ଟୋକିଓ: ପ୍ରେମରେ ପ୍ରତାରଣାର ଏକ ନିଆରା ମାମଲା ସାମ୍ନାକୁ ଆସିଛି। ଜଣେ ଜାପାନୀ ମହିଳାଙ୍କଠାରୁ ଜଣେ ବ୍ୟକ୍ତି ଋଷୀୟ ମହାକାଶଚାରୀ ବୋଲି ପରିଚୟ ଦେଇ ୨୫ ଲକ୍ଷ ଟଙ୍କା ଠକି ନେଇଛନ୍ତି। ଅଭିଯୁକ୍ତ କହିଥିଲେ ଯେ, ସେ ଅନ୍ତର୍ଜାତୀୟ ସ୍ପେସ୍ ଷ୍ଟେସନ(ଆଇଏସଏସ)ରେ କାମ କରୁଛନ୍ତି ଏବଂ ବିବାହ କରିବା ପାଇଁ ପୃଥିବୀକୁ ଫେରିବାକୁ ତାଙ୍କୁ ଟଙ୍କା ଆବଶ୍ୟକ।
ଜାପାନର ଶିଗା ଅଞ୍ଚଳରେ ବାସ କରୁଥିବା ଜଣେ ୬୫ ବର୍ଷୀୟା ମହିଳା ଚଳିତ ବର୍ଷ ଜୁନ୍ ମାସରେ ଇନଷ୍ଟାଗ୍ରାମରେ ସେହି ବ୍ୟକ୍ତିଙ୍କୁ ଭେଟିଥିଲେ। ସେହି ବ୍ୟକ୍ତିଙ୍କ ପ୍ରୋଫାଇଲ୍ ମହାକାଶ ଫଟୋରେ ପରିପୂର୍ଣ୍ଣ ଥିଲା। ଦୁହେଁ କଥାବର୍ତ୍ତା ଆରମ୍ଭ କଲେ ଏବଂ ଏହାପରେ ସେମାନଙ୍କର ବାର୍ତ୍ତାଳାପକୁ ଏକ ଜାପାନୀ ମେସେଜିଂ ଆପ୍ଲିକେସନକୁ ସ୍ଥାନାନ୍ତର କରିଥିଲେ। କିଛିଦିନ ପରେ ପୁରୁଷ ଜଣକ ମହିଳାଙ୍କୁ କହିଥିଲେ ଯେ, ସେ ତାଙ୍କୁ ଭଲପାଆନ୍ତି ଓ ଜାପାନ ଯାଇ ତାଙ୍କୁ ବିବାହ କରିବାକୁ ଚାହାନ୍ତି। କିନ୍ତୁ ଏଥିରେ ସମସ୍ୟା ହେଉଛି, ସେ ମହାକାଶରେ ଫଶି ରହିଛନ୍ତି ଓ ତାଙ୍କୁ ପୃଥିବୀକୁ ଫେରିବାକୁ ଧନର ଆବଶ୍ୟକତା ରହିଛି। ପୁରୁଷ ଜଣଙ୍କ ତାଙ୍କୁ କହିଥିଲେ, ତୁମକୁ ରକେଟ୍ ଅବତରଣ ପାଇଁ ଟଙ୍କା ଦେବାକୁ ପଡ଼ିବ, ଯାହାକି ମୋତେ ଜାପାନରେ ପହଞ୍ଚାଇ ପାରିବ।
ଖବର ଅନୁଯାୟୀ, ଅଗଷ୍ଟ ୧୯ରୁ ସେପ୍ଟେମ୍ବର ୫ ମଧ୍ୟରେ ମହିଳା ଜଣଙ୍କ ତାଙ୍କୁ ପ୍ରାୟ ୨୫ ଲକ୍ଷ ଟଙ୍କା ପଠାଇଥିଲେ। ଏହାପରେ ସେ ଅଧିକ ଟଙ୍କା ମାଗିବାରୁ ଜାପାନୀ ମହିଳାଙ୍କ ସନ୍ଦେହ ହୋଇଥିଲା ଓ ସେ ପୁଲିସରେ ଅଭିଯୋଗ କରିଥିଲେ। ଜାପାନ ପୁଲିସ ‘ରୋମାନ୍ସ ସ୍କାମ’ ଅଧୀନରେ ମାମଲାର ତଦନ୍ତ କରୁଛି।
