ସାଧାରଣତଃ ଆମ ସମସ୍ତଙ୍କ ଘରେ ସୋରିଷ ସହଜରେ ଉପଲବ୍ଧ। ଖାଦ୍ୟ ପ୍ରସ୍ତୁତିରେ ଏହା ବିଶେଷ ରୂପେ ବ୍ୟବହାର ହୋଇଥାଏ। ହେଲେ କ’ଣ ଆପଣ ଜାଣନ୍ତି, ଆମର ଅନେକ ସ୍ବାସ୍ଥ୍ୟଗତ ସମସ୍ୟା ଦୂର କରିବାରେ ସୋରିଷ ସହାୟକ ହୋଇଥାଏ। ଉଭୟ ସୋରିଷ ଓ ସୋରିଷ ତେଲ ଖୁବ୍ ସ୍ବାସ୍ଥ୍ୟ ଉପଯୋଗୀ। ସୋରିଷରେ କେରୋଟିନ୍, ଲୁଟ୍ରିନ୍, ଭିଟାମିନ୍-ଏ, ଭିଟାମିନ୍-ସି ଆଦି ରହିଥାଏ। ଏହା ଏକ ଭଲ ଆଣ୍ଟିଅକ୍ସିଡାଣ୍ଟ ଭାବେ ମଧ୍ୟ କାମ କରିଥାଏ। ତେବେ ଚାଲନ୍ତୁ ଜାଣିବା ଅନେକ ସ୍ବାସ୍ଥ୍ୟ ସମସ୍ୟାକୁ ଦୂରେଇବା ପାଇଁ ସୋରିଷର ବ୍ୟବହାର ଓ ଲାଭ ବିଷୟରେ –
-ସୋରିଷ ଗୁଣ୍ଡକୁ ପାଣିରେ ମିଶାଇ ଏକ ପେଷ୍ଟ ପ୍ରସ୍ତୁତ କରନ୍ତୁ। ଏହି ପେଷ୍ଟକୁ ନାକ ଉପରେ ଲଗାନ୍ତୁ। ଏହା ଦ୍ବାରା ମାଇଗ୍ରେନ ସମସ୍ୟା ଦୂର ହୋଇଥାଏ।
-ସୋରିଷ ତେଲରେ ଜୁଆଣୀ, ରସୁଣ ଓ ହେଙ୍ଗୁ ପକାଇ ଅଳ୍ପ ଗରମ କରନ୍ତୁ। ତା’ପରେ ଏହାକୁ ଅଣ୍ଟାରେ ମାଲିସ କରନ୍ତୁ। ଏପରି କରିବା ଦ୍ବାରା ଅଣ୍ଟା ବିନ୍ଧାରୁ ରକ୍ଷା ମିଳିପାରିବ।
-ହାଲୁକା ଉଷୁମ ପାଣିରେ ସୋରିଷ ଗୁଣ୍ଡ ମିଶାଇ ପାଦକୁ କିଛି ସମୟ ସେଥିରେ ବୁଡ଼ାଇ ରଖନ୍ତୁ। ଏହାଦ୍ବାରା ପାଦ ଓ ଗଣ୍ଠି ଜନିତ ଯନ୍ତ୍ରଣାରୁ ମୁକ୍ତି ମିଳିବ।
-ମାସିକ ଧର୍ମ ସମୟରେ ଉପୁଜୁଥିବା ସମସ୍ୟାରୁ ମୁକ୍ତି ପାଇବା ପାଇଁ ଏକ ଚାମଚ ସୋରିଷ ଗୁଣ୍ଡକୁ ଗରମ କ୍ଷୀର ସହ ମିଶାଇ ଦିନକୁ ୨ଥର ପିଅନ୍ତୁ। ଏହାଦ୍ବାରା କଷ୍ଟ ଦୂର ହେବା ସହ ସେହି ସମୟର ସମସ୍ୟାରୁ ରକ୍ଷା ପାଇପାରିବେ।
-ସୋରିଷ ଗୁଣ୍ଡକୁ ମହୁ ସହିତ ମିଶାଇ ସେବନ କରିବା ଦ୍ବାରା କଫ, ଥଣ୍ଡା ଓ କାଶ ଆଦି ସମସ୍ୟାରୁ ମୁକ୍ତି ମିଳିଥାଏ।
