ପ୍ୟାରିସ: ଚୀନ ରାଷ୍ଟ୍ରପତି ସି ଜିନ୍ପିଙ୍ଗ ଫ୍ରାନ୍ସ ଗସ୍ତରେ ଯାଇ ପ୍ୟାରିସରେ ପହଞ୍ଚିଛନ୍ତି। ଏହି ସମୟରେ ଉଭୟ ଫ୍ରାନ୍ସ ଏବଂ ଚୀନ ମଧ୍ୟରେ ଦ୍ବିପାକ୍ଷିକ ସମ୍ପର୍କ ସମେତ ଅନ୍ୟ କିଛି ଗୁରୁତ୍ଵପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହୋଇପାରେ। ତେବେ ଜିନ୍ପିଙ୍ଗ ପ୍ୟାରିସରେ ପହଞ୍ଚିବା ପରେ ସେଠାରେ ‘ତିବ୍ବତକୁ ମୁକ୍ତ କର’ ନାରା ଶୁଣିବାକୁ ମିଳିଛି। ତିବ୍ବତୀୟ ବିକ୍ଷୋଭକାରୀମାନେ ରାସ୍ତାକୁ ଆସି ଜିନ୍ପିଙ୍ଗଙ୍କ ବିରୋଧରେ ନାରା ଦେଇଛନ୍ତି।
ଚୀନର ପିପୁଲ୍ସ ରିପବ୍ଲିକ ଅଫ୍ ଚାଇନା (ପିଆରସି) ୧୯୫୧ରେ ଚାମ୍ଡୋ ଯୁଦ୍ଧ ପରେ ତିବ୍ବତକୁ ଅକ୍ତିଆର କରିଥିଲା। ଚୀନର କମ୍ୟୁନିଷ୍ଟ ପାର୍ଟି ଏହାକୁ ତିବ୍ବତର ଶାନ୍ତିପୂର୍ଣ୍ଣ ମୁକ୍ତି ବୋଲି ଦର୍ଶାଉଥିବାବେଳେ କେନ୍ଦ୍ରୀୟ ତିବ୍ବତୀୟ ପ୍ରଶାସନ ଏବଂ ବିଦେଶରେ ରହୁଥିବା ତିବ୍ବଦ ନାଗରିକ ଏହାକୁ ଚୀନର ଦାଦାଗିରି ବୋଲି କୁହନ୍ତି। ତେଣୁ ଜିନପିଙ୍ଗ ଫ୍ରାନ୍ସ ଗସ୍ତ କରିବା ଅବସରରେ ସେଠାରେ ରହୁଥିବା ତିବ୍ବତ ନାଗରିକ ତାଙ୍କୁ ପ୍ରବଳ ବିରୋଧ କରିଛନ୍ତି।
ଉଲ୍ଲେଖ ଯେ, ଫ୍ରାନ୍ସ ଏବଂ ଚୀନ ମଧ୍ୟରେ କୂଟନୈତିକ ସମ୍ପର୍କକୁ ୬୦ ବର୍ଷ ପୂରଣ ହୋଇଛି। ଗତବର୍ଷ ଫ୍ରାନ୍ସ ରାଷ୍ଟ୍ରପତି ଏମାନୁଏଲ ମାକ୍ରନ ଚୀନ ଗସ୍ତ କରିଥିଲେ।
Comments are closed.