ବାଲେଶ୍ୱର: ଫେସ୍ବୁକରୁ ଆରମ୍ଭ ହୋଇଥିବା ପ୍ରେମକୁ ବିବାହର ରୂପ ଦେଲେ ଗ୍ରାମବାସୀ । ପ୍ରେମିକାକୁ ଦେଖା କରିବାକୁ ଆସିଥିବା ଯୁବକଙ୍କୁ ଗ୍ରାମବାସୀ କାବୁ କରି ଉଭୟଙ୍କୁ ବିବାହ ବନ୍ଧନରେ ଆବଦ୍ଧ କରିଛନ୍ତି । ଏଭଳି ଏକ ରୋମାଞ୍ଚକ ଭରା ଘଟଣା ବାଲେଶ୍ବର ଜିଲା ସୋର ଥାନା ଅନ୍ତର୍ଗତ ମଣିପୁର ଗ୍ରାମପଞ୍ଚାୟତ ଗୁଲୁଣିଆ ଗ୍ରାମରେ ଦେଖିବାକୁ ମିଳିଛି ।
ସୂଚନାଯୋଗ୍ୟ, ଗ୍ରାମର ସୁରେନ୍ଦ୍ର ବେହେରାଙ୍କ ଝିଅ ଏବଂ କୁବାବୁପାଟଣା ଗ୍ରାମର ଯୁଧିଷ୍ଟର ବେହେରାଙ୍କ ପୁଅ ବୈକୁଣ୍ଠଙ୍କ ମଧ୍ୟରେ ଫେସବୁକରେ ପ୍ରେମ ସମ୍ପର୍କ ଗଢି ଉଠିଥିଲା । ଗତ ବୁଧବାର ଦିନ ବୈକୁଣ୍ଠ ଫେସ୍ବୁକ୍ ପ୍ରେମିକାକୁ ଦେଖା କରିବା ପାଇଁ ଲୁଚିଛପି ତାଙ୍କ ଘରକୁ ଯାଇଥିଲେ । ଏହି ସମୟରେ ଗ୍ରାମବାସୀ ଉଭୟଙ୍କୁ କାବୁ କରି ନେଇଥିଲେ । ଯୁବକଙ୍କୁ ଅଟକ ରଖି ଝିଅର ମାଆକୁ ଘଟଣାସ୍ଥଳକୁ ଡକାଇ ଉଭୟଙ୍କ ବିବାହ କରିବା ପାଇଁ ଗ୍ରାମବାସୀ ପ୍ରସ୍ତାବ ଦେଇଥିଲେ । ଏଥିରେ ଉଭୟ ବୈକୁଣ୍ଠ ଓ ଝିଅର ଭାଇ ରାଜି ହୋଇନଥିଲେ । ବିବାହ କରିବା ପାଇଁ ବୈକୁଣ୍ଠ ଦୁଇ ମାସ ସମୟ ମାଗିଥିଲେ । ହେଲେ ଗ୍ରାମବାସୀ ଶୁଣିନଥିଲେ । ବାପା ଛେଉଣ୍ଡ ଝିଅଟିକୁ ସେହି ଦିନ ବିବାହ କରାଇବାକୁ ଗ୍ରାମବାସୀ ଜିଦ୍ ଧରିଥିଲେ । ସ୍ଥାନୀୟ କିଛି ରାଜନେତାଙ୍କ ହସ୍ତକ୍ଷେପରେ ବିଳମ୍ବିତ ରାତିରେ ଉଭୟଙ୍କ ବିବାହ ହୋଇଥିଲା। ପରେ ଉଭୟଙ୍କର କୋର୍ଟ ମ୍ୟାରେଜ୍ ହେବ ବୋଲି ଶୁଣିବାକୁ ମିଳିଛି ।
