ପ୍ରଭୁ ଗଣେଶଙ୍କର ବହୁ ରୂପ ରହିଛି। ମଧ୍ୟପ୍ରଦେଶର ମହେଶ୍ୱରରେ ମହାବୀର ମାର୍ଗରେ ଥିବା ପ୍ରଭୁ ଶ୍ରୀ ଗଣେଶଙ୍କର ମୂର୍ତ୍ତି ଗୋବରରେ ପ୍ରସ୍ତୁତ ହୋଇଛି। ଏହା ବହୁ ହଜାର ବର୍ଷ ପୁରୁଣା ମନ୍ଦିର। ନଡ଼ିଆ ଅର୍ପଣ କରି ଏଠାରେ ସମସ୍ତ ମନସ୍କାମନା ପୂରଣ ହୁଏ ବୋଲି କୁହାଯାଇଥାଏ।
ମଥାରେ ମୁକୁଟ, ଗଳାରେ ହାର, ସୁନ୍ଦର ଶୃଙ୍ଗାରରେ ବିରାଜିତ ପ୍ରଭୁଙ୍କର ଏହି ରୂପ ବେଶ ମନମୁଗ୍ଧକର ଅଟେ। ଭକ୍ତଙ୍କର ସମସ୍ତ ଦୁଃଖଦୁର୍ଦ୍ଦଶାଙ୍କୁ ପ୍ରଭୁ ଦୂର କରିଥାଆନ୍ତି। ଏକ ଦିବ୍ୟ ଓ ଭବ୍ୟ ରୂପରେ ଏଠାରେ ପ୍ରଭୁ ଦର୍ଶନ ଦେଇଥାଆନ୍ତି।
ମାଟି ଏବଂ ଗୋବରରେ ପ୍ରସ୍ତୁତ ମୂର୍ତ୍ତିମାନଙ୍କରେ ପଞ୍ଚତତ୍ତ୍ୱର ବାସ ହୋଇଥାଏ। ବିଶେଷ କରି ଗୋବରରେ ମା’ଲକ୍ଷ୍ମୀଙ୍କର ବାସ ହୋଇଥାଏ। ତେଣୁ ପ୍ରଭୁଙ୍କର ଏହି ମନ୍ଦିରକୁ ଆସୁଥିବା ଭକ୍ତମାନଙ୍କୁ, ପ୍ରଭୁ ଗଣେଶଙ୍କ ସହ ମା’ଲକ୍ଷ୍ମୀଙ୍କର ଆଶୀର୍ବାଦ ମଧ୍ୟ ମିଳିଥାଏ।
ଏହି ମନ୍ଦିରରେ ପ୍ରଭୁ ନିଜର ଦୁଇ ପତ୍ନୀଙ୍କ ସହ ଦର୍ଶନ ଦେଇଥାଆନ୍ତି ଓ ଲୋକଙ୍କୁ କଲ୍ୟାଣ ମଧ୍ୟ କରିଥାଆନ୍ତି। ଭକ୍ତଙ୍କର ବିଶ୍ୱାସ ରହିଛି ଯେ ଏଠାକୁ ଆସି ଯେ କେହି ପ୍ରଭୁଙ୍କୁ ଦର୍ଶନ କଲେ ଦୁଃଖଦୁର୍ଦ୍ଦଶା ଦୂର ହେବା ସହ ସମସ୍ତ ଇଚ୍ଛା ପୂରଣ ହୋଇଥାଏ। ଭକ୍ତମାନେ ଏଠାରେ ଓଲଟା ସ୍ୱସ୍ତିକ କରି ଭଗବାନଙ୍କ ନିକଟରେ ନିଜର ମାନସିକ ଓ ଇଚ୍ଛା ଜଣାନ୍ତି। ତାହା ପୂରଣ ହେବା ପରେ ଏଠାକୁ ଆସି ସିଧା ସ୍ୱସ୍ତିକ ଚିହ୍ନ କରିଥାଆନ୍ତି।
ବର୍ଷଯାକ ଏଠାରେ ବହୁ ଭିଡ଼ ପରିଲକ୍ଷିତ ହୋଇଥାଏ। ମାତ୍ର ଗଣେଶ ପୂଜା ଓ ଦୀପାବଳୀ ସମୟରେ ଏଠାରେ ଅଧିକ ଭକ୍ତଙ୍କ ସମାଗମ ହୋଇଥାଏ।
ଗମନାଗମନ ଦୃଷ୍ଟିରୁ ଏଠାକୁ ଯିବା ପାଇଁ ଟ୍ରେନର ବ୍ୟବସ୍ଥା ରହିଛି। ଏଠାକାର ନିକଟତର ରେଳ ଷ୍ଟେସନ ଚିତାମନ ଗଣେଶ ଷ୍ଟେସନ, ଖଜୁରାହୋ, ଭୋପାଲ ଜଙ୍କସନ ଅଟେ। ସେଠାରୁ ଟ୍ୟାକ୍ସିରେ ଏହି ମନ୍ଦିରକୁ ଯାଇପାରିବେ।
