ଭାବନଗର : ଗୁଜରାଟର ଭାବନଗରଠାରେ ପ୍ରସ୍ତାବିତ ଏକ ସରକାରୀ ତାପଜ ବିଦ୍ୟୁତ କେନ୍ଦ୍ର ପାଇଁ ଜମି ଅଧିଗ୍ରହଣକୁ ବିରୋଧ କରୁଥିବା ଚାଷୀଙ୍କ ଉପରେ ପୁଲିସ୍ ଲାଠିଚାର୍ଜ କରିବା ସହ ଲୁହ ବୁହା ଗ୍ୟାସ ମାଡ଼ କରିଛି। ଏଥିରେ ୧୦ ଚାଷୀ ଆହତ ହୋଇଛନ୍ତି । ପୁଲିସ୍ ୬୦ ଜଣ ଚାଷୀଙ୍କୁ ଗିରଫ କରିଛି । ପରିସ୍ଥିତିକୁ ଦୃଷ୍ଟିରେ ରଖି ଘଟଣାସ୍ଥଳରେ ୭୦୦ ପୁଲିସ୍ କର୍ମୀଙ୍କୁ ମୁତୟନ କରାଯାଇଛି ବୋଲି ଡିଏସ୍ପି ସୂଚନା ଦେଇଛନ୍ତି । ପ୍ରକାଶ ଯେ ସରକାରୀ ତାପଜ ବିଦ୍ୟୁତ୍ କେନ୍ଦ୍ର ପ୍ରତିଷ୍ଠା ପାଇଁ ରବିବାର ଭାବନଗରର ଧୋଧାଠାରେ ଜମି ଅଧିଗ୍ରହଣ ହେବାର ଥିଲା । ଏହାକୁ ପୂର୍ବରୁ ଚାଷୀ ବିରୋଧ କରି ଆସୁଥିଲେ । ରବିବାର ପୁଲିସ୍ ଓ ତାପଜ ବିଦ୍ୟୁତ୍ କେନ୍ଦ୍ର ଅଧିକାରୀ ଜମି ଅଧିଗ୍ରହଣ ପାଇଁ ପହଞ୍ଚିବା ପରେ ୧୨ଟି ଗ୍ରାମର ଚାଷୀ ସେଠାରେ ପହଞ୍ଚି ଏହାକୁ ବିରୋଧ କରି ବିକ୍ଷୋଭ ପ୍ରଦର୍ଶନ କରିଥିଲେ । ଫଳରେ ପୁଲିସ୍କୁ ଲାଠିଚାର୍ଜ କରିବାକୁ ପଡିଥିଲା ।
