ବାୟୁସେନା କିଣିବ ୩୦୦ ସ୍ବଦେଶୀ ଜ୍ଞାନକୌଶଳରେ ନିର୍ମିତ ଯୁଦ୍ଧ ଓ ପ୍ରଶିକ୍ଷଣ ବିମାନ

ନୂଆଦିଲ୍ଲୀ: ଭାରତୀୟ ବାୟୁସେନା(ଆଇଏଏଫ) ସ୍ବଦେଶୀ ଜ୍ଞାନକୌଶଳରେ ନିର୍ମିତ ୩୦୦ ଯୁଦ୍ଧ ଓ ପ୍ରଶିକ୍ଷଣ ବିମାନ କ୍ରୟ କରିବ। ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ(ହାଲ୍‌) ଏସବୁ ବିମାନ ନିର୍ମାଣ କରିବ ବୋଲି ପ୍ରତିରକ୍ଷା ମନ୍ତ୍ରଣାଳୟର ଜଣେ ବରିଷ୍ଠ ଅଧିକାରୀ ନାମ ଗୋପନ ରଖି ସୂଚନା ଦେଇଛନ୍ତି। ଏ ସମ୍ପର୍କରେ କେନ୍ଦ୍ର ସରକାରଙ୍କୁ ଅବଗତ କରାଯିବା ସହିତ ଏ ନେଇ ବାୟୁସେନା ପ୍ରତିଶ୍ରୁତିବଦ୍ଧ ବୋଲି କୁହାଯାଇଛି।

ସମ୍ପୃକ୍ତ ଅଧିକାରୀଙ୍କ ସୂଚନା ଅନୁସାରେ, ହାଲ୍‌ ସହିତ ଡିଲ ହେବାର ନିର୍ଦ୍ଧାରିତ ସମୟ ମଧ୍ୟରେ କମ୍ପାନୀକୁ ବିମାନର ଡିଜାଇନ, ନିର୍ମାଣ ଏବଂ ଯୋଗାଣ କରିବାକୁ ହେବ। ଡିଆରଡିଓ ଅଧୀନରେ କାର୍ଯ୍ୟ କରୁଥିବା ଏରୋନଟିକାଲ ଡେଭେଲପମେଣ୍ଟ ଏଜେନ୍ସି(ଏଡିଏ) ଏବଂ ହାଲ୍‌ ଏକାଠି ଏହି ଡିଲ୍‌ ପାଇଁ କାମ କରିବେ।

ଏହା ସହିତ ବାୟୁସେନା କେନ୍ଦ୍ର ସରକାରଙ୍କୁ କହିଛି ଯେ, ଏହା ଅନ୍ୟ ୧୦ଟି ସ୍କ୍ବାଡ୍ରନ(୧୬୦ରୁ ୧୮୦) ତେଜସ ମାର୍କ-୨ ଏବଂ ୩୬ ଆଡଭାନ୍ସ ମିଡିୟମ କମ୍ବାଟ ଏୟାରକ୍ରାଫ୍ଟ(ଏଏମସିଏ) କ୍ରୟ କରିବାକୁ ପ୍ରତିଶ୍ରୁତିବଦ୍ଧ। ଏହା ବ୍ୟତୀତ ବାୟୁସେନା ନୂତନ ଭାବେ ନିର୍ମିତ ଟ୍ରେନର ଏୟାରକ୍ରାଫ୍ଟ ଏଚଟିଟିପି-୪୦ କ୍ରୟ କରିବ ବୋଲି ସରକାରଙ୍କୁ ଅବଗତ କରାଇଛି। ସ୍ବଦେଶୀ ଜ୍ଞାନକୌଶଳରେ ନିର୍ମିତ ବିମାନ କିଣିବା କ୍ଷେତ୍ରରେ ବାୟୁସେନା ମୁଖ୍ୟ ଆରକେଏସ ଭଦୌରିଆଙ୍କ ଏହି ନିଷ୍ପତ୍ତି ସବୁଠାରୁ ଗୁରୁତ୍ଵପୂର୍ଣ୍ଣ ନିଷ୍ପତ୍ତି ବୋଲି କୁହାଯାଉଛି।