ନୂଆଦିଲ୍ଲୀ : ଗୁରୁ ନାନକ ଦେବଙ୍କ ଜୟନ୍ତୀ ଉପଲକ୍ଷେ ନ୍ୟୁୟର୍କର ଏକ ଗୁରୁଦ୍ବାରକୁ ପ୍ରାର୍ଥନା ପାଇଁ ଯାଇଥିବାବେଳେ ଭାରତୀୟ ରାଷ୍ଟ୍ରଦୂତ ତରନଜିତ୍ ସିଂହ ସାନ୍ଧୁ ଅପ୍ରୀତିକର ପରିସ୍ଥିତିର ସମ୍ମୁଖୀନ ହୋଇଛନ୍ତି। ଗୁରୁଦ୍ବାର ପରିସରରେ କେତେକ ଖଲିସ୍ତାନୀ ସମର୍ଥକ ତରନଜିତଙ୍କୁ ହଇରାଣ ହରକତ କରିଥିବା ଅଭିଯୋଗ ହୋଇଛି। ନ୍ୟୁୟର୍କର ଗୁରୁ ନାନକ ଦରବାରରେ ଆୟୋଜିତ ଗୁରୁପର୍ବ ଉତ୍ସବରେ ତରନଜିତ୍ ଯୋଗ ଦେବାକୁ ଯାଇଥିଲେ। ମାତ୍ର ସେଠାରେ କେତେକ ଖଲିସ୍ତାନୀ ସମର୍ଥକ ତାଙ୍କ ସହିତ ଯୁକ୍ତିତର୍କ କରିଥିଲେ। ଖଲିସ୍ତାନୀ ସମର୍ଥକମାନେ ତରନଜିତଙ୍କୁ କହିଥିଲେ ଯେ ତୁମେ ହରଦୀପ ସିଂହ ନିଜ୍ଜାରଙ୍କୁ ହତ୍ୟା କରିଛ ଓ ପନ୍ନୁନଙ୍କୁ ହତ୍ୟା ପାଇଁ ଷଡଯନ୍ତ୍ର କରିଥିଲ। ଏହା ସହିତ ସେମାନେ ଭାରତ ବିରୋଧୀ ସ୍ଲୋଗାନ ଦେଇଥିଲେ। ଭାରତୀୟ ରାଷ୍ଟ୍ରଦୂତଙ୍କୁ ଗୁରୁଦ୍ବାର ପରିସରରେ ହଇରାଣ କରାଯିବାର ଭିଡିଓ ସାମାଜିକ ଗଣମାଧ୍ୟମରେ ପ୍ରସାରିତ ହୋଇଛି। ଏହି ଘଟଣା ପରେ ତରନଜିତ୍ ସେଠାରୁ ପଳାଇ ଆସିଥିଲେ। ତରନଜିତ୍ ପଳାଇ ଆସିବା ପରେ ଜଣେ ସମର୍ଥକ ଗୁରୁଦ୍ବାର ବାହାରେ ଖଲିସ୍ତାନୀ ପତାକା ଉଡାଇଥିଲେ। ଏ ସମ୍ପର୍କରେ ତରନଜିତ କହିଛନ୍ତି ଯେ ଗୁରୁଦ୍ବାରରେ ଆୟୋଜିତ ସଙ୍ଗୀତ କାର୍ଯ୍ୟକ୍ରମରେ ଯୋଗ ଦେବା ଲାଗି ତାଙ୍କୁ ନିମନ୍ତ୍ରଣ କରାଯାଇଥିଲା। ସେଠାରେ ସେ ଗୁରୁ ନାନକଙ୍କ ଭଜନ କୀର୍ତ୍ତନ କରିବା ସହିତ ତାଙ୍କ ଅମର ବାଣୀର ଆଲୋଚନା କରିଥିଲେ। ମାତ୍ର ଗୁରୁଦ୍ବାର ପରିସରରେ ଯେଉଁ ଅପ୍ରୀତିକର ପରିସ୍ଥିତିର ସମ୍ମୁଖୀନ ହୋଇଥିଲେ ସେସମ୍ପର୍କରେ ତରନଜିତ୍ କିଛି କହି ନାହାନ୍ତି।
କାନାଡା ସହିତ ଆମେରିକା, ବ୍ରିଟେନ, ଅଷ୍ଟ୍ରେଲିଆରେ ଏବେ ଖଲିସ୍ତାନୀ ସପକ୍ଷବାଦୀ ଆନ୍ଦୋଳନ ଜୋର ଧରିବାରେ ଲାଗିଛି। ଗତ ଜୁଲାଇରେ ସାନଫ୍ରାନସିସ୍କୋସ୍ଥିତ ଭାରତୀୟ ବାଣିଜ୍ୟିକ ଦୂତାବାସ ଉପରେ ଖଲିସ୍ତାନୀ ବିଚ୍ଛିନ୍ନତାବାଦୀମାନେ ପୋଡାଜଳା କରିଥିଲେ। ସେପ୍ଟେମ୍ବର ମାସରେ ବ୍ରିଟେନସ୍ଥିତ ଭାରତୀୟ ଉଚ୍ଚାୟୁକ୍ତ ବିକ୍ରମ ଦୋରାସ୍ବାମୀ ସ୍କଟଲ୍ୟାଣ୍ଡର ଗ୍ଲାସଗୋସ୍ଥିତ ଏକ ଗୁରୁଦ୍ବାରକୁ ଯିବା ସମୟରେ ପ୍ରତିରୋଧର ସମ୍ମୁଖୀନ ହୋଇଥିଲେ। ଏହି ଘଟଣାକୁ ନେଇ ଭାରତ ସରକାର ବ୍ରିଟେନ ସରକାରଙ୍କ ନିକଟରେ ଉଦ୍ବେଗ ପ୍ରକାଶ କରିଥିଲେ। ସେହିପରି ଆମେରିକାସ୍ଥିତ ଶିଖ୍ ସଂଗଠନ ଶିଖ ଫର ଜଷ୍ଟିସ (ଏସଏଫ୍ଜେ)ର ନେତା ଗୁରୁପତୱନ୍ତ ସିଂହ ପନ୍ନୁନକୁ ହତ୍ୟା କରିବା ଲାଗି ଭାରତ ସରକାର ଷଡଯନ୍ତ୍ର କରିଥିବା ଅଭିଯୋଗ ହୋଇଥିଲା।
ନ୍ୟୁୟର୍କ ଗୁରୁଦ୍ବାରରେ ଗୁରୁପର୍ବ ଉତ୍ସବ : ଭାରତୀୟ ରାଷ୍ଟ୍ରଦୂତଙ୍କୁ ହଇରାଣ କଲେ ଖଲିସ୍ତାନୀ
Popular Categories
Previous article
Next article