ଟୋକିଓ : ମାନବୀୟ ସହାୟତା ପାଇଁ ଇସ୍ରାଏଲ–ହମାସ ବିବାଦରେ ଯୁଦ୍ଧ ବିରତି ପାଇଁ ଜି-୭ ଦେଶ ଗୁଡ଼ିକର ବିଦେଶ ମନ୍ତ୍ରୀମାନେ ଆହ୍ୱାନ ଦେଇଛନ୍ତି।
ବୁଧବାର ସନ୍ଧ୍ୟାରେ ଟୋକିଓରେ ଜି-୭ ବୈଦେଶିକ ମନ୍ତ୍ରୀମାନଙ୍କ ବୈଠକ ଶେଷ ହୋଇଛି । ଜାପାନ ବୈଦେଶିକ ମନ୍ତ୍ରୀ କାମିକାୱା ୟୋକୋ ଦୁଇଦିନ ଧରି ଚାଲିଥିବା ବୈଠକର ଫଳାଫଳ ବିଷୟରେ ଏକ ସାମ୍ବାଦିକ ସମ୍ମିଳନୀରେ
ଘୋଷଣା କରିଛନ୍ତି । ଜି-୭ ବୈଦେଶିକ ମନ୍ତ୍ରୀମାନେ ହମାସ ଓ ଅନ୍ୟ ଗୋଷ୍ଠୀଗୁଡ଼ିକ ଦ୍ୱାରା ସନ୍ତ୍ରାସବାଦୀ ଆକ୍ରମଣ ଗୁଡ଼ିକୁ କଟୁଭାଷାରେ ନିନ୍ଦା କରିଛନ୍ତି ଓ ପଣବନ୍ଦୀ ମାନଙ୍କୁ ଶୀଘ୍ର ମୁକ୍ତ କରାଯିବାକୁ ଚାହିଁଛନ୍ତି । ଗାଜା ଷ୍ଟ୍ରିପ୍ରେ ମାନବୀୟ ସଂକଟର ଅବସାନ ପାଇଁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ ଉପରେ ସେମାନେ ଏକମତ ହୋଇଛନ୍ତି। ଏଥିପାଇଁ ମାବନୀୟ କରିଡର ସ୍ଥାପନ ସକାଶେ ଯୁଦ୍ଧବିରତି ଲାଗି ସେମାନେ ସମର୍ଥନ କରିଛନ୍ତି।
ଜି-୭ ଦେଶ ଗୁଡ଼ିକର ବୈଦେଶିକ ମନ୍ତ୍ରୀମାନେ ଦ୍ୱିପକ୍ଷୀୟ ସମାଧାନ ପନ୍ଥା ବାହାର କରାଯିବାକୁ କହିଛନ୍ତି। ଏହି ସମାଧାନ ଅନୁସାରେ ଇସ୍ରାଏଲ ଏକ ସ୍ୱାଧୀନ ପାଲେଷ୍ଟିନୀୟ ରାଷ୍ଟ୍ର ସହ ସହାବସ୍ଥାନ କରିବାକୁ କୁହାଯାଇଛି। ଏହା ଦ୍ୱାରା ସେଠାରେ ସ୍ଥାୟୀ ଶାନ୍ତି ସ୍ଥାପନ ହୋଇପାରିବ ବୋଲି ସେମାନେ କହିଛନ୍ତି । ବୈଠକରେ ପ୍ରକାଶିତ ବିବୃତ୍ତିରେ ଆନ୍ତର୍ଜାତିକ ଆଇନ ଅନୁସାରେ ନିଜକୁ ସୁରକ୍ଷିତ ରଖିବା ପାଇଁ ଇସ୍ରାଏଲର ଅଧିକାରକୁ ସ୍ୱୀକୃତି ପ୍ରଦାନ କରାଯାଇଛି।
