ସମ୍ବଲପୁରରେ ପୁଲିସର ଫ୍ଲାଗମାର୍ଚ୍ଚ

ସମ୍ବଲପୁର: ଆଗାମୀ ୨୫ ତାରିଖରେ ହାଇପ୍ରୋଫାଇଲ ଲୋକସଭା ଆସନ ସମ୍ବଲପୁର ପାଇଁ ଭୋଟର ମତଦାନ କରିବେ। ପକ୍ଷପାତ ମୁକ୍ତ ନିର୍ବାଚନ ପାଇଁ ପୁଲିସ ବିଭାଗ ସମେତ ବିଭିନ୍ନ ସୁରକ୍ଷା ଏଜେନ୍ସିମାନଙ୍କ ତରଫରୁ କଡା ସୁରକ୍ଷା ବ୍ୟବସ୍ଥା କରାଯାଉଛି। ଗତ ୨୦୨୩ ଏପ୍ରିଲ ୧୨ ଓ ୧୪ ତାରିଖରେ ହନୁମାନ ଜୟନ୍ତୀ ଉତ୍ସବ ପାଳନ ସମୟରେ ସାମ୍ପ୍ରଦାୟିକ ହିଂସା ଘଟିଥିବାରୁ ପୁଲିସ ପ୍ରଶାସନ ବେଶ ସତର୍କ ରହିଛି। ଏଣୁ ନିୟମିତ ନିର୍ବାଚନ ଆୟୋଗର ନିର୍ଦ୍ଦେଶକ୍ରମେ ସମ୍ବଲପୁରରେ ଫ୍ଲାଗମାର୍ଚ କରାଯାଉଛି।

ଏହି କ୍ରମରେ ବୁଧବାର ଉତ୍ତରାଞ୍ଚଳ ପୁଲିସ ରେଞ୍ଜ ଆଇଜି ହିମାଂଶୁ ଲାଲ ଓ ସମ୍ବଲପୁର ଏସପି ମୁକେଶ ଭାମୁଙ୍କ ନେତୃତ୍ୱରେ ସହରର ମୁଖ୍ୟ ସଡକଗୁଡିକରେ ପୁଲିସ ଫ୍ଲାଗମାର୍ଚ କରିଛି। ସମସ୍ତଙ୍କୁ ଶାନ୍ତିପୂର୍ଣ୍ଣ ଭାବରେ ମତଦାନ କରିବାକୁ ଅପିଲ କରାଯାଇଛି। ସମ୍ବଲପୁର ସହରର ବିଭିନ୍ନ ପ୍ରମୁଖ ଛକଗୁଡିକରେ ପୁଲିସ ଫୋର୍ସ ମୁତୟନ ହେବା ସହିତ ସହରର ସୀମାଗୁଡିକରେ ଚେକିଂ କରାଯାଉଛି। ସୀମାଗୁଡିକ ସମେତ ସ୍ପର୍ଶକାତର ଅଞ୍ଚଳଗୁଡିକରେ ସିସିଟିଭି ଜରିଆରେ ମଧ୍ୟ ନଜର ରଖାଯାଇଛି। ଜିଲାର ସମ୍ବେଦନଶୀଳ ବୁଥଗୁଡିକ ଚିହ୍ନଟ କରାଯାଇ ଅତିରିକ୍ତ ସୁରକ୍ଷା ବ୍ୟବସ୍ଥା କରାଯାଇଛି। ରାତିରେ ଭୋଟରମାନଙ୍କୁ ପ୍ରଲୋଭନ ଦେଖାଇ ବେଆଇନ ଭାବରେ ଟଙ୍କା କାରବାରକୁ ରୋକିବାକୁ ମଧ୍ୟ ସ୍ୱତନ୍ତ୍ର ଦଳ ଗଠନ କରାଯାଇଛି ବୋଲି ପୁଲିସ ବିଭାଗ ପକ୍ଷରୁ ସୂଚନା ଦିଆଯାଇଛି।