୨ କୋଟି ଉପଭୋକ୍ତା ଚିନ୍ତାରେ, କେମିତି ବନ୍ଦ କରିବେ ପେଟିଏମ୍ ଫାଷ୍ଟ୍ୟାଗ୍ ଆକାଉଣ୍ଟ ?

ନୂଆଦିଲ୍ଲୀ : ରିଜର୍ଭ ବ୍ୟାଙ୍କ ତରଫରୁ ନିଆଯାଇଥିବା କାର୍ଯ୍ୟାନୁଷ୍ଠାନ ପରେ ପେଟିଏମ୍ ପେମେଣ୍ଟ ବ୍ୟାଙ୍କ ଗ୍ରାହକଙ୍କ ମନରେ ଅନେକ ପ୍ରଶ୍ନ ଉଠିଛି । କିଛି ଲୋକ ନୂଆ ଫାଷ୍ଟ୍ୟାଗ୍ ନେବାକୁ ଯୋଜନା କରୁଛନ୍ତି । ଆଉ କିଛି ଲୋକଙ୍କ ମନରେ ପ୍ରଶ୍ନ କି ସେମାନେ ବ୍ୟବହାର କରୁଥିବା ପୁରୁଣା ପେଟିଏମ୍ ଫାଷ୍ଟ୍ୟାଗ୍ କିଭଳି ବନ୍ଦ କରିବେ । ପ୍ରାୟ ୨ କୋଟି ଉପଭୋକ୍ତା ପେଟିଏମର ଫାଷ୍ଟ୍ୟାଗ୍ ବ୍ୟବହାର କରୁଛନ୍ତି । ଯଦି ଆପଣଙ୍କ ମନରେ ମଧ୍ୟ ଏଭଳି ପ୍ରଶ୍ନ ଆସୁଛି ତେବେ କହିରଖୁଛୁ ଆପଣ ସହଜରେ ନିଜ ଫାଷ୍ଟ୍ୟାଗକୁ ବନ୍ଦ କରିପାରିବେ । ଆଜି ଆମେ ଆପଣଙ୍କୁ ସେ ସମ୍ପର୍କରେ ଜଣାଇବୁ ।

ଆଇଏଚଏମସିଏଲ୍(IHMCL) ତରଫରୁ ୩୨ଟି ବ୍ୟାଙ୍କର ତାଲିକା ଜାରି କରାଯାଇଛି । ଗ୍ରାହକମାନେ କେବଳ ସେହି ବ୍ୟାଙ୍କର ଫାଷ୍ଟ୍ୟାଗ୍ ବ୍ୟବହାର କରିପାରିବେ । ସେହି ତାଲିକାରେ ପେଟିଏମ୍ ନାଁ ନାହିଁ । କିନ୍ତୁ ପୂର୍ବରୁ ଅନେକ ଲୋକ ପେଟିଏମ୍ ଫାଷ୍ଟ୍ୟାଗ୍ ବ୍ୟବହାର କରୁଛନ୍ତି । ରିଜର୍ଭ ବ୍ୟାଙ୍କ ପେଟିଏମ୍ ପେମେଣ୍ଟ ବ୍ୟାଙ୍କ ପାଇଁ ସମୟ ସୀମା ୨୯ ଫେବୃୟାରୀରୁ ବଢାଇ ମାର୍ଚ୍ଚ ୧୫ କରିଦେଇଛି । ଆପଣ ସେହି ତାରିଖ ପର୍ଯ୍ୟନ୍ତ ନିଜ ପେଟିଏମ୍ ଫାଷ୍ଟ୍ୟାଗ୍ ବ୍ୟବହାର କରିପାରିବେ । ଏହା ପରେ କାର୍ଡ ବନ୍ଦ ହୋଇଯିବ । ଆପଣ ମାର୍ଚ୍ଚ ୧୫ ତାରିଖ ପରେ ଫାଷ୍ଟ୍ୟାଗକୁ ରିଚାର୍ଜ କରିପାରିବେନି । ତେବେ ଆପଣ କେମିତି ଏହାକୁ ବନ୍ଦ କରିପାରିବେ ଆସନ୍ତୁ ଜାଣିବା…

• ଆପଣଙ୍କୁ ସର୍ବ ପ୍ରଥମେ ପ୍ରୋଫାଇଲକୁ ଯିବାକୁ ହେବ
• ଏହା ପରେ ହେଲ୍ପ ଆଣ୍ଡ ସପୋର୍ଟ ଉପରେ କ୍ଲିକ୍ କରିବାକୁ ହେବ
• ଏବେ ବ୍ୟାଙ୍କିଂ ସର୍ଭିସେଜ୍ ଆଣ୍ଡ ପେମେଣ୍ଟ ବିକଳ୍ପକୁ ଯିବାକୁ ହେବ
• ଏହା ପରେ ଫାଷ୍ଟ୍ୟାଗକୁ ଯାଇ “Chat with us” ଜରିଆରେ ଚାଟ୍ କରିବାକୁ ହେବ
• ଏଠାରେ ଆପଣଙ୍କୁ ଡିଆକ୍ଟିଭେସନର ଅନୁରୋଧ କରିବାକୁ ହେବ
• ଫାଷ୍ଟ୍ୟାଗ୍ ପେଟିଏମ୍ ପୋର୍ଟାଲ ଜରିଆରେ ଲଗ ଇନ୍ କରନ୍ତୁ ଏବଂ ନିଜ ଫାଷ୍ଟ୍ୟାଗ୍ ନମ୍ବର ଦିଅନ୍ତୁ
• ଏହା ପରେ ପଞ୍ଜୀକୃତ ମୋବାଇଲ ନମ୍ବର ଏବଂ ଜରୁରି ତଥ୍ୟ ଭେରିଫାଏ କରନ୍ତୁ
• ଏହା ପରେ ହେଲ୍ପ ଆଣ୍ଡ ସପୋର୍ଟକୁ ଚୟନ କରନ୍ତୁ
• ଏହା ପରେ “I Want to Close My Fastag Profile”  କୁ ଯାଆନ୍ତୁ ଏବଂ ଏହା ପରେ ଫାଷ୍ଟ୍ୟାଗ୍ ବନ୍ଦ ହୋଇଯିବ

ଏହା ପରେ ଆପଣ ଅନ୍ୟ କୌଣସି ବ୍ୟାଙ୍କର ନୂଆ ଫାଷ୍ଟ୍ୟାଗ୍ କାର୍ଡ କିଣି ଏହାକୁ ବ୍ୟବହାର କରିପାରିବେ ।