ମୁମ୍ବାଇ : ଚୀନରେ କାୟା ମେଲାଉଥିବା ଏଚ୍ଏମ୍ପିଭି ଭୂତାଣୁ ଭାରତରେ ଧିରେ ଧିରେ ବ୍ୟାପିବା ଆରମ୍ଭ କଲାଣି । ଗତ ୨ ଦିନ ମଧ୍ୟରେ ବଢି ଚାଲୁଛି ସଂକ୍ରମିତଙ୍କ ସଂଖ୍ୟା । କର୍ଣ୍ଣାଟକ ଓ ଗୁଜରାଟ ପରେ ମହାରାଷ୍ଟ୍ରର ନାଗପୁରରେ ମଧ୍ୟ ଏଚ୍ଏମ୍ପିଭି ଭୂତାଣୁରେ ୨ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ପୂର୍ବରୁ ୬ ଜଣ ପଜିଟିଭ୍ ଚିହ୍ନଟ ହୋଇଥିବା ବେଳେ ଏବେ ଏହି ସଂଖ୍ୟା ୮କୁ ବୃଦ୍ଧି ପାଇଛି। ମହାରାଷ୍ଟ୍ରୁର ନାଗପୁରରେ ମଙ୍ଗଳବାର ଚିହ୍ନଟ ହୋଇଥିବା ପଜିଟିଭ୍ ମଧ୍ୟ ୨ ଜଣ ଶିଶୁ । ଏହି ଭୂତାଣୁର ଲକ୍ଷଣ ଏହି ୨ ଶିଶୁଙ୍କ ନିକଟରେ ଦେଖାଯାଇଛି। ୨ ଶିଶୁଙ୍କ ବୟସ ଯଥାକ୍ରମେ ୭ ଓ ୧୩ ବର୍ଷ ।
ନାଗପୁରର ହସ୍ପିଟାଲରେ ୨ ଶିଶୁଙ୍କୁ ଚିକିତ୍ସା ପାଇଁ ଅଣାଯାଇଥିଲା । ଶିଶୁଙ୍କ ନିକଟରେ କାଶ, ଜ୍ୱର ସମସ୍ୟା ଦେଖାଦେଇଛି ।
ମହାରାଷ୍ଟ୍ର ସରକାର ଏଚ୍ଏମ୍ପିଭି ଭୂତାଣୁକୁ ନେଇ ସ୍ୱାସ୍ଥ୍ୟ ବିଭାଗର ଅଧିକାରୀଙ୍କୁ ସତର୍କ ରହିବା ସହ ଆବଶ୍ୟକ ପଦକ୍ଷେପ ତୁରନ୍ତ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି । ବର୍ତ୍ତମାନ ଯାଏଁ ଥିବା ସ୍ଥିତି ଅନୁଯାୟୀ, କେନ୍ଦ୍ର ସରକାର ସୂଚନା ଦେଇଛନ୍ତି, ଏଚ୍ଏମ୍ପିଭି ଭୂତାଣୁ ବୃଦ୍ଧି ପାଇବା ପରେ କରୋନା ଭଳି ସ୍ଥିତି ହେବାର ସମ୍ଭାବନା ନାହିଁ । ପ୍ରଥମ ଥର ଏହି ଭୂତାଣୁ ୨୦୦୧ରେ ନେଦରଲ୍ୟାଣ୍ଡରେ ମିଳିଥିଲା ।
ରିପୋର୍ଟ ଅନୁଯାୟୀ, କର୍ଣ୍ଣାଟକ, ତାମିଲନାଡୁ, ଗୁଜରାଟ ଓ ମହାରାଷ୍ଟ୍ରରେ ପ୍ରାୟ ୮ ଜଣ ସଂକ୍ରମିତ ଏଯାଏଁ ଚିହ୍ନଟ ହୋଇଛନ୍ତି। ଏମାନଙ୍କ ମଧ୍ୟରୁ ବେଙ୍ଗାଲୁରୁ, ନାଗପୁର ଓ ତାମିଲନାଡୁରୁ ୨ ଲେଖାଏଁ ସାମିଲ ରହିଛି। ଗୁଜରାଟ ଓ ଅହମ୍ମଦାବାଦ୍ରେ ଗୋଟିଏ ମାମଲା ସାମ୍ନାକୁ ଆସିଛି।
