ଗୁଣୁପୁର: ରାୟଗଡା ଜିଲ୍ଲା ପୁଟାସିଙ୍ଗ ଥାନା ଅନ୍ତର୍ଗତ ଗୁଡି ଗ୍ରାମରେ ସୋମବାର ଏକ ଅଭାବନୀୟ ଘଟଣା ଘଟିଛି । ପୁଅର ଗୁଳି ମାଡରେ ବାପାର ମୃତ୍ୟୁ ଘଟିଛି। ମୃତକ ହେଲେ କାନ୍ତିନ ଦଳ ବେହେରା।
ମିଳିଥିବା ସୂଚନା ଅନୁଯାୟୀ, ଗତ କାଲି ରାତିରେ ମୃତ କାନ୍ତିନ ଦଳ ବେହେରା ଓ ପୁଅ ମେଜ ଦଳ ବେହେରାଙ୍କ ମଧ୍ୟରେ କୌଣସି କଥାକୁ ନେଇ ବିବାଦ ହୋଇଥିଲା । ଘରେ ଥିବା ଦେଶୀ ବନ୍ଧୁକକୁ ନେଇ ଉଭୟଙ୍କ ମଧ୍ୟରେ ଟଣା ଓଟରା ହୋଇଥିଲା। ଏହି ସମୟରେ ବନ୍ଧୁକରୁ ଗୁଳି ଫୁଟି କାନ୍ତିନ ଦଳ ବେହେରାଙ୍କ ଦେହରେ ଆଘାତ ହୋଇଥିଲା। ଫଳରେ ଘଟଣାସ୍ଥଳରେ ସେ ଟଳି ପଡ଼ିଥିଲେ। ଖବର ପାଇ ଗୁଣୁପୁର ଓ ପୁଟାସିଙ୍ଗ ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରି ପୁଅକୁ ଅଟକ ରଖି ପଚରା ଉଚରା କରିବା ସହ ଦେଶୀ ବନ୍ଧୁକକୁ ଜବତ କରିଥିବା ଜଣାପଡିଛି । ପୁଲିସ ମୃତଦେହ ଜବତ କରି ଗୁଣୁପୁର ଉପଖଣ୍ଡ ଚିକିତ୍ସାଳୟରେ ବ୍ୟବଛେଦ କରାଇ ପରିବାର ବର୍ଗଙ୍କୁ ହସ୍ତାନ୍ତର କରିଛି। ତେବେ ପାରିବାରିକ କଳହରୁ ଏଭଳି ଅଘଟଣ ଘଟିଥିବା ପୁଲିସ ପକ୍ଷରୁ ସୂଚନା ମିଳିଛି।
