ଚେନ୍ନଇ: ତାମିଲନାଡ଼ୁର ୪୦ଟି ସ୍ଥାନରେ ବୁଧବାର ସିବିଆଇ ପକ୍ଷରୁ ଚଢାଉ ଜାରି ରହିଛି। କୋଟିକୋଟି ଟଙ୍କାର ଗୁଟକା କଳାବଜାର ସମ୍ପର୍କର୍ିତ ତଦନ୍ତ କରିବାକୁ ଯାଇ ସିବିଆଇ ପକ୍ଷରୁ ଏହି ଚଢଉ କରାଯାଉଛି। ଏହି ଦୁର୍ନୀତି ଅଭିଯୋଗରେ ରାଜ୍ୟର ସ୍ୱାସ୍ଥ୍ୟମନ୍ତ୍ରୀ ସି. ବିଜୟଭାସ୍କର ଓ ଡାଇରେକ୍ଟର ଜେନେରାଲ ଅଫ ପୁଲିସ ଟି. କେ ରାଜେନ୍ଦ୍ରନ୍ ସିବିଆଇ ସ୍କାନରରେ ରହିଛନ୍ତି।
ତାମିଲନାଡ଼ୁର ଗୁଟକା କମ୍ପାନୀ ମାଲିକଙ୍କ ବାସଭବନ, ଘର ଓ ଗୋଦାମ ଉପରେ ଏକକାଳୀନ ଭାବେ ସିବିଆଇ ଚଢଉ ଆରମ୍ଭ କରିଛି। ତାମିଲନାଡ଼ୁରେ ଗୁଟକା ନିର୍ମାଣ, ବିକ୍ରି ଉପରେ ରାଜ୍ୟ ସରକାର ୨୦୧୩ରୁ ପ୍ରତିବନ୍ଧକ ଲଗାଇଛନ୍ତି। ଏପରିକି ପାନ ମସଲା ଉପରେ ମଧ୍ୟ ପ୍ରତିବନ୍ଧକ ଜାରି କରାଯାଇଛି।
୨୦୧୭ଜୁଲାଇ ୮ରେ ଆୟକର ପକ୍ଷରୁ ଏକ ପାନ ମସଲା କମ୍ପାନୀର ଗୋଦାମ ଉପରେ ଚଢଉ ପରେ ଏଭଳି ବଡ଼ ଦୁର୍ନୀତିର ପର୍ଦାଫାସ ହୋଇଥିଲା। ୨୫୦କୋଟି ଟଙ୍କାର ଆୟକର ଫାଙ୍କିବା ଅଭିଯୋଗରେ ଏହି ଚଢଉ କରାଯାଇ ଥିଲା। ଏହି ଚଢଉରେ କମ୍ପାନୀର ଏକ ଆୟକର ଫାଇଲ ଦୁର୍ନୀତିର ପର୍ଦାଫାସ କରି ଦେଇଥିଲା। ସମ୍ପୃକ୍ତ ଗୁଟକା କମ୍ପାନୀଠାରୁ ନିୟମିତ ଟଙ୍କା ନେଉଥିବା ବ୍ୟକ୍ତି ବିଶେଷଙ୍କ ନାମ ଓ ଟଙ୍କାର ପରିମାଣ ଏହି ଫାଇଲରେ ଉଲ୍ଲେଖ ହୋଇଥିଲା। ପାଖାପାଖି ୪୦କୋଟି ଟଙ୍କା ନେତା, ମନ୍ତ୍ରୀ ଓ ସରକାରୀ ପଦାଧିକାରୀଙ୍କୁ ତାମିଲନାଡ଼ୁରେ ଗୁଟକା ନିର୍ମାଣ ଓ ବିକ୍ରି ପାଇଁ ଲାଞ୍ଚ ଦିଆଯାଇ ଥିବା ଏହି ଫାଇଲରୁ ଜଣା ପଡ଼ିଥିଲା।
ଏଭଳି ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିବା ପରେ ଚେନ୍ନାଇ ଉଚ୍ଚ ନ୍ୟାୟାଳୟ ମାମଲାର ତଦନ୍ତ ଦାୟିତ୍ୱ ସିବିଆଇକୁ ହସ୍ତାନ୍ତର କରିଥିଲେ।ଏପରିକି ତାମିଲନାଡ଼ୁର ଅବକାରୀ ବିଭାଗ ଓ ଖାଦ୍ୟ ସୁରକ୍ଷା ବିଭାଗକୁ ମଧ୍ୟ ତଦନ୍ତ ପରିସରରେ ଅଣାଯାଇ ଥିଲା।
