ହୀରାକୁଦ ଷ୍ଟେସନର ପୁନର୍ବିକାଶ ଶିଳାନ୍ୟାସ କାର୍ଯ୍ୟକ୍ରମରେ ଯୋଗଦେଲେ କେନ୍ଦ୍ରମନ୍ତ୍ରୀ 

ସମ୍ବଲପୁର ଜିଲ୍ଲାର ହୀରାକୁଦ ରେଳ ଷ୍ଟେସନ ଠାରେ ଭର୍ଚ୍ଚୁଆଲ ପ୍ଲାଟଫର୍ମ ମାଧ୍ୟମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କରକମଳରେ ‘ଅମୃତ ଭାରତ ଷ୍ଟେସନ’ ଯୋଜନା ଅନ୍ତର୍ଗତ ସାରା ଦେଶରେ ଷ୍ଟେସନର ରୂପାନ୍ତରଣ ପାଇଁ ଶିଳାନ୍ୟାସ କାର୍ଯ୍ୟକ୍ରମରେ ଯୋଗଦେବା ଅବସରରେ ଶ୍ରୀ ପ୍ରଧାନ ଏହା କହିଛନ୍ତି । ପ୍ରଧାନମନ୍ତ୍ରୀ ଓ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଏଥିପାଇଁ ଧନ୍ୟବାଦ ଜଣାଇବା ସହ କେନ୍ଦ୍ରମନ୍ତ୍ରୀ କହିଛନ୍ତି ଯେ ପ୍ରଥମ ପର୍ଯ୍ୟାୟରେ ଓଡ଼ିଶାର ୨୫ଟି ରେଳ ଷ୍ଟେସନ ସମେତ ସମଗ୍ର ଦେଶରେ ୫୦୮ ରେଳ ଷ୍ଟେସନର ପୁନର୍ବିକାଶ ପାଇଁ ପ୍ରଧାନମନ୍ତ୍ରୀ ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ପ୍ରଥମ ପର୍ଯ୍ୟାୟରେ ନବୀକରଣ ହେବାକୁ ଥିବା ରାଜ୍ୟର ରେଳ ଷ୍ଟେସନ ଗୁଡ଼ିକ ହେଲା ସାକ୍ଷୀଗୋପାଳ, ମଞ୍ଚେଶ୍ୱର, ଢେଙ୍କାନାଳ, ଛତ୍ରପୁର, ଅନୁଗୁଳ, ମେରାମୁଣ୍ଡଳି, ବାଲୁଗାଁ, ଲିଙ୍ଗରାଜ ମନ୍ଦିର ରୋଡ୍, ତାଳଚେର ରୋଡ୍, ଖୋର୍ଦ୍ଧା ରୋଡ୍, କଣ୍ଟାବାଞ୍ଝି, ବରଗଡ଼ ରୋଡ୍, ହୀରାକୁଦ, ରେଢାଖୋଲ, ବରପାଲି, ମୁନିଗୁଡ଼ା, ବଲାଙ୍ଗୀର, ହରିଶଙ୍କର ରୋଡ୍, ଭବାନୀପାଟଣା, ଖରିଆର ରୋଡ୍, ରାଜଗାଙ୍ଗପୁର, ବଡବିଲ, ବାରିପଦା, ଜଳେଶ୍ୱର ଓ ଦାମନଯୋଡି ଷ୍ଟେସନ୍ । ସାରା ଦେଶରେ ଏହି ୫୦୮ରେଳ ଷ୍ଟେସନର ନବୀକରଣ ପାଇଁ ପାଖାପାଖି ୨୫ ହଜାର କୋଟି ଟଙ୍କା ଖର୍ଚ୍ଚ ହେବ ଏବଂ ଓଡ଼ିଶାରେ ଏହି ଷ୍ଟେସନର ନବୀକରଣ ପାଇଁ ପ୍ରାୟ ୫୩୧ କୋଟି ଟଙ୍କା ଖର୍ଚ୍ଚ ହେବ ।

ଶ୍ରୀ ପ୍ରଧାନ କହିଛନ୍ତି ଯେ ପ୍ରଧାନମନ୍ତ୍ରୀଙ୍କ ଭାବନା ରେଳ ଷ୍ଟେସନ ସହ ଯୋଡି ହୋଇ ରହିଛି । ତାଙ୍କର ରେଳ ପ୍ରତି ପ୍ରତିବଦ୍ଧତା ଆଜି ତାହାର ପ୍ରତିଫଳନ ହେଉଛି । ଆଜି ମୋଦି ସରକାରରେ କାଳ ବିଳମ୍ବ ନକରି ରେଳ ପ୍ରକଳ୍ପକୁ କ୍ରିୟାନ୍ୱୟନ କରାଯାଉଛି । ନିକଟରେ ଝାରସୁଗୁଡ଼ାରୁ ବାରକୋଟ୍ ପର୍ଯ୍ୟନ୍ତ ନୂଆ ରେଳ ଲାଇନ ତିଆରି କରିବା ପାଇଁ ଚୂଡାନ୍ତ ସର୍ଭେ କରିବା ସହ  ଡିପିଆର୍ ପ୍ରସ୍ତୁତ କରିବାକୁ ରେଳ ମନ୍ତ୍ରଣାଳୟ ମଞ୍ଜୁରୀ ପ୍ରଦାନ କରିବା ଏହାର ଏକ ନିଚ୍ଛକ ଉଦାହରଣ । ଏହାଦ୍ୱାରା ଶିଳ୍ପ ସମୃଦ୍ଧ ଅନୁଗୋଳ, ତାଳଚେର, ଝାରସୁଗୁଡାରର ଅର୍ଥନୀତି ଅଭିବୃଦ୍ଧି ହେବ। କୃଷି, ଯାତ୍ରା ଗମନାଗମନ, ପର୍ଯ୍ୟଟନର ବିକାଶରେ ସହାୟକ ହେବ । ଏହାବ୍ୟତିତ ସମ୍ବଲପୁର ଶାଲିମାର ଏକ୍ସପ୍ରେସ ମହିମା ଗୋସାଇଁ ଏକ୍ସପ୍ରେସର ଚଳାଚଳ, ଅନୁଗୁଳ – ସୁକିନ୍ଦା ନୂଆ ରେଳ ଲାଇନର ଶୁଭାରମ୍ଭ ସହ ଅନେକ ରେଳ ପ୍ରକଳ୍ପକୁ ତ୍ୱରିତ ଗତିରେ ଅନୁମୋଦନ ଦିଆଯାଉଛି ।

