ନୂଆଦିଲ୍ଲୀ: ଅହମ୍ମଦାବାଦରେ ଗତ ଗୁରୁବାର ଘଟିଥିବା ମର୍ମନ୍ତୁଦ ବିମାନ ଦୁର୍ଘଟଣାରେ ଯାତ୍ରୀ ଓ ବିମାନ କର୍ମଚାରୀଙ୍କ ସମେତ ମୋଟ ୨୭୪ ଜଣ ପ୍ରାଣ ହରାଇଛନ୍ତି। ତେବେ ଭାରତୀୟ ବଂଶୋଦ୍ଭବ ବ୍ରିଟିଶ ନାଗରିକ ବିଶ୍ବାସ କୁମାର ରମେଶ ଏହି ଦୁର୍ଘଟଣାରୁ ଆଶ୍ଚର୍ଯ୍ୟଜନକଭାବେ ବର୍ତ୍ତି ଯାଇଛନ୍ତି। ଉକ୍ତ ଦିନ ରମେଶ ଏୟାର ଇଣ୍ଡିଆ ବିମାନର ୧୧ଏ ନମ୍ବର ସିଟ୍ରେ ବସିଥିଲେ। ତେବେ ସଂଯୋଗର ପ୍ରସଙ୍ଗ ହେଉଛି ୨୭ ବର୍ଷ ପୂର୍ବେ ଥାଇଲାଣ୍ଡରେ ଘଟିଥିବା ଏକ ବିମାନ ଦୁର୍ଘଟଣାରେ ବଞ୍ଚିଯାଇଥିବା ଜଣେ ଯାତ୍ରୀ ମଧ୍ୟ ଉକ୍ତ ବିମାନର ୧୧ଏ ନମ୍ବର ସିଟ୍ରେ ବସିଥିଲେ। ୧୯୯୮ରେ ୧୪୬ ଯାତ୍ରୀଙ୍କୁ ନେଇ ବ୍ୟାଙ୍କକରୁ ଯାତ୍ରାରମ୍ଭ କରିଥିବା ଥାଇ ଏୟାରୱେଜ୍ର ଏକ ବିମାନ ଥାଇଲାଣ୍ଡର ସୁରତ୍ ଥାନି ସହରରେ ଅବତରଣ ଉଦ୍ୟମ କରୁଥିବାବେଳେ ଦୁର୍ଘଟଣାର ସମ୍ମୁଖୀନ ହୋଇଥିଲା। ଏଥିରେ ୧୦୧ ଯାତ୍ରୀ ପ୍ରାଣ ହରାଇଥିଲେ।
ତେବେ ୧୧ଏ ନମ୍ବର ସିଟ୍ରେ ବସିଥିବା ୪୭ ବର୍ଷୀୟ ଜେମ୍ସ ରୁଆଙ୍ଗସାକ୍ ଲୟଚୁସାକ୍ ନାମକ ଯାତ୍ରୀ ସୌଭାଗ୍ୟବଶତଃ ବର୍ତ୍ତି ଯାଇଥିଲେ। ଏୟାର ଇଣ୍ଡିଆ ବିମାନ ଦୁର୍ଘଟଣାରେ ଜଣେ ଯାତ୍ରୀ ବଞ୍ଚିଥିବାର ସୂଚନା ପାଇବାପରେ ଜେମ୍ସ ୨୭ ବର୍ଷ ତଳର ନିଜ କାହାଣୀକୁ ମନେ ପକାଇଛନ୍ତି। ଅବଶ୍ୟ ଜେମ୍ସ ସେଦିନ ଏୟାରବସ୍-ଏ୩୧୦ ବିମାନରେ ବସିଥିବାବେଳେ ରମେଶ ବୋଇଂ ୭୮୭-୮ ଡ୍ରିମଲାଇନର ବିମାନରେ ଯାତ୍ରା କରୁଥିଲେ। ଏହି ଦୁଇଟି ବିମାନରେ ୧୧ଏ ନମ୍ବର ସିଟ୍ର ଅବସ୍ଥିତି ଭିନ୍ନ ପ୍ରକାର।
