ଭୁବନେଶ୍ବର:କଟକର ଅଗ୍ରଣୀ ନୃତ୍ୟ ଅନୁଷ୍ଠାନ ‘ଆଙ୍ଗିକ’ ଆନୁକୂଲ୍ୟରେ ରବୀନ୍ଦ୍ର ମଣ୍ଡଠଠାରେ “ଗୁରୁପୂଜନ ଉତ୍ସବ – ୨୦୨୫” ଅତି ଉତ୍ସାହର ସହିତ ଅନୁଷ୍ଠିତ ହୋଇଯାଇଅଛି । ବିଶିଷ୍ଟ ଓଡ଼ିଶୀ ନୃତ୍ୟଗୁରୁ ମମତା ଓଝାଙ୍କୁ ‘ଅଙ୍ଗିକା ଗୁରୁଶ୍ରୀ ସମ୍ମାନ’ ରେ ସମ୍ମାନିତ କରାଯାଇଛି । ଅଙ୍ଗିକା ନୃତ୍ୟ ଏକାଡେମୀ ପକ୍ଷରୁ ଆଜି ଭୁବନେଶ୍ବରସ୍ଥ ସ୍ଥାନୀୟ ରବୀନ୍ଦ୍ର ମଣ୍ଡପ ଠାରେ ଅନୁଷ୍ଠିତ ଗୁରୁ ପୂଜନ ଉତ୍ସବ ଅବସରରେ ଓଡ଼ିଶୀ ନୃତ୍ୟର ପ୍ରସାର କ୍ଷେତ୍ରରେ ଉଲ୍ଲେଖନୀୟ ଅବଦାନ ନିମନ୍ତେ ଶ୍ରୀମତୀ ଓଝାଙ୍କୁ ଏହି ସମ୍ମାନରେ ସମ୍ମାନୀତ କରାଯାଇଛି ।
ଚଳିତ ବର୍ଷ ସୁନାମଧନ୍ୟ ନୃତ୍ୟଗୁରୁ ଶ୍ରୀ ନିରଞ୍ଜନ ରାଉତଙ୍କୁ ପାରମ୍ପାରିକ ପୂଜନ ସହିତ ‘ଅଙ୍ଗିକ ଗୁରୁଶ୍ରେଷ୍ଠ ସମ୍ମାନ’ ପ୍ରଦାନ କରାଯାଇଥିଲା । ଏହା ସହିତ କଥକ ନୃତ୍ୟଗୁରୁ ଶ୍ରୀ ଅସୀମବନ୍ଧୁ ଭଟ୍ଟଚାର୍ଯ୍ୟ, ସୀତାର ବାଦକ ଗୁରୁ ଶ୍ରୀ ସ୍ଵପ୍ତେଶ୍ଵର ଚକ୍ରବର୍ତ୍ତୀଙ୍କୁ ଅଙ୍ଗିକ ଗୁରୁଶ୍ରୀ ସମ୍ମାନ’ରେ ସମ୍ମାନିତ କରାଯାଇଥିଲା
ସମ୍ମାନନୀୟ ଅତିଥି ଭାବେ ବିଖ୍ୟାତ ଓଡ଼ିଶୀ ଗୁରୁ ପଦ୍ମଶ୍ରୀ ଡ଼. ଅରୁଣା ମହାନ୍ତି, ଗୁରୁ ଡ଼. ସ୍ନେହପ୍ରଭା ସାମନ୍ତରାୟ, ଓଡ଼ିଆ ସଙ୍ଗୀତ ନାଟକ ଏକାଡେମୀ ସଚିବ ଡ଼. ଚନ୍ଦ୍ରଶେଖର ହୋତା, ଓ ଶ୍ରୀମତୀ ଶୁଭଶ୍ରୀ ମୁଖାର୍ଜୀ, ମୁଖ୍ୟ ନିର୍ଦ୍ଦେଶିକା (ପ୍ରୋଜେକ୍ଟ ଛାଉଣୀ) ଉତ୍ସବରେ ଯୋଗ ଦେଇ ଗୁରୁଶ୍ରେଷ୍ଠ ଓ ଗୁରୁଶ୍ରୀ ସମ୍ମାନ ପ୍ରଦାନ କରିବା ସହିତ ଗୁରୁ-ଶିଷ୍ୟ ପରମ୍ପରା ଉପରେ ଆଲୋକପାତ କରିଥିଲେ । ଅଙ୍ଗିକର ସଭାପତି ଭାସ୍କର୍ଯ୍ୟ ଶିଳ୍ପୀ ଶ୍ରୀ ରବିନାରାୟଣ ରଥ ଅତିଥିଙ୍କ ପରିଚୟ ପ୍ରଦାନ, ଅନୁଷ୍ଠାନର ସମ୍ପାଦିକା ଗୁରୁ ଶ୍ରୀମତୀ ଶ୍ରାବଣୀ ମିତ୍ର ବିବରଣୀ ପାଠ ଓ ଉପଦେଷ୍ଟା ଡ଼. କଲିମୁଲ୍ଲା ଧନ୍ୟବାଦ ଅର୍ପଣ କରିଥିଲେ ।
