ଗୁରୁଡିଝାଟିଆ: ପୁରୁଣା କଟକ-ସମ୍ବଲପୁର ରସ୍ତାର ଭୁୟାଁଯୋର ନିକଟରୁ ୩ଜଣ ଦୁର୍ବୁତ୍ତ ଏକ ବାଇକରେ ଆସି ପାଇକରାପୁର ଗ୍ରାମର ଆମ୍ବ ବ୍ୟବସାୟୀ ବଲ୍ଲଭ ଜେନା ଠାରୁ ୧୫ହଜାର ଟଙ୍କା ଲୁଟିନେଇଥିଲେ। ହେଲେ ବଲ୍ଲଭର ଚିତ୍କାର ଶୁଣି ସ୍ଥାନୀୟ ଗ୍ରାମର ଯୁବକ ଦୁର୍ବୁତ୍ତଙ୍କ ମଧ୍ୟରୁ ୨ଜଣଙ୍କୁ ମାଡିବସି କାବୁ କରିନେଇଥିଲେ। ଅନ୍ୟଜଣେ ଦୁର୍ବୁତ୍ତ ଟଙ୍କା ନେଇ ଦୌଡି ପଳାଇଥିଲା ।
ଘଟଣାସ୍ଥଳରେ ପହଞ୍ଚି ୨ ଯୁବକଙ୍କୁ ଥାନାକୁ ଆଣିବା ସହ ବ୍ୟବହୃତ ବାଇକକୁ ମଧ୍ୟ ଆଣିଥିଲେ। ଅଭିଯୁକ୍ତଦ୍ୱୟଙ୍କ ମଧ୍ୟରୁ ବିକାଶ ପ୍ରଧାନର ଘର ଢେଙ୍କାନାଳ ଜିଲ୍ଲାର ତୁମସିଂ ଥାନା ଅଞ୍ଚଳରେ ହୋଇଥିବା ବେଳେ ଅନ୍ୟଜଣେ କାନପୁର ଅଞ୍ଚଳ ର ନାବାଳକ ଅଟେ। ହେଲେ ଅଭିଯୁକ୍ତମାନେ କଟକ କ୍ୟାଣ୍ଟନମେଣ୍ଟ ଥାନା ଅନ୍ତର୍ଗତ ଡିଅରପାର୍କ ବସ୍ତିରେ ଦୀର୍ଘଦିନ ହେଲାଣି ରହୁଥିଲେ। ଘଟଣାଟି ଚୌଦ୍ୱାର ଥାନା ଅଞ୍ଚଳରେ ଘଟିଥିବାରୁ ଗୁରୁଡିଝାଟିଆ ପୋଲିସ ଅଭିଯୁକ୍ତଦ୍ୱୟ ଓ ଗାଡିକୁ ଚୌଦ୍ୱାର ପୁଲିସକୁ ହସ୍ତାନ୍ତର କରିଛି।
