ଭୁବନେଶ୍ୱର: ଓଡିଶା ବଜାରରେ ବିକ୍ରି ହେଉଥିବା ମାଛରେ ଫର୍ମାଲିନ ମିଶି ନ ଥିବା ସ୍ପଷ୍ଟ ହୋଇଛି। ମାଛରେ ଫର୍ମାଲିନ ମିଶୁଥିବା ଖବର ପ୍ରକାଶ ପାଇବା ପରେ ଖାଦ୍ୟ ସୁରକ୍ଷା ଅଧିକାରୀମାନେ ରାଜ୍ୟର ବିଭିନ୍ନ ମାଛ ଗୋଦାମ ଉପରେ ଚଢଉ କରି ନମୁନା ସଂଗ୍ରହ କରିଥିଲେ। ରବିବାର ସୁଦ୍ଧା ୨୦ଟି ଜିଲାରୁ ମୋଟ ୧୩୭ଟି ନମୁନା ସଂଗ୍ରହ କରାଯାଇ ଖାଦ୍ୟସୁରକ୍ଷା ପରୀକ୍ଷାଗାରକୁ ପଠାଯାଇଥିଲା। ସେଥିରୁ ୮୯ଟି ନମୁନା ପରୀକ୍ଷା କରାଯାଇଥିବା ବେଳେ ମାଛରେ ଫର୍ମାଲିନ ମିଶି ନଥିବା ଜଣା ପଡିଥିବା ସ୍ୱାସ୍ଥ୍ୟ ଓ ପରିବାର କଲ୍ୟାଣ, ଆଇନ, ସୂଚନା ଓ ଲୋକସମ୍ପର୍କ ବିଭାଗ ମନ୍ତ୍ରୀ ପ୍ରତାପ ଜେନା ସୂଚନା ଦେଇଛନ୍ତି।
ଓଡିଶା ବଜାରରେ ମିଳୁଥିବା ମାଛରେ ଫର୍ମାଲିନ ନାହିଁ ବୋଲି ସୂଚନା ମିଳିବା ପରେ ଲୋକେ ଆତଙ୍କିତ ନ ହେବାକୁ ପରାମର୍ଶ ଦିଆଯାଇଛି। ବର୍ତ୍ତମାନ ସୁଦ୍ଧା ଖାଦ୍ୟ ସୁରକ୍ଷା କମିଶନର ଅର୍ଚ୍ଚନା ପଟ୍ଟନାୟକଙ୍କ ତତ୍ତ୍ୱାବଧାନରେ ମାଛର ଯାଞ୍ଚ ପ୍ରକ୍ରିୟା ଜାରି ରହିଛି। ଏହା ଆଗକୁ ଜାରି ରହିବ ବୋଲି ମନ୍ତ୍ରୀ ଶ୍ରୀ ଜେନା କହିଛନ୍ତି।