କଥକ ଗୁରୁ ଅସୀମବନ୍ଧୁ ଭଟ୍ଟଚାର୍ଯ୍ୟ ଓ ସାଥିଙ୍କ ଦ୍ବାରା ଚିତାକର୍ଷକ କଥକ ନୃତ୍ୟ ପରିବେଷଣ କରାଯାଇଥିଲା । ଗୁରୁ ଶ୍ରୀମତୀ ଶ୍ରାବଣୀ ମିତ୍ରଙ୍କ ନୃତ୍ୟ ନିର୍ଦ୍ଦେଶନାରେ କବିଗୁରୁ ରବୀନ୍ଦ୍ରନାଥଙ୍କ ବିଖ୍ୟାତ ନୃତ୍ୟନାଟିକା ‘ଚଣ୍ଡାଳିକା’ର ପ୍ରଥମ ଓଡ଼ିଆ ଅନୁବାଦ ଦର୍ଶକଙ୍କୁ ମନ୍ତ୍ର ମୁଗ୍ଧ କରିଥିଲା । ଚଣ୍ଡାଳିକା ଭୂମିକାରେ ନିଖୁଣ ଅଭିନୟ କରି ନୃତ୍ୟଶିଳ୍ପୀ ମଲ୍ଲିକା ମିତ୍ର ଖୁବ୍ ପ୍ରଶଂସିତ ହୋଇଥିଲେ ।
ଏଠାରେ ଉଲ୍ଲେଖନୀୟ ଯେ ଦେଶ ବିଦେଶରେ ଓଡ଼ିଶୀ ଶାସ୍ତ୍ରୀୟ ନୃତ୍ୟର ପ୍ରସାର ପାଇଁ ‘ନାଲକୋ’, ‘ପାରାଦ୍ଵୀପ ପୋର୍ଟ’ ପରି ରାଷ୍ଟ୍ରାୟତ ସଂସ୍ଥା ଦ୍ୱାରା ଗୁରୁ ମମତା ଓଝା ସମ୍ମାନିତ ହୋଇଛନ୍ତି । ପ୍ରାୟ ୯ଟି ଦେଶରେ ଓଡ଼ିଶୀ ନୃତ୍ୟ ପରିବେଷଣ କରି ଶ୍ରୀମତୀ ମମତା ଓଝା ସମ୍ମାନିତ ଓ ସମ୍ବର୍ଦ୍ଧିତ ହୋଇଛନ୍ତି । ଏ ପରି ସମ୍ମାନ ତାଙ୍କର ଗୁରୁ ଦାୟିତ୍ଵ ବଢାଇବା ସହ ଓଡ଼ିଶୀ ନୃତ୍ୟର ଶାସ୍ତ୍ରୀୟତା ସଂପର୍କରେ ତାଙ୍କର ଗବେଷଣାକୁ ପ୍ରେରଣା ପ୍ରଦାନ କରିଛି ବୋଲି ଶ୍ରୀମତୀ ଓଝା ନିଜ ପ୍ରତିକ୍ରିୟାରେ କହିଛନ୍ତି । “ଅଙ୍ଗିକା ଗୁରୁଶ୍ରୀ ସମ୍ମାନ” ଲାଭ ପରେ ଶ୍ରୀମତୀ ଓଝା ଏହାକୁ ନିଜର ଶାସ୍ତ୍ରୀୟ ଗୁରୁ, କଳାପ୍ରେମୀ ଦର୍ଶକ ଓ ଗବେଷଣାରେ ସହଯୋଗୀ ସାଥି ମାନଙ୍କ ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି
