ହରଭଙ୍ଗା: ହରଭଙ୍ଗାସ୍ଥିତ ହାଇସ୍କୁଲ ଖେଳ ପଡିଆରେ ଗତ ୭ ତାରିଖରୁ ଆରମ୍ଭ ହୋଇଛି ଜିଲ୍ଲାସ୍ତରୀୟ ୨୪ତମ ଆମ୍ବେଦକର କ୍ରିକେଟ ଟୁର୍ଣ୍ଣାମେଂଟ। ଶୁକ୍ରବାର ସମଲେଶ୍ୱରୀ ଗେଲେକ୍ସି ସମ୍ବଲପୁର ସହିତ ମହାବୀର କ୍ଲବ ରାମଗଡ ସହିତ ମ୍ୟାଚ ଅନୁଷ୍ଠିତ ହୋଇଥିଲା। ଏହି ମ୍ୟାଚରେ ସମ୍ବଲପୁର ଟିମ ୭ ଉଇକେଟରେ ବିଜୟୀ ହୋଇଛି। ନିର୍ଦ୍ଧାରିତ ୨୦ ଓଭର ମ୍ୟାଚରେ ମହାବୀର କ୍ଲବ ରାମଗଡ ପ୍ରଥମେ ବ୍ୟାଟିଂ କରି ୧୩୫ ରନ କରିଥିଲା।
ଦ୍ୱିତୀୟ ଇନିଂସରେ ୧୩୬ରନର ବିଜୟ ଲକ୍ଷ୍ୟ ନେଇ ସମ୍ବଲପୁର ଟିମ ପଡିଆକୁ ଓହ୍ଲାଇଥିଲା। ମାତ୍ର ୧୧ ଓଭର ୪ଟି ବଲରେ ୩ ଉଇକେଟ ହରାଇ ଏହି ଲକ୍ଷ୍ୟ ସମ୍ବଲପୁର ଟିମ ହାସଲ କରିଥିଲା। ସମଲେଶ୍ୱରୀ ଗେଲେକ୍ସିର ଓପନିଂ ବ୍ୟାଟସମ୍ୟାନ ବିବେକାନନ୍ଦ ପଣ୍ଡା ସର୍ବାଧିକ ୬୧ ରନ କରି ମ୍ୟାନ ଅଫ ଦି ମ୍ୟାଚ ହୋଇଥିଲେ। ଏହି କ୍ରିକେଟ ଟୁର୍ଣ୍ଣାମେଂଟରେ ୧୬ଟି ଦଳ ଭାଗ ନେଇଥିବା ଜଣାପଡିଛି। ଫାଇନାଲରେ ବିଜୟୀ ଦଳ ପାଇଁ ୧୮ ହଜାର ଟଙ୍କା ଏବଂ ରନରସ ଅପ ଦଳକୁ ୧୨ ହଜାର ଟଙ୍କା ପୁରସ୍କାର ରାଶି ରହିଥିବା ଆୟୋଜକ କମିଟି ସଭାପତି ବିକାଶ ବେହେରା ଓ ସଂପାଦକ ସମ୍ବାରୁ ନାଏକ ସୂଚନା ଦେଇଛନ୍ତି। ଆସନ୍ତା ୨୧ ତାରିଖ ପର୍ଯ୍ୟନ୍ତ ଟୁର୍ଣ୍ଣାମେଟ ଚାଲିବ ବୋଲି ଜଣାପଡିଛି।
