ଡେସ୍କ: ଦେଶରେ ଜାତୀୟ ପତାକା ତ୍ରିରଙ୍ଗା ଉଡାଇବା ନେଇ ଥିବା କେତେକ ନିୟମରେ ପରିବର୍ତ୍ତନ କରାଯାଇଛି। ଏହି ପରିବର୍ତ୍ତନ ଅନୁଯାୟୀ ଏଣିକି ଉଭୟ ଦିନ ଓ ରାତି ଜାତୀୟ ପତାକା ଉଡାଇ ହେବ ଏବଂ ମେସିନ ତିଆରି ଜାତୀୟ ପତାକା ବ୍ୟବହାର କରାଯାଇପାରିବ।
ସରକାର ‘ଆଜାଦୀ କା ଅମୃତ ମହୋତ୍ସବ’ର ଅଂଶ ଭାବରେ ଅଗଷ୍ଟ ୧୩ରୁ ୧୫ ପର୍ଯ୍ୟନ୍ତ ‘ହର ଘର ତ୍ରିରଙ୍ଗା’ ଆରମ୍ଭ କରିବାକୁ ଯାଉଛନ୍ତି। ସମସ୍ତ କେନ୍ଦ୍ରୀୟ ମନ୍ତ୍ରଣାଳୟ ଏବଂ ବିଭାଗର ସଚିବମାନଙ୍କୁ ଲେଖିଥିବା ପତ୍ରରେ କେନ୍ଦ୍ର ଗୃହ ସଚିବ ଅଜୟ ଭାଲା ଦର୍ଶାଇଛନ୍ତି ଯେ ଭାରତୀୟ ଜାତୀୟ ପତାକା ପ୍ରଦର୍ଶନ, ଉତ୍ତୋଳନ ଏବଂ ବ୍ୟବହାର ଫ୍ଲାଗ୍ କୋଡ୍ ଅଫ୍ ଇଣ୍ଡିଆ, ୨୦୦୨ ଏବଂ ଜାତୀୟ ସମ୍ମାନ ଆଇନ ୧୯୭୧ ଦ୍ୱାରା ପରିଚାଳିତ।
ଏଥିରେ ହୋଇଥିବା ସଂଶୋଧନ ଅନୁଯାୟୀ, ଖୋଲା ସ୍ଥାନରେ କିମ୍ବା ଜନସାଧାରଣଙ୍କ ଘରେ ପ୍ରଦର୍ଶନ ବେଳେ ଦିନରାତି ଜାତୀୟ ପତାକା ଉଡ଼ିପାରିବ। ଏହା ପୂର୍ବରୁ ପାଣିପାଗ ଯାହା ଥିଲେ ମଧ୍ୟ ସୂର୍ଯ୍ୟୋଦୟରୁ ସୂର୍ଯ୍ୟୋଦୟ ପର୍ଯ୍ୟନ୍ତ ତ୍ରିରଙ୍ଗା ଉଡ଼ିବାକୁ ଅନୁମତି ଦିଆଯାଇଛି। ସେହିପରି ଜାତୀୟ ପତାକା ହାତ ବୁଣା କିମ୍ବା ଯନ୍ତ୍ରରେ ତିଆରି ହେବା ସହ ତାହା ସୂତା, ପଲିଷ୍ଟର, ପଶମ ଓ ରେଶମରେ ତିଆରି ହେବ ବୋଲି କୁହାଯାଇଛି। ପୂର୍ବରୁ ମେସିନ୍ ନିର୍ମିତ ଏବଂ ପଲିଷ୍ଟର ପତାକା ବ୍ୟବହାର କରିବାକୁ ଅନୁମତି ନ ଥିଲା।
ସ୍ୱାଧୀନ ଭାରତର ୭୫ ବର୍ଷକୁ ସ୍ମରଣ କରିବା ପାଇଁ ଆଜାଦୀ କା ଅମୃତ ମହୋତ୍ସବ ପାଳନ କରାଯାଉଛି। ନାଗରିକମାନଙ୍କୁ ଅଗଷ୍ଟ ୧୩ରୁ ୧୫ ପର୍ଯ୍ୟନ୍ତ ନିଜ ଘରେ ଜାତୀୟ ପତାକା ଉତ୍ତୋଳନ କରିବାକୁ ଉତ୍ସାହିତ କରିବା ପାଇଁ ‘ହର ଘର ତ୍ରିରଙ୍ଗା’ ଅଭିଯାନ ଆରମ୍ଭ କରାଯାଇଛି।
