ନୂଆଦିଲ୍ଲୀ: ଏୟାର ଇଣ୍ଡିଆ ବିମାନ ଦୁର୍ଘଟଣାର ତଦନ୍ତ ନିମନ୍ତେ ଶନିବାର କେନ୍ଦ୍ର ସରକାରଙ୍କ ପକ୍ଷରୁ ଉଚ୍ଚସ୍ତରୀୟ କମିଟି ଗଠନ କରାଯାଇଛି। କେନ୍ଦ୍ର ସ୍ବରାଷ୍ଟ୍ର ସଚିବଙ୍କୁ କମିଟି ଅଧ୍ୟକ୍ଷ ନିଯୁକ୍ତ କରାଯାଇଥିବାବେଳେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ସଚିବ, ଗୁଜରାଟ ଗୃହ ବିଭାଗ ଅଧିକାରୀ, ଅହମଦାବାଦ ପୁଲିସ କମିସନର, ବେସାମରିକ ବିମାନ ଚଳାଚଳ ନିର୍ଦେଶାଳୟର ଏକାଧିକ ଅଧିକାରୀ, ଭାରତୀୟ ବାୟୁସେନା ଅଧିକାରୀ ଏବଂ ବିମାନ ଚଳାଚଳ ବିଶେଷଜ୍ଞଙ୍କୁ ସଦସ୍ୟଭାବେ ସାମିଲ କରାଯିବ। ଆବଶ୍ୟକ ପଡିଲେ, ପରବର୍ତ୍ତୀ ସମୟରେ ଏହି କମିଟିରେ ଅନ୍ୟ ଅଧିକାରୀଙ୍କୁ ମଧ୍ୟ ସାମିଲ କରାଯିବ ବୋଲି କୁହାଯାଇଛି। ତିନିମାସ ମଧ୍ୟରେ କମିଟି ଚୂଡାନ୍ତ ରିପୋର୍ଟ ଦାଖଲ କରିବ ବୋଲି ନିର୍ଦେଶ ଦିଆଯାଇଛି। କମିଟି ଦୁର୍ଘଟଣାର ସମ୍ଭାବ୍ୟ କାରଣ ସମ୍ପର୍କରେ ତଦନ୍ତ କରିବା ସହ ବିମାନ ଚଳାଚଳ ପ୍ରସଙ୍ଗରେ ଉଦ୍ଦିଷ୍ଟ ଏସ୍ଓପି (ଷ୍ଟାଣ୍ଡାର୍ଡ ଅପରେସନ ପ୍ରୋସିଡ୍ୟୁୟର)କୁ ମଧ୍ୟ ଅନୁଧ୍ୟାନ କରିବେ। ଭବିଷ୍ୟତରେ ବିମାନ ଦୁର୍ଘଟଣା ଏଡାଇବାକୁ କିଭଳି ପଦକ୍ଷେପ ଗ୍ରହଣ କରାଯାଇ ପାରିବ, ସେ ସମ୍ପର୍କରେ ମଧ୍ୟ କମିଟି ସରକାରଙ୍କୁ ପ୍ରସ୍ତାବ ଦେବେ ବୋଲି ଜଣାପଡିଛି। ତଦନ୍ତ ପ୍ରକ୍ରିୟାରେ ଆବଶ୍ୟକ ପଡୁଥିବା ସମସ୍ତ ତଥ୍ୟ ଯଥା ଫ୍ଲାଇଟ୍ ଡାଟା, କକ୍ପିଟ ଭଏସ ରେକର୍ଡର, ବିମାନର ରକ୍ଷଣାବେକ୍ଷଣ ରେକର୍ଡ ଏବଂ ପ୍ରତ୍ୟକ୍ଷଦର୍ଶୀଙ୍କ ବୟାନ ଇତ୍ୟାଦି ଯୋଗାଇ ଦିଆଯିବ। ଏହାବ୍ୟତୀତ ଦୁର୍ଘଟଣାର ତଦନ୍ତ ପ୍ରକ୍ରିୟାରେ ସାମିଲ ଥିବା ଅନ୍ୟ ସଂସ୍ଥା ତରଫରୁ ମଧ୍ୟ କମିଟିକୁ ସହଯୋଗ କରାଯିବ ବୋଲି କୁହାଯାଇଛି। କମିଟି ସଦସ୍ୟମାନେ ଦୁର୍ଘଟଣାସ୍ଥଳ, ଅହମଦାବାଦ ବିମାନ ବନ୍ଦର ଏଟିସି ପରିଦର୍ଶନ କରିବା ସହ ଏୟାର ଇଣ୍ଡିଆ ଅଧିକାରୀ, ମୃତକଙ୍କ ପରିବାରବର୍ଗଙ୍କ ମତାମତ ସଂଗ୍ରହ କରିପାରିବେ ବୋଲି ଜଣାପଡିଛି।
Comments are closed.