ଓଡ଼ିଶାକୁ ପୂର୍ବ ସରକାରରେ ରେଳ ଅନୁଦାନ ବାବଦକୁ ବର୍ଷକୁ ହଜାର କୋଟି ଟଙ୍କା ଆସୁନଥିବା ବେଳେ ମୋଦୀ ସରକାରରେ ରେଳ ଅନୁଦାନରେ ବାର୍ଷିକ ୧୦ ହଜାର କୋଟି ଟଙ୍କା ଆସୁଛି। ରାଜ୍ୟରେ ଶତପ୍ରତିଶତ ରେଳଲାଇନର ବିଦ୍ୟୁତିକରଣ ହୋଇଛି । ଅପରପକ୍ଷରେ ଓଡ଼ିଶାର ବିକାଶ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିଭିନ୍ନ ଯୋଜନା, କେନ୍ଦ୍ରୀୟ ଅନୁଦାନ, ଟିକସ ଭାଗ ଓ କେନ୍ଦ୍ରୀୟ ଉଦ୍ୟୋଗ ମାନଙ୍କ ବ୍ୟୟ ବରାଦକୁ ମିଶାଇ ଗତ ୯ ବର୍ଷରେ ୧୮ ଲକ୍ଷ ୮୩ ହଜାର କୋଟିରୁ ଅଧିକ ଅର୍ଥ ସହାୟତା ଦେଇଛନ୍ତି । ମୋଦି ସରକାରଙ୍କ ପୂର୍ବ ତଥା ୟୁପିଏର ଶେଷ ୧୦ ବର୍ଷ ସରକାରରେ ଓଡ଼ିଶାକୁ ମାତ୍ର ୨ ଲକ୍ଷ ୯୩ ହଜାର କୋଟି ଟଙ୍କା ମିଳିଥିଲା। ରେଳ ଭିତ୍ତିଭୂମିକୁ ମଜବୁତ୍ କରି ଓଡ଼ିଶାର ବିକାଶ ପାଇଁ ମୋଦୀ ସରକାର ପ୍ରତିଶ୍ରୁତିବଦ୍ଧ ବୋଲି କେନ୍ଦ୍ରମନ୍ତ୍ରୀ କହିଛନ୍ତି । ଆଜିକାର କାର୍ଯ୍ୟକ୍ରମରେ ସମ୍ବଲପୁର ଡିଆରଏମ ବିନିତ୍ ସିଂ, ମହାନଦୀ କୋଲ ଫିଲଡ ଲିମିଟେଡ ମୁଖ୍ୟ ପରିଚାଳନା ନିର୍ଦ୍ଦେଶକ ୟୁ ସିଂ, ସମ୍ୱଲପୁର ସାଂସଦ ନିତେଶ ଗଙ୍ଗଦେବ, ରେଙ୍ଗାଲି ବିଧାୟକ ନାଉରୀ ନାୟକ, କୁଚିଣ୍ଡା ପୂର୍ବତନ୍ ବିଧାୟକ ରବି ନାୟକ, ରାଜ୍ୟ ବିଜେପି ସାଧାରଣ ସମ୍ପାଦକ ସିମାଞ୍ଚଳ ଖଟେଇ, ରାଜ୍ୟ ସମ୍ପାଦକ ଟଙ୍କଧର ତ୍ରିପାଠୀ ପ୍ରମୁଖଙ୍କ ସମେତ ‘ରଙ୍ଗବତୀ’ ଗୀତର ଗାୟକ ତଥା ପଦ୍ମଶ୍ରୀ ଡ. ଜିତେନ୍ଦ୍ର ହରିପାଲ ଓ ରଚୟିତା ମିତ୍ରଭାନୁ ଗୌନ୍ତିଆ ମଞ୍ଚାସିନ ରହିଥିଲେ। ବିଭିନ୍ନ ବିଦ୍ୟାଳୟର ଛାତ୍ରଛତ୍ରୀମାନଙ୍କ ଦ୍ଵାରା ସାଂସ୍କୃତିକ କାର୍ଯକ୍ରମ ମଞ୍ଚସ୍ଥ ହୋଇଥିଲା।