ସେଦାନ୍, ଏସ୍ୟୁଭି ଉପରେ ଲାଗିପାରେ ଅଧିକ ସେସ୍
ନୂଆଦିଲ୍ଲୀ : ଦ୍ରବ୍ୟ ଏବଂ ସେବା କର (ଜିଏସ୍ଟି) ପରିଷଦର ଏକ ଗୁରୁତ୍ୱପୂର୍ଣ୍ଣ ବୈଠକ ଶୁକ୍ରବାର ବସିବାକୁ ଯାଉଛି। ତେବେ ପ୍ରଥମ ଥର ପାଇ ପରିଷଦ ବୈଠକ ଭିଡ଼ିଓ କନଫରେନ୍ସ ଜରିଆରେ ଅନୁଷ୍ଠିତ ହେବାକୁ ଯାଉଛି। ଜିଏସ୍ଟି ପରିଷଦର ୩୦ତମ ବୈଠକରେ କେନ୍ଦ୍ର ଅର୍ଥମନ୍ତ୍ରୀ ଅରୁଣ ଜେଟ୍ଲୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଭିଡ଼ିଓ କନଫରେନ୍ସରେ ରାଜ୍ୟଗୁଡିକର ଅର୍ଥମନ୍ତ୍ରୀ ସେମାନଙ୍କର ପ୍ରସ୍ତାବ ରଖିବେ। ଏଥିରେ କେନ୍ଦ୍ର ସରକାର ପ୍ରାକୃତିକ ଦୁର୍ବିପାକ ଯୋଗୁ କ୍ଷତିଗସ୍ତ ହୋଇଥିବା ରାଜ୍ୟଗୁଡିକ ନିମନ୍ତେ ଅତିରିକ୍ତ ପାଣ୍ଠି ସଂଗ୍ରହ ଲାଗି ପ୍ରାୟ କରିବେ। ଏହି ଅନୁଯାୟୀ ସେଦାନ୍ ଏବଂ ଏସ୍ୟୁଭି ଗାଡି ଉପରେ ଅଧିକ ସେସ୍ ଲାଗୁ ନେଇ ସରକାର ବୈଠକରେ ନିଷ୍ପତ୍ତି ଗ୍ରହଣ କରିପାରନ୍ତି।
ଶୁକ୍ରବାର ପୂର୍ବାହ୍ନ ୧୧ଟା ସମୟରେ ବସିବାକୁ ଥିବା ଜିଏସ୍ଟି ପରିଷଦର ଏହି ବୈଠକରେ ଭିଡ଼ିଓ କନଫରେନ୍ସରେ ରାଜ୍ୟ ଅର୍ଥ ମନ୍ତ୍ରୀ ତଥା ଜିଏସ୍ଟି ପରିଷଦ ସଦସ୍ୟ ଶଶିଭୂଷଣ ବେହେରା ଅଂଶଗ୍ରହଣ କରିବେ। ଭୁବନେଶ୍ୱସ୍ଥିତ ଭିଡ଼ିଓ କନ୍ଫରେନ୍ସିଂରେ ଶ୍ରୀ ବେହେରା ରାଜ୍ୟ ପାଇଁ ପ୍ରତିନିଧିତ୍ୱ କରିବେ। ଅତିରିକ୍ତ ମୁଖ୍ୟ ଶାସନ ସଚିବ (ଅର୍ଥ) ତୁହିନିକାନ୍ତ ପାଣ୍ଡେ, କମିଶନର (କମର୍ସିଆଲ ଟ୍ୟାକ୍ସ ଏବଂ ଜିଏସ୍ଟି) ଶାଶ୍ୱତ ମିଶ୍ରଙ୍କ ସମେତ ଅର୍ଥ ବିଭାଗର ଅନ୍ୟ ବରିଷ୍ଠ ପଦାଧିକାରୀ ଏହି ବୈଠକରେ ଯୋଗଦେବାର କାର୍ଯ୍ୟକ୍ରମ ରହିଛି।