ସମ୍ବଲପୁର – ପଶ୍ଚିମ ଓଡିଶାବାସୀ ଙ୍କ କୃଷିଭିତ୍ତିକ ଗଣପର୍ବ ନୁଆଁଖାଇ ଅବସରରେ ୩ ଦିନ ସରକାରୀ ଛୁଟି ଘୋଷଣା କରିବାକୁ ବଜରଙ୍ଗ ଦଳ ଦାବି କରିଛି । ବୁଧବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଙ୍କୁ ଜିଲା ପ୍ରଶାସନ ଜରିଆରେ ଦିଆଯାଇଥିବା ଦାବିପତ୍ର ଅନୁଯାୟୀ, ପଶ୍ଚିମ ଓଡିଶାବାସୀ ମାନଙ୍କ ପାଇଁ ନୁଆଁଖାଇ ଐତିହ୍ୟ ସମ୍ପନ୍ନ ପୁରାତନ ପର୍ବ ଅଟେ । ଏହି ଅବସରରେ ପଶ୍ଚିମ ଓଡିଶାବାସୀ ଯେଉଁ ଠାରେ ଥିଲେ ସୁଦ୍ଧା ସେମାନେ ଘରକୁ ଆସି କୂଳ ଦେବାଦେବୀ ଙ୍କ ପୂଜାର୍ଚ୍ଚନା ପରେ ସପରିବାର ନୂତନ ଫସଲରୁ ଉତ୍ପାଦିତ ଅନ୍ନ ଗ୍ରହଣ କରିଥାନ୍ତି । ସଂସ୍କୃତି ସହିତ ତ୍ରୁଣମୂଳ ସ୍ତରରୁ ଜଡିତ ନୁଆଁଖାଇ ଅବସରରେ ନୃତ୍ୟ, ଗୀତ, ବିଭିନ୍ନ ଖେଳକୁଦ ଓ ଅନ୍ୟାନ୍ୟ ପ୍ରତିଯୋଗୀତା ସମେତ ବିଭିନ୍ନ ମନୋରଞ୍ଜନ କାର୍ଯ୍ୟକ୍ରମ ମାନ ଆୟୋଜିତ ହୋଇଥାଏ । ଏହି ଗଣପର୍ବରେ ସମସ୍ତ ପଶ୍ଚିମ ଓଡିଶାବାସୀ ସାମିଲ ହେଉଥିବା ବେଳେ ବ୍ୟାଙ୍କ ମାନଙ୍କ ସମେତ ଅନ୍ୟ କିଛି ବେସରକାରୀ ପ୍ରତିଷ୍ଠାନ ଗୁଡିକ ନୁଆଁଖାଇ ଛୁଟି ଦେଇ ନାହାନ୍ତି ।
ଅନ୍ୟ ପର୍ବ ଗୁଡିକରେ ସାରା ରାଜ୍ୟରେ ସରକାରୀ ଛୁଟି ହେଉଥିବା ବେଳେ କିନ୍ତୁ ଜାଣିଶୁଣି ନୁଆଁଖାଇକୁ ଏଥିରୁ ବାଦ ଦିଆଯାଇ ପାତର ଅନ୍ତର ନୀତି ପଶ୍ଚିମ ଓଡିଶା ପ୍ରତି କରାଯାଉଛି । ଏଣୁ ଓଡିଶା ସରକାର ସେପ୍ଟେମ୍ବର ୧ ତାରିଖରୁ ୩ ତାରିଖ ପର୍ଯ୍ୟନ୍ତ ଛୁଟି ଘୋଷଣା କରନ୍ତୁ ବୋଲି ବଜରଙ୍ଗ ଦଳ ଓଡିଶା ପଶ୍ଚିମ ତରଫରୁ ଦାବି କରାଯାଇଛି । ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଅତିରିକ୍ତ ଜିଲାପାଳ ଉମାକାନ୍ତ ରାଜ ଙ୍କୁ ପ୍ରାନ୍ତ ସଂଯୋଜକ ସୁଧିର ରଞ୍ଜନ ବହିଦାର ଙ୍କ ନେତୃତ୍ୱରେ ଜୟନ୍ତ ମହାପାତ୍ର, ଜତିନ୍ଦ୍ର ଭୋଇ, ଶିବାନନ୍ଦ ଜେନା, ଶୁଭମ ମିଶ୍ର, ଅଭିଜିତ ହୋତା ପ୍ରମୁଖ ଦାବିପତ୍ର କରିଛନ୍ତି ।
