ଗୁଜରାଟ: ମାର୍ବିରେ ଝୁଲାପୋଲ ଛିଡ଼ିବା ଘଟଣାରେ ମୃତ୍ୟୁସଂଖ୍ୟା ବଢ଼ିବାରେ ଲାଗିଛି । ବର୍ତ୍ତମାନ ସୁଦ୍ଧା ଏହି ଦୁର୍ଘଟଣାରେ ୧୩୪ଜଣଙ୍କ ମୃତ୍ୟୁ ହୋଇଥିବା ନେଇ ପ୍ରଶାସନ ପକ୍ଷରୁ ସୂଚନା ଦିଆଯାଇଛି । ବର୍ତ୍ତମାନ ମଧ୍ୟ ଆଉ ୨ଜଣ ନିଖୋଜ ଥିବା କହିଛି ପୁଲିସ । ଗତକାଲି ଏହି ଦୁର୍ଘଟଣା ହୋଇଥିବା ବେଳେ ଏନଡିଆରଏଫ୍ ଓ ଏସଡିଆରଏଫ୍ ଟିମ୍ ଉଦ୍ଧାର କାର୍ଯ୍ୟ ଏବେ ବି ଜାରି ରଖିଛନ୍ତି । ରାତି ତମାମ ଉଦ୍ଧାର ପାଇଁ ପ୍ରାୟସ କରିଛନ୍ତି ଉଦ୍ଧାରକାରୀ ଦଳ । ଖାଲି ସେତିକି ନୁହେଁ, ବାୟୁ ସେନା ଓ ନୌସେନା ଟିମ୍ ମଧ୍ୟ ଉଦ୍ଧାର କାର୍ଯ୍ୟରେ ନିୟୋଜିତ ରହିଛନ୍ତି । ଘଟଣାକୁ ଗମ୍ଭୀରତାର ନେବା ସହ ଗୁଜରାଟ ସରକାର ଏସଆଇଟି ତଦନ୍ତ ପାଇଁ ନିର୍ଦେଶ ଦେଇଛନ୍ତି । ଏସଆଇଟିର ୫ ଜଣିଆ ସଦସ୍ୟ ଏହାର ତଦନ୍ତ କରିବେ ବୋଲି ଜଣାପଡ଼ିଛି । ଏହା ଏକ ବଡ଼ ଦୁର୍ଘଟଣା ହୋଇଥିବାରୁ ଘଟଣାକୁ ନେଇ ଏକ ଅପରାଧୀକ ମାମଲା ମଧ୍ୟ ରୁଜୁ କରାଯାଇଛି ।
ଖାଲି ସେତିକି ନୁହେଁ, ଝୁଲା ପୋଲର ରକ୍ଷଣାବେକ୍ଷଣ ଦାୟିତ୍ୱ ନେଇଥିବା ସଂସ୍ଥା ନାଁରେ ମାମଲା ରୁଜୁ ହୋଇଛି । ସମ୍ପୃକ୍ତ ସଂସ୍ଥା ନାଁରେ ଦଫା ୩୦୪, ୩୦୮ ଓ ୧୧୪ରେ ମାମଲା ରୁଜୁ କରାଯାଇଛି । ତାହା ସହ ସୁରକ୍ଷା ବ୍ୟବସ୍ଥା ଯାଞ୍ଚ ପୂର୍ବରୁ ଯାତାୟାତ ପାଇଁ ଝୁଲାପୋଲରେ ଅନୁମତି ଦେବାକୁ ନେଇ ମାମଲା ହୋଇଛି ।
ସୂଚନା ଥାଉ କି, ଗତକାଲି ସଂଧ୍ୟାରେ ମୋରବୀ ଜିଲାର ମଚ୍ଛୁ ନଦୀରେ ଥିବା ଝୁଲାପୋଲ ଛିଡ଼ିପଡ଼ିଥିଲା । ଫଳରେ ୬୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା । ଯାହାକି ବର୍ତ୍ତମାନ ମୃତ୍ୟୁସଂଖ୍ୟା ବଢ଼ି ୧୩୪ରେ ପହଞ୍ଚିଛି । ଏବେବ ବି ୨ଜଣ ଲୋକ ନିଖୋଜ ହୋଇଥିବା ଜଣାପଡ଼ିଛି । ତେଣୁ ମୃତ୍ୟୁସଂଖ୍ୟା ଆହୁରି ବଢ଼ିପାରେ ବୋଲି ଆଶଙ୍କା କରାଯାଉଛି । ଝୁଲାପୋଲ ଭୁଶୁଡ଼ିବା ବେଳେ ପୋଲରେ ପ୍ରାୟ ୫୦୦ର ଅଧିକ ଲୋକେ ଥିଲେ ।
