ମାସ୍କ ନ ପିନ୍ଧିଲେ କରିବାକୁ ହେବ କରୋନା କେନ୍ଦ୍ରରେ ସେବା

ମାସ୍କ ଏବଂ ସାମାଜିକ ଦୂରତା କରୋନା ଯୁଦ୍ଧର ବଡ଼ ଅସ୍ତ୍ର। ସେଥିଲାଗି ଉଭୟ କେନ୍ଦ୍ର ଏବଂ ରାଜ୍ୟ ସରକାର ଜନସାଧାରଣଙ୍କୁ ମାସ୍କ ପିନ୍ଧିବା ବାଧ୍ୟତାମୂଳକ କରିଛନ୍ତି। ଅନେକ ରାଜ୍ୟରେ ଏହି ନିୟମ ଉଲ୍ଲଂଘନକାରୀଙ୍କ ପାଇଁ ଜରିମାନା ଲାଗୁ କରାଯାଇଛି। କିନ୍ତୁ ନାଁ ଲୋକେ ମାସ୍କ ପିନ୍ଧୁଛନ୍ତି ନା ପ୍ରଶାସନ ପକ୍ଷରୁ ଜରିମାନା ଆଦାୟ ହେଉଛି। ଫଳରେ ଜନସାଧାରଣ ଆଉ ମାସ୍କ ପିନ୍ଧୁଥିବା ଦେଖିବାକୁ ମିଳୁନାହିଁ। ଏହି କାରଣରୁ କେତେକ ରାଜ୍ୟରେ ଏବେ ମଧ୍ୟ କରୋନା ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଥିବା ଦେଖାଯାଉଛି।

ଶୀତ ସମୟରେ ଭୂତାଣୁ ସଂକ୍ରମଣ ବୃଦ୍ଧି ପାଇବା ଆଶଙ୍କା କରାଯାଉଛି। ତେଣୁ ପୁଣି ଥରେ ଲକ୍‌ଡାଉନ, ସାମାଜିକ ଦୂରତା ଏବଂ ମାସ୍କ ପରିଧାନ ଉପରେ ଜୋର୍‌ ଦିଆଯାଉଛି। ଲୋକମାନେ ବି ସଚେତନ ହେଲେଣି। କିନ୍ତୁ ଅନେକ ସ୍ଥାନରେ ଅମାନିଆମାନେ ନିୟମ ମାନୁନାହାନ୍ତି। ସେମାନଙ୍କୁ ସାବାଡ଼ କରିବା ଲାଗି ଗୁଜରାଟ ହାଇକୋର୍ଟ ଏକ ଦୃଷ୍ଟାନ୍ତମୂଳକ ରାୟ ଶୁଣାଇଛନ୍ତି।

ବୁଧବାର ଗୁଜରାଟ ହାଇକୋର୍ଟ ଏ ସମ୍ପର୍କରେ ରାୟ ଦେଇ କହିଛନ୍ତି, ରାଜ୍ୟରେ ଯେଉଁ ବ୍ୟକ୍ତିମାନେ ମାସ୍କ ନ ପିନ୍ଧିବେ ସେମାନଙ୍କୁ ଦଣ୍ଡସ୍ବରୂପ କରୋନା କେନ୍ଦ୍ରରେ ସାମାଜିକ ସେବା କରିବାକୁ ପଡ଼ିବ। ଏ ନେଇ ଏକ ବିଜ୍ଞପ୍ତି ପ୍ରକାଶ କରିବା ସହିତ ଏହାକୁ କଡ଼ାକଡ଼ି ଭାବେ ପାଳନ କରିବାକୁ ହାଇକୋର୍ଟ ରାଜ୍ୟ ସରକାରଙ୍କୁ ନିର୍ଦେଶ ଦେଇଛନ୍ତି।

Gujarat High Court orders compulsory community service at COVID19 care centres for those who do not wear masks, directs State Government to issue a notification pic.twitter.com/7EMYx1kKbZ

— ANI (@ANI) December 2, 2020

ସୂଚନାଯୋଗ୍ୟ, ରାଜ୍ୟରେ ଏବେ ସୁଦ୍ଧା ୨ ଲକ୍ଷ ୧୧ ହଜାର ୯୫ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ସେଥିରୁ ୧ ଲକ୍ଷ ୯୨ ହଜାର ସୁସ୍ଥ ହୋଇଥିବାବେଳେ ୪୦୦୧ ଜଣ ପ୍ରାଣ ହରାଇଛନ୍ତି। ୧୪ ହଜାରରୁ ଅଧିକ ରୋଗୀ ଏବେ ବି ସକ୍ରିୟ ରହିଛନ୍ତି। ତେଣୁ ହାଇକୋର୍ଟଙ୍କ ଏହି ନିର୍ଦେଶ ପରେ ରାଜ୍ୟବାସୀ ମାସ୍କ ପିନ୍ଧିବାକୁ ବାଧ୍ୟ ହେବା ସହିତ କୋଭିଡ୍‌ ନିୟମ ପାଳନ କରିବେ ବୋଲି ଆଶା କରାଯାଉଛି।