ୱାଶିଂଟନ: ଭାରତ ଉପଗ୍ରହ ନିରୋଧୀ ପରୀକ୍ଷଣରେ ନିଜର ଏକ ସାଟେଲାଇଟକୁ ନଷ୍ଟ କରିବା ପ୍ରକ୍ରିୟାକୁ ନାସା ଭୟଙ୍କର ବୋଲି ବର୍ଣ୍ଣନା କରିଛି। ନଷ୍ଟ ହୋଇଥିବା ଉପଗ୍ରହର ୪୦୦ ଖଣ୍ଡ ମହାକାଶରେ ରହିଛି ଯାହା ଆନ୍ତର୍ଜାତିକ ମହାକାଶ କେନ୍ଦ୍ର ପାଇଁ ବିପଦ ବୋଲି ନାସା କହିଛି। ନାସାର ପ୍ରଶାସକ ଜିମ ବ୍ରାଇଡଷ୍ଟାଇନ କହିଛନ୍ତି ଯେ ବର୍ତମାନ ସୁଦ୍ଧା ୬୦ଟି ଟୁକୁଡା ଅଂଶ ଠାବ କରାଯାଇଥିବା ବେଳେ ସେଥିରୁ ୨୪ଖଣ୍ଡ ଟୁକୁଡା ଆନ୍ତର୍ଜାତିକ ମହାକାଶ କେନ୍ଦ୍ରଠାରୁ ଦୂରରେ ରହିଛି।
ସେ କହିଛନ୍ତି, ଏହା ଏତେ ଭୟାନକ ଯେ ନଷ୍ଟ ହୋଇଥିବା ଉପଗ୍ରହର ଖଣ୍ଡବିଖଣ୍ଡିତ ଅଂଶ ଅନେକ ଦୂର ଯାଏଁ ଯାଇଛି ଯାହା ଭବିଷ୍ୟତରେ ମହାକାଶ ଅଭିଯାନ ପାଇଁ ଅନୁକୂଳ ନୁହେଁ। ନଷ୍ଟ ହୋଇଥିବା ଖଣ୍ଡ ଗୁଡିକ ଏତେ ଛୋଟ ଯେ ସବୁ ଖଣ୍ଡଗୁଡିକୁ ଠାବ କରିବା ସମ୍ଭବ ନୁହେଁ ବୋଲି ବ୍ରାଇଡଷ୍ଟାଇନ କହିଛନ୍ତି। ଏହି ପରିସ୍ଥିତି ଏବେ ଆନ୍ତର୍ଜାତିକ ମହାକାଶ କେନ୍ଦ୍ର ପାଇଁ ୪୪% ଅଧିକ ବିପଦ ସୃଷ୍ଟି କରୁଛି। ତେବେ ସମସ୍ତ ମହାକାଶ ଯାତ୍ରୀ ସୁରକ୍ଷିତ ଥିବା ସେ କହିଛନ୍ତି।
ବ୍ରାଇଡଷ୍ଟାଇନ କହିଛନ୍ତି ଯେ ୨୦୦୭ରେ ଚୀନ ଦ୍ୱାରା ଏଭଳି ପରୀକ୍ଷଣ ପରେ ଅନେକ ଖଣ୍ତ ବିଖଣ୍ଡିତ ଅଂଶ ଏବେ ବି ମହାକାଶରେ ରହିଥିବା ବେଳେ, ଭାରତ ନିମ୍ନ କକ୍ଷରେ ପରୀକ୍ଷଣ କରିଥିବାରୁ ଉପଗ୍ରହର ଟୁକୁଡା ଅଂଶ ସମୟକ୍ରମେ ନଷ୍ଟ ହୋଇଯିବ ବୋଲି ସେ କହିଛନ୍ତି।
