ଗ୍ୟାସ ସିଲିଣ୍ଡର ବିସ୍ଫୋରଣରେ ଚାଲିଗଲା ଦମ୍ପତ୍ତିଙ୍କ ଜୀବନ

ଖଣ୍ଡଗିରି :  ଗ୍ୟାସ ସିଲିଣ୍ଡର ବିସ୍ଫୋରଣରେ ରବିବାର ବିଳମ୍ବିତ ରାତିରେ ଦମ୍ପତ୍ତିଙ୍କ ମୃତ୍ୟୁ ଘଟିଛି । ଏଭଳି ଅଭାବନୀୟ ଘଟଣା ଘଟିଛି ଭରତପୁର ଥାନା ଅନ୍ତର୍ଗତ ସାଁପୁର ଜ୍ଞାନଦେବୀ ସାହିରେ । ମୃତ ଦମ୍ପତ୍ତି ହେଲେ ବିଦେଶୀ ପ୍ରଧାନ(୬୦) ଓ ତାଙ୍କ ପତ୍ନୀ କସ୍ତୁରୀ ପ୍ରଧାନ(୫୮) । ଖବର ପାଇ ଭରତପୁର ଥାନା ପୁଲିସ ଓ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବା ସହ ଦମ୍ପତ୍ତିଙ୍କୁ ଗୁରୁତର ଅବସ୍ଥାରେ ସମ୍ ହସ୍ପିଟାଲରେ ଭର୍ତ୍ତି କରିଥିଲେ। ଦମ୍ପତ୍ତିଙ୍କ ଶରୀରର ପ୍ରାୟ ୮୦ ପ୍ରତିଶତ ପୋଡି ଯାଇଥିବାରୁ ସୋମବାର ଉଭୟ ସ୍ବାମୀ ସ୍ତ୍ରୀଙ୍କର ମୃତ୍ୟୁ ଘଟିଛି । ଗ୍ୟାସ ସିଲିଣ୍ଡର ଫାଟି ଯିବାରୁ ତାଙ୍କର ମୃତ୍ୟୁ ଘଟିଥିବା କହିଛନ୍ତି ଭରତପୁର ଥାନା ଅଧିକାରୀ । ଅନ୍ୟ ପଟେ ପୁଲିସ ଦୁଇଟି ଯାକ ମୃତ ଦେହକୁ ଜବତ କରି ଘଟଣାର ତଦନ୍ତ ଜାରି ରଖିଛି ।
ମିଳିଥିବା ସୂଚନା ଅନୁସାରେ ରବିବାର ରାତିରେ ଶ୍ରୀ ପ୍ରଧାନଙ୍କ ଗ୍ୟାସ ଟାଙ୍କି ଲିକ୍ ହୋଇଥିଲା। କିନ୍ତୁ ଶ୍ରୀ ପ୍ରଧାନଙ୍କ ସ୍ତ୍ରୀ କସ୍ତୁରୀ ଏହା ଜାଣିପାରି ନଥିଲେ। ଶୋଇବାକୁ ଗଲାବେଳେ ମଶାଙ୍କ ପ୍ରାଦୃଭାବ ଯୋଗୁ ମଶା ଧୂପ ଜଳୁଥିବା ସମୟରେ ହଠାତ୍‌ ଗ୍ୟାସରୁ ନିଆଁ ବାହାରିବା ସହ ବିସ୍ଫୋରଣ ହୋଇଥିଲା । ବିସ୍ପୋରଣ ଏତେ ଭୟଙ୍କର ଥିଲା ଯେ ଏହାର ଶବ୍ଦରେ ସ୍ଥାନୀୟ ଲୋକେ ଚମକି ପଡ଼ିଥିଲେ। ତେଣୁ କିଛି ସ୍ଥାନୀୟ ଲୋକ ଘଟଣା ସ୍ଥଳକୁ ଦୌଡ଼ି ଆସିଥିଲେ। ଦେଖିବା ବେଳକୁ ଶ୍ରୀ ପ୍ରଧାନଙ୍କ ଘରେ ଗ୍ୟାସ ଟାଙ୍କି ବିସ୍ଫୋରଣ ଘଟିଛି । ସଙ୍ଗେ ସଙ୍ଗେ ନିଆଁକୁ ଆୟତ୍ତ କରିବାକୁ ଉଦ୍ୟମ କରି ବିଫଳ ହୋଇଥିଲେ। ତେଣୁ ଅଗ୍ନିଶମ ବାହିନୀ ଓ ଭରତପୁର ଥାନାକୁ ଖବର ଦେଇଥିଲେ। ଖବର ପାଇ ଅଗ୍ନିଶମ ବାହିନୀ ଓ ଭରତପୁର ଥାନା ପୁଲିସ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା। ତେବେ ସେତେ ବେଳକୁ ଦମ୍ପତ୍ତି ଦ୍ୱୟ ପ୍ରାୟ ୮୦ ପ୍ରତିଶତ ପୋଡି ଯାଇଥିଲେ । ବୃଦ୍ଧ ଦମ୍ପତିଙ୍କୁ ତୁରନ୍ତ ଚିକିତ୍ସା ପାଇଁ ସ୍ଥାନୀୟ ସମ୍ ହସ୍ପିଟାଲରେ ଭର୍ତ୍ତି କରାଯାଇଥିଲା। ଆଜି ଚିକିତ୍ସାଧୀନ ଅବସ୍ଥାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତିି । ପୁଲିସ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିଛି ।