି କରିଥିବାବେଳେ ଭାରତରେ ରହୁଥିବା ଆତ୍ମୀୟଙ୍କ ଜରିଆରେ ଏହାର ଫଟୋ ଓ ଅନ୍ୟାନ୍ୟ କାଗଜପତ୍ର ବିଏସଏଫ୍ ଯବାନ ଓ ତ୍ରିପୁରା ବନ ବିଭାଗ କର୍ମଚାରୀଙ୍କୁ ହସ୍ତାନ୍ତର କରିଛନ୍ତି। ଅପରପକ୍ଷରେ ଭାରତର ଅନ୍ୟ ଦୁଇ ଜଣ ବ୍ୟକ୍ତି ହାତୀର ପ୍ରକୃତ ମାଲିକ ବୋଲି ଦାବି କରିଛନ୍ତି। ବର୍ତ୍ତମାନ ବିବାଦୀୟ ହାତୀ ବନ ବିଭାଗ ହେପାଜତରେ ରହିଥିବାବେଳେ ଅଦାଲତଙ୍କ ରାୟକୁ ଅପେକ୍ଷା କରାଯାଇଛି।
