ନୂଆଦିଲ୍ଲୀ : ବାରମ୍ବାର ମନେ ପକାଇବା ସତ୍ତ୍ବେ ଯେଉଁ ଟିକସଦାତାମାନେ ସେମାନଙ୍କର ଦ୍ରବ୍ୟ ଏବଂ ସେବା ଟିକସ (ଜିଏସ୍ଟି) ରିଟର୍ଣ୍ଣ ଦାଖଲ କରୁନାହାନ୍ତି ଏଣିକି ସେମାନଙ୍କର ସମ୍ପତ୍ତି ଜବତ କରାଯିବ। ଏହାଛଡା ଏଭଳି କ୍ଷେତ୍ରାରେ ଟିକସଦାତାଙ୍କ ବ୍ୟାଙ୍କ ଖାତା ମଧ୍ୟ ଜବତ କରାଯିବ ବୋଲି ଜଣାଯାଇଛି। କେନ୍ଦ୍ର ସରକାରଙ୍କ ପକ୍ଷରୁ ଅଣାଯାଇଥିବା ନୂଆ ନିୟମ ଟିକସ ଅଧିକାରୀଙ୍କୁ କରଦାତାଙ୍କ ବିରୋଧରେ ଉପରୋକ୍ତ ପଦକ୍ଷେପ ଗ୍ରହଣ ଅଧିକାର ଦେବ। ଟିକସ ନିୟମର ଉତ୍ତମ ଅନୁପାଳନ ଲାଗି ଗ୍ରହଣ କରାଯାଉଥିବା ରଣନୀତିର ଏହା ଏକ ଅଂଶ।
ମିଳିଥିବା ସୂଚନାନୁଯାୟୀ ଦେଶରେ ପ୍ରାୟ ୧ କୋଟିରୁ ଅଧିକ ଜିଏସ୍ଟି ପଞ୍ଜିକୃତ କମ୍ପାନୀ ସମୟାନୁଯାୟୀ ସେମାନଙ୍କର ରିଟର୍ଣ୍ଣ ଦାଖଲରେ ବିଫଳ ହୋଇଛନ୍ତି। ଏଭଳି ଟିକସ ଖିଲାପକାରୀଙ୍କ ବିରୋଧରେ କେନ୍ଦ୍ରୀୟ ପରୋକ୍ଷ କର ଏବଂ ସୀମା ଶୁଳ୍କ ବୋର୍ଡ ପକ୍ଷରୁ ଉପରୋକ୍ତ ପଦକ୍ଷେପ ଗ୍ରହଣ ଯୋଜନା କରାଯାଇଛି।
ଜିଏସ୍ଟିଆର ୩-ଏ ଏବଂ ଚୂଡାନ୍ତ ରିଟର୍ଣ୍ଣ ଦାଖଲର ୩ ଦିନ ପୂର୍ବରୁ ଟିକସ ଅଧିକାରୀ ଏ ନେଇ ତାଙ୍କର ପ୍ରକ୍ରିୟା ଆରମ୍ଭ କରିବେ। ସୂଚନାଯୋଗ୍ୟ ପ୍ରତି ମାସର ୨୦ ତାରିଖରେ ରିଟର୍ଣ୍ଣ ଦାଖଲ ଶେଷ ସମୟସୀମା ରହୁଛି। ଏହା ପରେ ଟିକସ ଅଧିକାରୀ ସିଷ୍ଟମ ଜରିଆରେ ସୃଷ୍ଟି ହୋଇଥିବା ମେସେଜ୍କୁ ସମସ୍ତ ଟିକସ ଖିଲାପକାରୀଙ୍କ ନିକଟକୁ ପଠାଇଦେବେ। ରିଟର୍ଣ୍ଣ ଦାଖଲ ସମୟସୀମା ପୂରିବାର ୫ ଦିନ ପରେ ଏକ ଇଲେକଟ୍ରୋନିକ୍ ମେସେଜ୍ କରଦାତାଙ୍କ ନିକଟକୁ ପଠାଇ ଦିଆଯିବ। ଯେଉଁଥିରେ ରିଟର୍ଣ୍ଣ ଦାଖଲ ଲାଗି ୧୫ ଦିନ ସମୟ ଦିଆଯିବ। ଯଦି କରଦାତା ଏହି ନିର୍ଦ୍ଧାରିତ ସମୟ ମଧ୍ୟରେ ଏହାର ପ୍ରତିକ୍ରିୟା ନ ଦିଅନ୍ତି ତେବେ ଟିକସ ଅଧିକାରୀ କରଦାତାଙ୍କର ଟିକସ ଦେୟ ପରିମାଣର ଅନୁଶୀଳନ କରିବେ।
Comments are closed.