ସୁଆଣ୍ଡୋ : ପୁଣ୍ୟାତ୍ମା ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଶ୍ରାଦ୍ଧ ଦିବସ ଅବସରରେ ଜନ୍ମମାଟି ସୁଆଣ୍ଡୋ ସ୍ଥିତ ଭାର୍ଗବୀ ନଦୀ କୂଳରେ ଗୋପବନ୍ଧୁ ସ୍ମୃତିପରିଷଦ ଆନୁକୁଲ୍ୟରେ ତିଳତର୍ପଣ ଅନୁଷ୍ଠିତ ହୋଇଯାଇଛି । ପୁଣ୍ୟାତ୍ମାଙ୍କ ବାସଭବନ ନିକଟରୁ ତିଳତର୍ପଣ ଯାତ୍ରା ଆରମ୍ଭ ହୋଇଥିଲା। ସହସ୍ରାଧିକ ଛାତ୍ରଛାତ୍ରୀ, ବୁଦ୍ଧିଜୀବୀ ଅଧ୍ୟାପକ, ଲେଖକ, କବି, ସମାଜ ସେବୀ, ଶିକ୍ଷକ, ସ୍ଥାନୀୟ ଲୋକପ୍ରତିନିଧି ଯୋଗ ଦେଇଥିଲେ। ଦାସ ପରିବାର ପକ୍ଷରୁ ପୁନରୁଦ୍ଧାର କରାଯାଇଥିବା ଗୋପବନ୍ଧୁଙ୍କ ଷଠିଘରକୁ ପଞ୍ଚାୟତ ସମିତି ଅଧ୍ୟକ୍ଷା ସସ୍ମିତା ପ୍ରଧାନ ଉଦ୍ଘାଟନ କରିଥିଲେ। ଅନୁଷ୍ଠିତ ଶ୍ରଦ୍ଧାଞ୍ଜଳି ସଭାରେ ସ୍ମୃତିପରିଷଦ ସଭାପତି ଧୀରେନ୍ଦ୍ର ନାଥ ଦାସ ଅଧ୍ୟକ୍ଷତା କରିଥିଲେ।
ଅନ୍ୟମାନଙ୍କ ମଧ୍ୟରେ ଜିଲାପରିଷଦ ସଭ୍ୟ ପ୍ରହଲାଦ ଘଟୁଆରୀ, ଧ୍ରୁବଚରଣ ଦାଶ, ରାଧାକାନ୍ତ ଦାଶ, ରତିକାନ୍ତ ମିଶ୍ର , ପ୍ରଫୁଲ୍ଲ କୁମାର ମହାପାତ୍ର, ସତ୍ୟନାରାୟଣ ସାହୁ, ଫକିର ଚରଣ ବରାଳ, ବସନ୍ତ କୁମାର ମିଶ୍ର ପ୍ରମୁଖ ଉପସ୍ଥିତ ଥିଲେ। ସ୍ମୃତିପରିଷଦ କାର୍ୟ୍ୟକାରୀ ସଭାପତି ଦେବେନ୍ଦ୍ର ନାଥ ଦାସ ସଭା ପରିଚାଳନା କରିଥିଲେ। ଷଠିଘରେ ମହାପୁରୁଷଙ୍କ ପ୍ରତିମୂର୍ତ୍ତିରେ ଅତିଥି ମାନେ ପୁଷ୍ପମାଲ୍ୟ, ଧୂପ, ଦୀପ ଦେଇ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। କାରାକବିତା ଓ ବନ୍ଦୀର ଆତ୍ମକଥା କବିତା ଛାତ୍ରଛାତ୍ରୀ ମାନେ ଷଠିଘରେ ଆବୃତ୍ତି କରିଥିଲେ। ଗୋପବନ୍ଧୁଙ୍କ ତିନି ପୁରୁଷଙ୍କ ନାମ ଗୋତ୍ରରେ ଚନ୍ଦନ ଫୁଲ ସହିତ କୁଳ ପୁରୋହିତ ଲକ୍ଷ୍ମୀକାନ୍ତ ନନ୍ଦ ବେଦମନ୍ତ୍ର ଆବୃତ୍ତି କରି ତିଳତର୍ପଣ କରାଯାଇଥିଲା। ଗୋପବନ୍ଧୁ ଅମର ରହେ ଧ୍ୱନୀରେ ନଦୀକୂଳରେ ଏକ ଭାବମୟ ପରିବେଶ ସୃଷ୍ଟି ହୋଇଥିଲା । ଛାତ୍ରଛାତ୍ରୀ ମାନେ ସ୍କାଉଟ୍ ଡ୍ରମ୍ ବଜାଇ ଯାଉଥିବା ବେଳେ କ୍ଷେତ୍ରପାଳୀ ମୃଦଙ୍ଗ ବାଦ୍ୟ ପରିଷଦ ପକ୍ଷରୁ ମୃଦଙ୍ଗ ଓ ଝାଞ୍ଜ ବଜା ଯାଇଥିଲା।
Comments are closed.