ଭୁବନେଶ୍ୱର: ଭୁବନେଶ୍ୱର ବିଜେବି କଲେଜ ନିକଟରେ ଥିବା ଡ. ହରେକୃଷ୍ଣ ମହତାବ ପାର୍କର ଉନ୍ନତିକରଣ ପାଇଁ ଦାବି ହୋଇଛି। ୨୦୧୧ ମସିହାରେ ଏହି ପାର୍କ ନିର୍ମାଣ ହୋଇଥିବାବେଳେ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷଙ୍କ ଅବହେଳାର ଶିକାର ହୋଇଛି ଏହି ପାର୍କ। ଦୀର୍ଘ ୧୩ବର୍ଷ ବିତିଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ ଏହି ପାର୍କରେ ସେମିତି କିଛି ଆଖିଦୃଶିଆ କାର୍ଯ୍ୟ ହୋଇନାହିଁ। ପାର୍କକୁ ଆସୁଥିବା ଜନସାଧାରଣ, ଯୁବଗୋଷ୍ଠୀ ବହୁବାର ଏହି ପାର୍କର ଉନ୍ନତିକରଣ ପାଇଁ କର୍ତ୍ତୃପକ୍ଷଙ୍କ ନିକଟରେ ଦାବି କରି ଆସୁଥିଲେ ମଧ୍ୟ ବିଭାଗୀୟ ଅଧିକାରୀ ନିରବଦ୍ରଷ୍ଟା ସାଜିଛନ୍ତି। ଭୁବନେଶ୍ୱରରେ ଥିବା ଇନ୍ଦିରା ଗାନ୍ଧୀ ପାର୍କ ଭଳି ବିଭିନ୍ନ ଔଷଧୀୟ ବୃକ୍ଷ ଏବଂ ଓଡ଼ିଆ, ଭାଷା ସାହିତ୍ୟ ଏବଂ ସଂସ୍କୃତିକୁ ନେଇ ବିଭିନ୍ନ ହୋର୍ଡିଂ ଲଗାଇବା ସହ କୁନି କୁନି ପିଲାମାନଙ୍କ ପାଇଁ କିଛି ଖେଳ ସାମଗ୍ରୀ ରଖିବା ଏବଂ ଅନୈତିକ ଲୋକଙ୍କ ଦାଉରୁ ରକ୍ଷା ପାଇଁ ୨୪ଘଣ୍ଟିଆ ନିରାପତ୍ତାରକ୍ଷୀ ଯୋଗାଇବାକୁ ଦାବି ହୋଇଛି।
Comments are closed.